Ntsiab lus tseem ceeb:
- Thawj pwm tsav Anthony Albanese tau ua tus tswv cuab tos txais 9 tug coj ntawm lub koom haum ASEAN thiab ntau pua tus neeg sawv cev ntawm Melbourne.
- Albanese tau hais tias Australia lub neej pem suab nyob rau ntawm cheeb tsam Southeast Asia dua lwm thaj chaw hauv ntiaj teb thiab nws txhawj xeeb tias tsam yuav muaj ib co cwj pwm twg yuav ua rau tsis tau txais kev ruaj ntseg ntawm hiav txwv South China Sea.
- Tej coj ntawm lub koom haum ASEAN yeej txhawb nqa kom yuav tsum tau los tswj kev thaj yeeb rau cov kev siv nkoj ntawm cheeb tsam ntawd.
Cov teb chaws Southeast Asia tau los koom tes ua ke thiab koom nrog Australia tawm tsam nrog Suav tuam tshoj lub fwj chim thiab cov kev hawv.
Ntawd ces yog ib tsab xo ntawm ntau tsab uas lub rooj koom txheej ASEAN summit tau hais rau hnub sab laj hnub kawg uas Australia tus thawj pwm tsav Anthony Albanese uas tus tswv cuab tswj ntawm Melbourne.
Australia cov kev kub siab yuav los kho nws tej visa siv tau zoo tshaj qub rau cheeb tsa Southeast Asia thiab yuav siv nyiaj $2 billion los nqes peev lagluam yog ib co ncauj lug tseem ceeb ntawm lub rooj sab laj 50 ASEAN-Australia Special Summit xyoo 2024 no.
Peb xav ua tib zoo xyuas kom muaj peev xwm siv tau cov kev sib tham uas muaj kev sib hwm, tsis yog cov kev hawv los yog cov kev siv yuam lwm tus ntawm cheeb tsam no, peb xav rov qab qhia ntxiv tias peb yeej kub siab yuav los koom tes ua ke los daws ntau yam teeb meem nyuaj uas peb muaj, ua raws li tej cai tswj cheeb tsam no raws li pej kum haiv cai thiab koom tsim peb cheeb tsam no lub neej pem suab ua ke.Tej lus uas tej coj tau hais ua ke.
ASEAN tej tswv yim siv los tswj South China Sea
Penny Wong uas yog Australia tus nom txawv teb chaws yeej lees paub txog tej coj ntau cov kev tawm tswv yim sib txawv tias txoj xub ke twg thiaj yog txoj zoo tshaj plaws yuav siv los daws Suav cov kev ua nruj tsiv ntawm South China Sea, tab sis ASEAN tej coj kuj tau pom zoo tib yam txog cov kev ruaj ntseg.
Wong tau qhia rau ABC TV hnub zwj Feej (Wednesday) dhau los tias "Dua ntawm qhov uas pheej xav tias tej zaum yuav muaj los tsis muaj ib yam xwm txheej dab tsi tshwm sim, tsim nyog peb yuav tau kub siab txog tej uas peb xav pov puag, tej uas peb yuav tau xyuas kom paub tseeb thiab xyuas qhov tseeb kom tswj tau kev thaj yeeb, kev ruaj ntseg thiab kev vam meej.''
Tsaib no ces Suav thiab Philippines kuj tau muaj ib co xwm txheej tsis sib haum xeeb tom qab Suav ib co nkoj tau caum thiab puav Filipino ib co nkoj ntawm thaj hiav txwv uas yog ib feem ntawm hiav txwv South China Sea uas muaj ntau lub teb chaws aws tias yog lawv li tab sis tam sim no Philippines tseem yog tus tswj ntawd.
Suav yeej aws yuav laug tag nrho cov hiav txwv no raws li nws ''9 txoj kab kem ciam (nine-dash line).''
Thiab kuj tau muaj pej kum haiv ib rooj plaub tau txiav txim rau xyoo 2016 dhau los tias Suav cov kev aws no tsis raug cai, tab sis Beijing yeej tsis kub siab txog cov kev txiav txim siab ntawd thiab yeej tseem hais ua ntuv zus tias 9 txoj kab kem ciam ntawd yeej yog cov nrim dej uas raug kev raug cai lawm.
Tau ntau hnub tsis ntev los no ces kuj tau rov qab muaj cov kev tsis sib haum xeeb no ntau tuaj ntxiv thiab tom qab uas ib tug nom Philippine tau cav tias tau muaj nws 4 tug neeg tswj ciam dej raug mob thaum Suav ib lub nkoj tau siv phom txuag dej rau lawv thiab tig koj los ze uas tej zaum yuav tsim tau kev phom sij.
Kuv txhawj xeeb heev thiab Australia yeej txhawj txog tej cwj pwm uas tsis tau txais kev nyab xeeb thiab tej cwj pwm uas rau tsis tau txais kev ruaj ntseg ntawm South China Sea. Yog tej yam phom sij heev thiab yog tej yam yuav raug kev phom sij uas yuav ua rau muaj tej xwm txheej kub ntxhov loj tuaj ntxiv.Thawj pwm tsav Anthony Albanese tau qhia rau tej neeg nrhiav xov hnub Wednesday.
Tej txiaj ntsim yuav tau los ntawm cov hiav txwv South China Sea tias yog kev thaj yeeb, kev ruaj ntseg thiab kev vam meej. Peb xav txhawb nqa tag nrho txhua lub teb chaws kom lug tsis txhob ua ib yam dab tsi uas yuav muaj teeb meem rau peb txoj kev thaj yeeb, kev tiaj tus thiab kev ruaj ntseg ntawm peb cheeb tsam no.Tej coj ntawm lub koom haum ASEAN cov ncauj lug ua ke lees paub txog South China Sea.
Txawm li cas los kuj tau muaj tej ncauj lug nqua hu nthuav dav tshaj cheeb tsam no thiab, li tau muaj cov kev nqua hu kom xaus tsov rog kiag tam sim no ntawm Gaza thiab xyuas kom tsim tau cov kev pab cuam ruaj khov rau tej neeg txom nyem, thiab muab tej pej xeem raug txhom tso thiab tawm tsam tsis pom zoo nrog cov kev tua tej pej xeem.
Kho tej visa
Tom qab tau muaj cov kev taw qhia kom nqes peev lagluam raws li lub tswv yim Southeast Asia Economic Strategy to 2040 uas tau cej luam tsaib no, ces tsoom fwv Australia yuav los kho kom ib txhia neeg ntawm cheeb tsam Southeast Asia muaj peev xwm siv tau Australia tej visa kom zoo tshaj qub ntxiv.
Ces thiaj yuav pub tej neeg thov cov Business Visitor Visa ntawm 3 xyoos mus ua 5 xyoos thiab yuav tsim cov program Frequent Traveller stream uas tau cov visa 10 xyoo rau ib cov teb chaws ntawm lub koom haum ASEAN tau siv.
Energy transition
Ntau lub hom phiaj ntawm lub koom haum ASEAN ces xav hloov ntawm tej kev siv tej roj niaj hnub siv tam sim no tig mus siv cov clean energy kom ntau tuaj ntxiv, uas xav tau txais kev pab cuam ntawm Australia tam li yog tus xa tej fossil fuels thiab renewables muag txawv teb chaws.
Australia kuj tau qhia txog cov hauj lwm Energy Cooperation Package coj mus pab rau cheeb tsam ASEAN
cov energy policy thiab cov kev npaj yuav tig los siv tej energy no, uas tej coj no kuj lees paub txog qhov tseem ceeb ntawm cov kev siv tej energy no.
Thawj pwm tsav Anthony Albanese yees duab nrog ob tug dais koalas lub caij coj tej coj mus ncig thaum koom rooj sab laj 2024 ASEAN-Australia Special Summit. Source: AAP / David Crosling
Peb zoo siab tos txais Australia cov kev kub siab yuav los tsim kom tau cov clean energy ruaj khov siv thiab los xyuas kom tsim tau cov lagluam green trade, tsim hauj lwm ua thiab muaj kev nqes peev lagluam. Peb yeej kub siab yuav los xyua kom koom ua tau cov lagluam green economy.Tsoom coj ntawm lub koom haum ASEAN cov ncauj lug txog clean energy thiab green economy.
Tsis tas li ntawd los Australia kuj tseem qhia tias yuav pab nyiaj ntxiv txog li $10 million coj los lis cov hauj lwm Climate and Clean Energy Window tam li yog ib feem ntawm Southeast Asia Government-to-Government Partnerships Fund uas nws tau qhia rau xyoo 2023, coj los daws tej teeb meem huab cua pauv hloov thiab.
Kev kawm
Australia tau qhia tias nws yuav pab nyiaj los tsim 75 cov scholarships, uas ib txhia ces Australia tej tsev kawm qib siab yuav tshwm nyiaj pab, thiab yuav muaj 55 cov fellowships rau tej coj tshiab ntawm cheeb tsam ntau tau siv.
Ntxiv ntawd los toom fwv kuj yuav teeb tsam lub koom haum ASEAN-Australia Centre ntawm tuam ceeb Canberra, uas yuav coj los txhawb nqa kom tej kev lagluam ruaj khov, txhawb nqa kev kawm, kab lis kev cai thiab zej zog cov kev sib cuag.
Yog li cov hauj lwm no thiaj li suav cov kev qhia ntawv Askiv rau teb chaws Timor Leste uas yog ib lub teb chaws me kom nws thiaj muaj peev xwm koom tau cheeb tsam tseem ceeb no thiab yuav tsim ib cov scholarships tshiab rau tej coj tshiab tau mus kawm ntawm teb chaws Australia.
Additional reporting by Australian Associated Press.
Nyeem tau ntau zaj xov xwm txog lub rooj sab laj 50 ASEAN-Australia Special Summit 2024 tau raws li hauv qab no:
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
