Tej tswv yim 'tseem ceeb' yuav pab daws tau Australia tej teeb meem tsis muaj neeg paub ua hauj lwm.

Australia yuav tau nrog xyuas kom tej neeg tsiv teb tsaws chaw muaj peev xwm mus kawm tau ntawv Askiv ntau tuaj ntxiv, thiab ua tib zoo xyuas kom muaj cov kev lees paub tej neeg no tej qualifications, mas haiv neeg no thiaj yuav tau txais txiaj ntsim ntau yam.

Migrants who have been in Australia for up to six years earn about 10 per cent less on average than Australian-born workers. Source: AAP / Diego Fedele

Ntsiab lus tseem ceeb:

• Tau muaj ib tsab ntawv cej luam tshiab qhia tias Australia yuav tau nrog xyuas kom siv tau tej neeg tsiv teb tsaws chaw ntawm lub teb chaws no tej txuj ci kom ntau tuaj ntxiv.
• Tsoom fwv teb chaws thiaj tau los ua tib zoo tswj tej neeg txawv teb chaws cov kev tsiv teb tsaws chaw tuaj rau Australia no kom nruj tuaj ntxiv thaum nws kho Australia cov immigration system.
• Cov kev tsis tshua paub lus Askiv zoo ua rau tej neeg tsiv teb tsaws chaw nyuam qhuav tuaj tsis ntev rau Australia no khwv tau nyiaj tsawg dua txog li ntawm 9 feem pua ntawm tej nyiaj hauj lwm nrab uas tej neeg ua hauj lwm khwv tau.

Raws li tau muaj ib co kev teeb txheeb tshiab qhia, ces Australia yuav tsum tau lees paub tej neeg tsiv teb tsaws chaw tej qualifications txawv teb chaws kom zoo tshaj qub ntxiv, mas thiaj yuav pab daws tau nws tej teeb meem nrhiav tsis tau tej neeg muaj txuj ci thiab paub ua hauj lwm txaus los ua hauj lwm.

Lub koom haum Committee for Economic Development of Australia (CEDA) tsab ntawv cej luam uas tau coj los nthuav tawm rau hnub zwj Feej (Wednesday) ces pom tias, haiv neeg no yuav tsum tau kub siab tshaj no los nrog xyuas kom siv tau tej neeg tsiv teb tsaws chaw uas muaj txuj ci thiab paub ua hauj lwm ntawm lub teb chaws no kom ntau tuaj ntxiv.

Tsab ntawv cej luam no thiaj tau taw qhia kom nrog xyuas kom tej neeg muaj peev xwm mus kawm tau ntawv Askiv ntau tuaj ntxiv, thiab muaj cov kev lees paub lawv cov qualifications thiab tej work experience txawv teb chaws kom ntau tuaj ntxiv.

Tsoom fwv teb chaws los kuj tau los tswj tej neeg txawv teb chaws cov kev tsiv teb tsaws chaw tuaj rau Australia no nruj tuaj ntxiv rau nws cov kev kho Australia cov immigration system lawm thiab.

Tsab ntawv cej luam no thiaj tau nqua hu kom tsim ib co kev pab cuam coj los daws tej teeb meem uas tej neeg tsiv teb tsaws chaw pheej tseem raug cais thiab raug ua tsis ncaj rau kom tej neeg no thiaj muaj peev xwm nrhiav tau hauj lwm ua zoo tuaj ntxiv.

Andrew Barker uas yog lub koom haum CEDA tus senior economist tau hais tias tej neeg tsiv teb tsaws chaw uas nyuam qhuav tuaj rau Australia no tsis ntev yeej tseem khwv tau nyiaj tsawg dua tej neeg Australia ua hauj lwm uas yug ntawm lub teb chaws no — thiab yog ib co xwm txheej phem zuj zus los ntev lawm.

Cov kev tsis tshua paub lus Askiv zoo thiab cov kev tsis lees paub lawv tej txuj ci tau ua rau peb tsis muaj peev xwm yuav siv tau tej neeg tsiv teb tsaws chaws no tej txuj ci thiab tej kev txawj ua hauj lwm kom tau txais txiaj ntsim tshaj plaws, thiab tej zaum cov kev raug faib cais tseem yuav ua rau muaj teeb meem thiab. Rau qhov tseem muaj tej neeg no coob heev ua tej hauj lwm uas tsis tau siv lawv tej txuj ci ... yog li ntawd cov kev ua tib zoo xyuas kom lawv muaj peev xwm siv lawv tej txuj ci rau thawj ob peb lub xyoos thaum tuaj txog Australia thiaj yog tej yam tseem ceeb heev uas yuav muaj peev xwm daws tau tej teeb meem nrhiav tsis tau tej neeg muaj txuj ci thiab paub ua hauj lwm txaus los pab Australia tej lagluam.

Senior Economist Andrew Barker at CEDA.

Thiab tej neeg tsiv teb tsaws chaw uas tau tuaj rau Australia txog li ntawm 6 xyoo yeej tseem khwv tau nyiaj tsawg dua Australia tej neeg ua hauj lwm uas yug ntawm teb chaws no tej nyiaj nrab uas khwv tau ntawd tsawg dua 10 feem puas.

Barker thiaj tau hais tias tej neeg tsiv teb tsaws chaw no tsim nyog yuav muaj peev xwm khwv tau nyiaj hauj lwm raws li qhov tsim nyog txog li ntawm $4 billion ib lub xyoos twg tib yam li tej nyiaj hauj lwm uas Australia tej neeg ua hauj lwm uas yug ntawm lub teb chaws no khwv tau.

Tsis tas li ntawd los cov kev paub lus Askiv tsis tshua zoo kuj ua rau tej neeg tsiv teb tsaws chaw nyuam qhuv tuaj rau Australia tsis ntev los no khwv tau nyiaj hauj lwm tsawg dua txog li 9 feem pua ntawm tej nyiaj hauj lwm nrab uas khwv tau ntawd thiab.

Thiab tej poj niam neeg tsiv teb tsaws chaw uas kawm tiav post-graduate degree yog cov uas khwv tau nyiaj tsawg tshaj plaws thiab, uas tseem khwv tau tsawg dua yuav laug txog li ib feem peb ntawm tej nyiaj hauj lwm uas Australia tej poj niam ua hauj lwm uas yug ntawm teb chaws Australia uas kawm sib xws khwv tau thiab.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.