شاوخوا ۳ اوونۍ وروسته له هغه چې طالبانو د افغانستان پلازمینه کابل ونیوه، تېره ورځ یې خپل لنډمهاله حکومت اعلان کړ. د حکومت د مشرانو په لیست کې د داسې کسانو نومونه لیدل کېږي چې د ملګرو ملتونو په لیست کې شامل دي.
ملا محمد حسن اخوند د طالبانو د لنډمهال حکومت د لومړي وزیر (رئیسالوزرا) په توګه اعلان شوی. نوموړي د طالبانو د پخواني رژیم پرمهال په مختلفو پوستونو کې کار کړی.
د یو شمېر رسنیو لخوا خپاره شوي راپورونه ښيي چې د نوموړي نوم هم د ملګرو ملتونو په تور لېست کې شامل دی.
طالبانو تر دې وړاندې ویلي وه چې یو ټولشموله حکومت جوړوي، مګر په کابینې کې ډیر داسې کسان لیدل کېږي چې د طالبانو او حقاني شبکې غړیتوب لري. په نوې کابینې کې د هېڅ ښځې نوم نشته او د ځینو قومونو غړي هم په کې شامل ندي.
د طالبانو د پخواني مشر ملا محمد عمر زوی، ملا یعقوب د طالبانو په کابینې کې د دفاع وزارت د سرپرست او د حقاني شبکې مشر سراج الدین حقاني د کورنیو چارو وزارت د سرپرست وزیر په توګه معرفي شوی دی.
د طالبانو د لنډمهاله حکومت د کابینې لېست Source: Facebook/Spogmai Radio
د طالبانو د قطر د دفتر مشر، ملا عبدالغني برادر د طالبانو د لومړي وزیر د مرستیال په توګه معرفي شوی دی.
په وروستیو څو اوونیو کې د طالبانو د واکمنۍ پر خلاف د افغانستان په بېلا بېلو سیمو او ولایتونو کې لاریونونه ترسره شي. تېره ورځ په هرات ولایت کې سلګونه کسانو په لاریون لاس پورې کړی وه او د لاریون پرمهال یې د افغانستان درې رنګه ملي بیرغ له ځان سره درلوده.
راپورونه ښيي چې په یادو لارینونو کې دوه تنه وژل شوي چې مړي تېره ورځ د هرات مرکزي روغتون ته انتقال شوي دي.
له کابل څخه راپورونه ښيي چې طالبانو تېره ورځ د لاریونونو پرمهال ۱۴ داخلي او بهرني خبریالان بندي کړي وه چې له لاریون وروسته بېرته خوشې شوي دي.
تېره ورځ د طالبانو ویاند ذبیح الله مجاهد لاریون کوونکو ته خبردارۍ ورکړ چې ترڅو چې ټول دفترونه په فعالیت پیل ونکړي خلک باید په لاریون لاس پورې نکړي.
"تر هغه چې ټول دولتي دفترونه خلاص نه وي، او د لاریونونو قوانین تشریح شوي نه وي، هیڅوک باید لاریون ونکړي."
