په آسټرالیا کې د کرونا وېروس له امله د مړه شویو کسانو شمېرې د لوړېدو په حال کې دي.
وروسته له هغه چې امریکا، د شپږو میاشتو کوچنیو ماشومانو لپاره د کرونا واکسین تایید کړ، یو شمېر آسټرالیایانو ته دا پوښتنه پیدا شوې چې آسټرالیا به څه وخت، دې ته ورته پرېکړه ونیسي.
د سیډني پوهنتون پروفیسر، ډاکټر نیکولاس ووډ وايي چې آسټرالیا به د واکسین تطبیق چارې له نږدې وګوري ترڅو ډاډ ترلاسه کړي چې د کوچنیو ماشومانو لپاره خوندي دی.
هغه وايي: "خوندیتوب به په متحده ایالاتو کې په خورا فعاله توګه وڅارل شي او آسټرالیا به وکولی شي د متحده ایالاتو تجربه وګوري."
"مخکې لدې چې والدین خپل ماشوم واکسین کړي، غواړي پوه شي چې آیا واکسین خوندي دی او څومره خوندي دی؟"
"دوی [آسټرالیایان] غواړي په دې هم پوه شي چې واکسین څومره اغیزمن دی. د واکسین د آزمایښت دوره ډېره اوږده نه وه، ترڅو وکولای شي د واکسین اغیزمنتوب ښه اټکل کړي."
سره لدې چې د کرونا وېروس پر ماشومانو ډېر ناوړه اغېز نلري، مګر په امریکا کې د کوچنیو ماشومانو د مرګ پنځم لامل دی.
Source: AAP
تېره اوونۍ د فایزر او مډرنا شرکتونو د کوچنیو ماشومانو د کرونا واکسین د تایید لپاره د امریکا د ناروغیو د کنترول او مخنیوي ادارې ته وړاندې کړ چې تېره ورځ د یاد مرکز لخوا تایید شو.
مډرنا شرکت، د آسټرالیا د درملو د کنټرول مرکز ته هم خپل غوښتنلک سپارلی دی، مګر آسټرالیا تر اوسه پدې اړه پرېکړه نده نیولې.
