وروسته له هغه چې تېره ورځ د طالبانو لخوا د یوه آسټرالیایي د وهلو او ټپي کېدو راپورونه خپاره شول. د دغه هېواد حکومت له خلکو څخه غوښتنه کړې ترڅو هوايي ډکر ته له سفر څخه ډډه وکړي.
د Smartraveler پر پاڼه تازه خپره شوې خبرتیا کې راغلي چې "د کابل نړیوال هوایی ډګر ته سفر مه کوئ".
تر دې دمه، د اسټرالیایانو او ویزې لرونکو افغانانو لپاره مشوره دا وه چې هوایی ډګر ته سفر وکړي او د وتلو الوتنې ته انتظار وباسي.
کابل ښار ته د طالبانو له ننوتلو وروسته تر دې دمه آسټرالیا له امریکا او نورو هېوادونو څخه په ګډه کار کوي ترڅو زرګونه کسان له دغه هېواد څخه بهر وباسي.
دغه لارښونه له هغه وروسته خلکو ته کېږي چې تېره ورځ د طالبانو لخوا د یوه آسټرالیایي د وهلو او ټپي کېدلو راپورونه خپاره شول.
په یوې خپرې شوې ویډیو کې لیدل کېږي چې یو ټي کس وهل شوی او شاوخوا د ډزو آوازونه هم اورېدل کېږي.
یو شمېر هغه افغانان چې له آسټرالیایانو سره یې په افغانستان کې کار کړی، هڅه کوي ترڅو له هېواد څخه بهر ووځي. اما را پورونه ښيي چې طالبان یواځې بهرنیان هوايي ډګر ته پرېږدي.
په همدې حال کې بریټانیا د خپل سفر پر پاڼه داسې معلومات خپاره کړي چې "د ترهګریز برید دوامداره او لوړ ګواښ شتون لري".
"د کابل حامد کرزي نړیوال هوایي ډګر ته سفر مه کوئ"
"سوداګریزې الوتکې دا مهال فعالیت نه کوي. که تاسو کولی شئ له نورو لارو په خوندي توګه له افغانستان څخه ووځئ ، نو تاسو باید سمدستي دا کار وکړئ."
د آسټرالیا حکومت له تېرو څو ورځو راهیسې عملیات شروع کړي ترڅو د دغه هېواد اوسېدونکي او ویزه لرونکي کسان له کابل څخه متحده عربي اماراتو له هغه ځای څخه آسټرالیا ته انتقال کړي.
د آسټرالیا حکومت تېره ورځ ۷۵۰ تنه نور آسټرالیایان او د دغه هېواد ویزه لرونکي کسان له کابل څخه متحده عربي اماراتو ته انتقال کړي او له هغه ځای څخه بیا آسټرالیا ته راوستل کېږي.
د ۷۵۰ نورو کسانو له ژغورلو سره د ټولو هغو کسانو شمېر ۲۴۰۰ کسانو ته رسېدلی چې له کابل څخه متحده عربی امارتو ته انتقال شوی. تر دې دمه یو زیات شمېر کسان آسټرالیا ته هم را رسېدلي دي.
