Muaj pej xeem Australia yuav laug txog 2 feem peb yog cov neeg lub cev muaj ceeb thawj los yog lub cev rog heev lawm thiaj li ua rau muaj cov neeg ib tug ntawm 3 tug twg tau mus sim noj cov zaub mov kom pab tau lawv tau txais kev noj qab nyob zoo thiab tau lub cev yuag txhua xyoo.
Cov xaub mov hais no ces muaj 3 hom tab sis tej zaub mov no puas yuav tau txais txiaj ntsim los pab rau tej neeg sawv daws li tau muaj neeg cav tiag?
Thawj hom zauv mov yog cov hu ua Low cabohydrate high fats (LCHF) uas yog noj cov carbohydrate tsawg, noj nqaij me ntsis, tab sis noj cov roj zoo rau yus lub cev raws li Dr. Rod Tayler tau hais.
Thiab cov zaub mov Paleo diet ces yog cov sawv daws paub tias yog "Caveman diet" uas tsuas noj cov nqaij tau los ntawm tej tsiaj noj zaub, noj zaub ntau yam, noj txiv xyoob txiv ntoo, noj tej noob txiv, berries thiab tej zaub ntug hauv paus.
Hos cov zaub mov Atkins Diet los kuj noj cov carbohydrate tsawg, noj tau tej khoom tsim tau los ntawm mis los yog haus cov full cream milk, noj nqaij, noob txiv, noob zaub, cov nqaij ntses hiav txwv muaj roj, qe thiab cov zaub non-starchy vegetables.
Txawm peb co zaub mov no sib txawv me ntsi los lawv yeej txhawb nqa kom noj cov zaub mov de tau los tshiab tshiab coj los ua thiab txhob noj tej zaub mov uas twb npaj tau tseg ntim tseg es mam coj los rhaub kom sov noj xwb.
Raws li Dr. Rod Tayler uas yog ib tug kws hno tshuaj loog rau tej neeg mob ntawm nroog Melbourne tau qhia, cov kev noj cov zaub mov Low-cab diet tau pab kom nws yuag, tau txais kev noj qab haus huv thiab noj qab nyob zoo, tsis muaj teeb meem mob ntshav siab, ntshav khub roj, plawv los yog hlab plawv los sis mob hlab ntsha tawg saum hlwb li cas.
Tab sis Nutritionist Aloysa Hourigan hais tias tej zaum cov zaub mov no yuav pab tsis tau kom tej neeg tau txais kev noj qab nyob zoo, vim tseem muaj ib cov zaub mov no txwv tsis pub haus mis nyuj full cream milk tab sis tsuas kom haus cov coconut milk thiab cov almond milk xwb uas tsis tau cov calcium txaus coj los pab kom tej neeg cov pab txha ruaj khov.
Txawm tej zaub mov no yuav pab tsis tau li sawv daws xav los Dr Lior Rauchberger uas yog tus coj ntawm lub tuam txhab teeb txheeb my-DNA tau hais tias kev sim ib tug neeg twg cov DNA kuj yuav muaj peev xwm qhia tau tias tsim nyog nws yuav noj hom zaub mov li cas.
Vim rau qhov thaum peb txheeb thiab paub txog tus neeg ntawd cov DNA lawm ces ua rau peb yuav totaub tias yog tim dab tsi thiaj ua rau tus neeg ntawd qab los noj mov, ua rau nws muaj ceeb thawj, puas yog nws lub cev pheej tsis coj tej zaub mov noj los siv thiab pheej khaws cia xwb los yog tej roj raug coj mus khaws cia rau qhov twg thiab tej roj no puas yuav tsim teeb meem rau tus neeg ntawd, ces thiaj li paub npaj ib hom zaub mov twg tsi ntsees rau tus neeg ntawd noj kom pab nws tau txais kev noj qab nyob zoo.
Tab sis Nutritionist Aloysa Hourigan hais tias yog koj ho yog ib tug neeg muaj tej mob uas mob ntev li mob raum los yog lwm yam mob ces xav kom koj sab laj nrog koj tus kws kho mob ua ntej koj yuav hloov noj tej zaub mov no ntshe yuav zoo dua rau koj.
Ntxiv ntawd los raws li lub chaw teeb txheeb ANZAC Research Institute ntawm Sydney uas tau tshawb fawb rau xyoo 2014 ntawd los yeej tau qhia tias yog yus noj cov zaub mov muaj protein ntau ces yuav ua rau yus mob ntshav siab, ntshav qab zib thiab muaj txoj sia ua tau lub neej luv dua. Aloysa Hourigan kuj tau txhab lus ntxiv tias yog yus noj nqaij ntau ces tej zaum yuav ua rau yus mob tau cancer rau yus tej plab hnyuv thiab ua rau lub tej plab hnyuv muaj teeb meem zom tsis tau tej zaub mov zoo thiab.
Mloog tau cov lus nrog lub chaw teeb txheeb my-DNA tus coj cov lus tau raws li qhov link hauv qab no:
Mus saib tau cov xov xwm The Obesity Myth ntawm SBS los yog SBS On Demand toom ib rau hnub tim 04/09/2017, toom ob rau hnub tim 11/09/2017 thiab toom peb rau hnub tim 18/09/2017 sij hawm 7:30pm.
