د طالبانو د لوړو زده کړو سرپرست وزیر عبدالباقي حقاني وايي ښځې کولای شي د زده کړو لپاره پوهنتونونو ته ولاړې شي، مګر اوس په ګډه د انجونو او هلکانو د درس ویلو وخت پای ته رسېدلی.
ښاغلی حقاني وايي چې په پوهنتونونو کې به د ښځو او هلکانو ټولګي جلا وي او تحصیلي نظام به د اسلامي شریعت پر بنسټ وي.
هغه وايي "مونږ د ګډ تعلیمي سیسټم پای ته رسولو کې کومه ستونزه نلرو." ځکه د افغانستان "خلک مسلمانان دي او دوی به دا ومني."
تر دې مخکې طالبانو ویلي وه چې ښځې کولای شي د زده کړو لپاره پوهنتون ته ولاړې شي، مګر باید حجاب واغوندي او حد اقل په ټولګیو کې پرده واچول شي ترڅو انجونې او هلکان جلا شي.
د طالبانو په پخوانۍ دورې کې انجونو ښونځیو او پوهنتونونو ته د ورتګ اجازه نه درلوده، ښاغلی حقاني وايي چې د طالبانو اوسنی تعلیمي نظام ډېر توپیر لري له تېرې دورې سره.
هغه وايي : "د تیر په پرتله، د تعلیمي ادارو شمیر په بې ساري ډول لوړ شوی."
"دا مونږ ته د راتلونکي، سوکاله او پر ځان بسیا افغانستان لپاره امید راکوي ... مونږ به له هغه ځایه چې دوی پاتې دي دوام ورکوو."
ځینې ویره لري چې نوي مقررات به د میرمنو د زده کړو مخه ونیسي ځکه چې پوهنتونونه د جلا ټولګیو چمتو کولو کافي منابع نه لري.
د لوړو زده کړو سرپرست وزیر عبدالباقي حقاني وايي د پوهنتونونو ځینې مضمونونه به هم حذف شي:
" ځينو مضامینو کمی به راځي، چې نه له مسلکي لحاظه ګټور وي او نه هم فکري پلوه، او له اسلام سره په تصادم کې وي، ملي ارزښتونو سره په تصادم کې وي، هغو مضامینو کې به کمی راځي او هغه مضامین به ختم کړای شي."
