Dr. Lior Rauchberger uas yog tus coj ntawm lub koom haum my-DNa qhia rau tias "Yeej muaj neeg Austalians coob heev tau ua txhua yam kom lawv lub cev yuag los yog txhob muaj ceeb thawj."
" Lawv yeej tau sim noj ntau yam zaub mov txhua sij hawm tab sis tsuas yog kwv yees xwb ces thiaj tseem pab lawv tsis tau zoo vim tej yam ho pab tau tej yam ho tsis tau."
Dr. Rauchberger yog tus coj ntawm ib lub tuam txhab hu ua my-DNA uas txheeb xyuas tej neeg cov DNA thiab tau teeb txheeb txog tej zaub mov noj nrog rau cov hauj lwm pab kom lub cev yuag tau qhia tias, cov neeg Australia feem coob yeej tau sim noj tej zaub mov txog li 4 zaug pab kom lawv lub cev yuag, hos muaj txog li 1 tug ntawm 10 tus neeg los yog 12% yeej lees tias lawv tau noj tej zaub mov no thawm xyoo.
Lawv kuj txheeb tau ntxiv tias 1 feem 3 ntawm (38%) ntawm cov neeg hauv Australia no yeej tau sim noj tej zaub mov txhua lub xyoo los pab kom lawv txhob muaj ceeb thawj. Thiab tseem muaj neeg txog 29% lees tias tom qab lawv tau noj tej zaub mov no tag lawm los tseem rov qab muaj ceeb dua. Thiab muaj txog 20% ntawm cov neeg tau mus koom cov kev teeb txheeb no tau lees thiab qhia qhov tseeb tias txawm lawv yuav ua li cas los yeej pab tsis tau kom lawv yuag li.
DNA-deoxyribonucleic acid Source: Pixabay-publicdomainpictures-CCO
Tab sis cov DNA no ho los muaj feem cuam tshuam tau li cas thiab? Raws li lub tuam txhab my-DNA qhia " cov kev sim ib tug neeg twg cov DNA yuav muaj peev xwm qhia tau txog tias seb nws puas yog cov neeg yuav muaj lub cev muaj ceeb thawj, puas yog cov neeg qab los noj mov, nws cov roj hauv nrog cev raug coj mus khaws cia li cas thiab ho puas yuav muaj teeb meem li cas rau tej roj khuv cev tsis zoo ntawd."
Dr. Rauchberger tshab txhais tias "Dua ntawm qhov peb cia li kwv yees tias yuav noj hom zaub mov twg thiaj pab kom ib tug neeg twg yuag, ces peb so ib tug neeg twg cov qaub ncaug coj mus sim xwb ces paub lawm tias hom zaub mov twg yuav pab tau tus neeg ntawd kom yuag tau lawm.""Piv txwv li thaum peb txheeb tau cov xov xwm no qhia rau ib tug neeg twg raws nws cov DNA lawm ces yuav qhia tau tias seb puas yuav kom nws noj cov zaub mov muaj protein ntau, los yog noj cov zaub mov txhob kub roj los yog muaj roj tsawg los siv noj cov zaub mov Mediterranean food. uas yog ib cov kev taw qhia coj los siv tsi ntsees rau ib tug neeg twg raws nws cov DNA nkaus xwb tsis yog yuav taw qhia tau rau txhua tus siv. Vim nws cov DNA yeej qhia tias nws lub cev ua hauj lwm li cas thiab peb yuav ua li cas thiaj pab kom tus neeg ntawd noj tej zaub mov uas pab tau nws lub cev yuag tiag."
Dr. Rauchberger hais tias yeej muaj cov kev sim DNA rau tej neeg ntiag tug hauv Australia no los tau ib ntus no lawm. Tej neeg sawv daws yeej muaj peev xwm mus siv tau ntawm tej chaw muag tshuaj hauv Australia los yog nws lub tuam txhab my-DNA uas koom sim cov DNA no. Tab sis kuj yuav muaj tau teeb meem rau tej neeg tej xov xwm ntiag tug los yog lawv tej xov xwm DNA ntawd tau thiab. Yog li nws thiaj xav kom tej neeg uas xav mus sim DNA yuav tsum ua tib zoo txheeb xyuas kom ntxaws thiab mus sim nrog rau tej tuam txhab los yog cov chaw sim DNA uas lawv tso siab thiab ntseeg siab tau tiag tiag xwb.
Nws tseem tau hais ntxiv tias 3 lub xyoos dhau los no, yeej tau muaj ntau cov kev teeb txheeb txog cov genetics los yog cov zaub mov ntawd, vim rau qhov cov zaub mov uas paub tseeb tias ib tug neeg tsim yog yuav noj li cas tsuas yog ib feem ntawm ntau cov tswv yim los daws tej teeb meem no xwb. Vim tseem muaj ntau yam cuam tshuam txog tej vitamins, kev exerciese thiab fitness uas yog qee yam tsawg tsawg ntawm ntau cov tswv yim yuav muaj peev xwm siv tau los pab kom tej neeg lub cev yuag los yog txhob muaj ceeb thawj xwb. Yog li no nws thiaj xav txhawb nqa kom tej neeg ho mus sim lawv cov DNA kom totaub zoo txog lawv lub cev thiab paub txog lawv cov DNA.
