NTSIAB LUS TSEEM CEEB:
- Muaj neeg Australia ntau tshaj 17 million (Roob) tus tau teev zwm npe yuav tawm suab seb puas pom zoo muaj suab rau neeg txum tim yav lig xyoo no.
- Cov kev pom zoo tsim tsab cai muaj suab sawv cev rau neeg txum tim thiaj ua rau tau teev meej tias yuav cia pej xeem tawm suab rau lub caij twg thiab hnub twg meej lawm..
- Thiab txij hnub no mus rau lub sij hawm li ntawm ob hlis txog rau hli ces yuav tsum tau qhia kom meej tias yuav muaj kev tawm suab hnub twg.
Neeg Australia yuav mus tawm suab kom seb puas pom zoo muaj suab sawv cev rau neeg txum tim hauv tsev toom fwv rau lub sij hawm rau hli ntxiv no, tom qab uas tsev kis xeev siab (senate) tau tawm 52 lub suab pom zoo hos muaj 19 lub suab tsis pom zoo.
Thiaj ua rau tsev tsoom fwv tau hla dhau nws qhov teeb meem kawg rau hnub zwj Hli (Monday) dhau los ua ntej yuav muaj cov kev tawm suab, ces tam sim no neeg Australia thiaj yuav txiav txim siab tias seb puas pom zoo teev zwm kom muaj suab - raws li cov rooj ncau lug hais tawm tuaj hauv nruab siab 2017 Uluru Statement from the Heart - rau hauv tej txhooj cai tswj haiv.
Thiaj ua rau cov neeg nqua hu kom muaj kev tawm suab pom zoo tau qhia tias ''tsev tsoom fwv ua hauj lwm tiav lawm'', ces tam sim no thiaj yuav pib muaj cov kev sib teev theev kom thiaj pab tau tej zejzog los txhawb nqa kom hloov txhooj cai tswj haiv.
rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm ,, , thiab los yog download thiab
kom koj mloog tau SBS Hmong.
Linda Burney uas yog tus nom lis dej num pab rau neeg txum tim Australia tau hais tias tej xwm txheej tshiab no ''yog ib kauj ruam ze zog ntxiv'' uas yuav lees paub neeg txum tim Australia rau hauv tej txhooj cai tswj haiv thiab ''yuav pab kom lub teb chaws ua twb zoo no kom haj yam zoo tshaj qub ntxiv tuaj''.
Nws tau hais tias "Ua tau lawm... Tam sim no ces xaus tej kev sib teev theev laj fai kum xeeb lawm. Tam sim no ces peb yuav pib muaj cov kev sib tham ntawm peb haiv neeg nrog tej zejzog lawm,''
"Tau ntev dhau heev lawm, uas Australia tej neeg txum tim ua lub neej txom nyem tshaj tej neeg Australia uas tsis yog neeg txum tim ... Vim peb cov kev tswj hwm siv tsis tau lawm. Yog li ntawd cov kev muaj suab no thiaj yog peb lub cib fim zoo tshaj plaws yuav daws tej teeb meem no, vim thaum peb mloog thiab sab laj nrog tej neeg zejzog, ces yuav ua rau nom tswv muaj cov kev txiav txim siab zoo dua thiab ua tau ntau yam zoo dua."
Pab nom Labor yeej hais tias cov kev muaj suab no tsuas yog ib pawg neeg sab laj tawm tswv yim pab xwb, kom neeg txum tim Australia thiaj muaj cib fim taw qhia tsev tsoom fwv thiab tsoom fwv txog ntau yam uas yuav ua rau muaj tau teeb meem tsi ntsees tau rau lawv.
Tab sis kuj muaj ib neeg tsis pom zoo cav tias cov kev thov hloov kho txhooj cai tswj haiv no tej zaum yuav ua rau muaj teeb meem lwm yam cuam tshuam, hos lwm cov neeg kuj hais tias tseem tso lub fwj chim tsis tau txaus rau neeg txum tim thiab.
Ces thiaj li yuav muaj cov kev tawm suab kho txhooj cai tswj haiv no ua thawj zaug rau lub sij hawm yuav laug txog 25 lub xyoos no rau lub sij hawm li ntawm ob hlis mus txog rau hli pib txij li hnub zwj Hli (Monday) no mus, txawm li cas los thawj pwm tsav Anthony Albanese tau hais tias yeej yuav muaj rau xyoo no.
Nws tau qhia tias "Nod yog ib lub cib fim tsuas muaj ib zaug ntawm yus lub neej los pab kom peb haiv neeg uas twb zoo heev no lawm kom haj yam yog ib haiv neeg ua zoo tshaj qub ntxiv."
Lidia Thorpe uas yog tus nom kis xeev siab ywj pheej qhia txog nws cov kev xav tom qab tsev kis xeev siab tau tawm suab pom zoo kom muaj suab sawv cev rau neeg txum tim hauv tsev tsoom fwv. Source: AAP / Lukas Coch
"Nod yog ib lub cib fim ua kho ntau yam kom zoo tshaj qub tuaj ntxiv, dua ntawm qhov uas pheej ua ntau yam pab rau neeg txum tim Australia xwb, cia lawv pab kho kom muaj cov kev pauv hloov no rau lawv."
Pab nom koom tswj pom zoo kom tsim tau tsab cai kho txhooj cai tswj haiv
Txawm tias pab nom koom tswj tsis pom zoo rau cov kev muaj suab sawv cev hauv tsev tsoom fwv, los nws yeej pom zoo kom tsim tau tsab cai no rau thaum sawv ntxov hnub zwj Hli thiab.
Michaelia Cash uas yog ib tug nom zaum thawj hau rooj ntawm pab nom Liberal tau cam tias cov kev tawm suab pom zoo no yuav ua rau ''muaj cov kev pauv hloov uas yuav tsis muaj peev xwm hloov tau'' rau Australia tej txhooj cai tswj haiv, thiab hais tias pab nom Labor yeej tsis qhia tej xov xwm ntxaws txog tias seb pawg neeg uas tseem muaj ''kev sib tawg tswj'' no ho yuav ua hauj lwm li cas.
Nws tau hais tias "[Tab sis] peb yeej ntseeg tej neeg ntawm haiv neeg no, thiab lawv txoj cai tawm tswv yim txog tej hauj lwm no.''
"Vim yog tej yam uas peb tsis paub, yog tej yam uas sib tawg tswj, thiab yog uas ruaj. Yog yus tsis paub tias xyov cov kev muaj suab sawv cev no yuav ua hauj lwm li cas, ces raws li kuv xav ces: tawm suab tsis pom zoo xwb.''
Jacinta Price uas yog tus nom lis dej num rau neeg txum tim ntawm pab nom koom tswj uas yog ib tug poj niam caj ceg neeg Warlpiri/Celtic, cav tias thiaj ua rau tsev tsoom fwv yuav muaj tau teeb meem lij choj cuam tshuam rau tej xov xwm ntxaws txog cov kev tawm suab no tau.
Nws tau hais tias "Thawj pwm tsav xav kom peb cia li ntseeg nws cov kev pom zoo kos xyeem mem tes siv nyiaj thiab tso cai rau nws cov kev thov teev zwm cov kev muaj suab no kom ruaj nreeg rau hauv tej txhooj cai tswj haiv mus ib txhis xwb, tab sis nws yeej tsis qhia kom meej txog ib yam dab tsi li."
Txawm li cas los yeej muaj ib cov nom ntawm pab nom koom tswj coob heev tsis pom zoo nrog tsab cai no, ces thiaj uas rau lawv tau los teev lawv tej kev tsis pom zoo tawm suab rau hauv daim ntawv piav txog cov kev tawm suab, uas yuav coj mus faib rau tej neeg tawm suab ntawd.
Pab nom Greens zoo siab rau 'ib hnub keeb kwm tseem ceeb'
Dorinda Cox uas yog pab nom Greens tus nom lis dej num pab neeg txum tim uas tau tso tseg nws cov kev xav kom tsim kom tau cov kev pom zoo thiab qhia qhov tseeb ua ntej yuav muaj suab tau hais tias, 'yog ib hnub keeb kwm tseem ceeb heev'' rau Australia tej neeg txum tim.
Nws tau hais tias "Tsev tsoom fwv ua nws tej hauj lwm tiav lawm. Txoj caij uas tej cov neeg txhawb nqa kom muaj kev pom zoo yuav tau mus nrog tej zejzog tham thiab qhia rau tag nrho txhua tus neeg Australia tias vim li cas cov kev tawm suab no thiaj tseem ceeb heev, thiab vim li cas cov kev muaj suab sawv cev hauv tsev tsoom fwv no thiaj tseem ceeb heev."
Ms Burney, seated left, was present for the debate. Source: AAP / Lukas Coch
Txawm li cas los Senator Cox yeej tau hais tias cov kev muaj suab no yeej tsis ua rau muaj teeb meem dab tsi rau neeg txum tim lub fwj chim tswj hwm nws tus kheej li cas, los senator Lidia Thorpe uas yog ib tug nom ywj pheej uas tawm tsis ua nom nrog pab nom Greens thiab qhia txog cov kev muaj suab sawv cev no pheej hais lus cuam tshuam nws tas mus li.
Senator Thorpe thiaj tau hais tias "Qhia kom tau qhov tseeb seb yog li cas tiag!"
Lidia Thorpe thiaj hais npau taws ntsuav tias 'tsuas yog ib lub suab cuav thiab ua txoj dag' xwb
Senator Thorpe, yog ib tug poj niam caj ceg neeg DjabWurrung, Gunnai thiab Gunditjmara, tau piav hnub zwj Hli (Monday) tias yog ''hnub txia haiv'' thiab nqua hu kom neeg Australia tsis txhob pom zoo rau cov kev tawm suab no.
Lub caij uas Senator Thorpe tau sawv hais lus ntawd ces nws hais tias tsab cai no ''yog tej yam yuav raug kev puas tsuaj siv tsis tau'', tab sis nws kuj tsis qhia tias nws pom zoo nrog lub tswv yim twg rau cov kev tawm suab no thiab.
Nws tau hais tias "Kuv yuav tawm suab tsis pom zoo nrog lub tswv yim puas tsuaj no vim tsis pub fwj chim dab tsi rau peb li."
"Tab sis kuv tsis muaj peev xwm yuav txhawb nqa tej yam uas tsis pub lub fwj chim rau kuv tej neeg. Thiab kuv yuav tsis txhawb nqa tej yam uas tej neeg muaj fwj chim ua tus xaiv."
Linda Burney uas yog tus nom lis dej num pab neeg txum tim yees duab nrog 40 tus tub koom siab Jawun ntawm tsev tsoom fwv ntawm tuam ceeb Canberra. Source: AAP / Mick Tsikas
"Yog los mas, kuv tuaj ua hauj lwm ntawm no kom paub txog tej xwm txheej thiab txov cov neeg dawb lub fwj chim thiab txawj dua uas tswj hwm hwm tsav neeg uas sawv cev rau qhov chaw no."
Senator Thorpe kuj hnav ib lub tshav muaj lo lus 'Gammin txhais tias cuav, dag, ua txoj' rau lub caij sib teev theev, xav kom tsev tsoom fwv txib Royal Commission mus txheeb xyuas seb vim li cas tej neeg txum tim Aboriginal thiaj tas sim neej rau lub caij tseem raug nom tswv ceev tseg ntawd.
Senator Lidia Thorpe uas yog ib tug nom ywj pheej tawm tswv yim rau lub caij tseem sib teev theev txog cov kev muaj suab sawv cev rau neeg txum tim hauv tsev tsoom fwv ntwm tsev kis xeev siab ntawm tsev tsoom fwv. Source: AAP / Lukas Coch
"Peb yeej hnov tag nrho tej dab neeg ua zoo heev thiab ua rau peb sov siab heev tias ho yuav pab kho peb lub neej li cas. Thiab yuav pab daws tau tsxhua yam. Tab sis peb yeej tsis muaj peev xwm ua tau dab tsi li txog rau thaum uas tom qab tau muaj cov kev tawm suab no tso ... Ua ke no los tej me nyuam yaus yeej tseem raug txim txom hauv tej tsev laj cuj.''
Malarndirri McCarthy uas yog pab nom Labor ib tug nom zaum thauj hau rooj tau hais ib co lus rau lub caij sib teev theev hnub zwj Hli (Monday) tau nqua hu kom neeg Australia tam suab pom zoo kom ''tsim tau ib lub neej pem suab zoo dua'' thiab tau hais tias cov kev muaj suab no ''yog tej yam tseem ceeb heev'' rau neeg txum tim.
Nws tau hais tias "[Neeg txum tim] tab tom nqua hu neeg Australia tag nrho, kom muaj kev txaus siab rau lub tsam thawj no ntawm peb lub teb chaws tej keeb kwm, uas peb muaj peev xwm los txhawb nqa ib tug twg,''
"Uas ua rau neeg txum tim muaj peev xwm thiab mloog tau tias lawv yig ib feem ntawm lub teb chaws no."
Cov kev txhawj xeeb txog Pauline Hanson cov lus tawm tswv yim thaum sib teev theev
Tom qab uas pab nom One Nation tus nom senator Pauline Hanson tau nqua hu kom neeg Australia ''nug tias vim li cas'' thiaj muaj tej xwm txheej uas nom tswv tau txeeb thiab nyiag neeg txum tim tej me nyuam coj mus tu, ces Senator McCarthy thiaj lees tias nws txhawj xeeb txog cov kev sib teev theev uas yuav muaj txuas ntxiv rau ntau lub hli ntxiv no.
Senator McCarthy thiaj tau nqua hu neeg Australia ''kom ua tib zoo txheeb txog qhov zoo ntawm yus tus kheej'' rau lub caij uas sib teev theev ntawd.
Nws tau hais tias “Kuv txhawj xeeb los mas, yeej txhawj me ntsis thiab, thaum kuv hnov txog tej lus tawm tswv yim ntawd."
Senator McCarthy lees tias nws txhawj xeeb txog tej lus uas Pauline Hanson tawm tswv yim rau lub caij sib teev theev. Source: AAP / Lukas Coch
“Tsuas yog ua tau li hais ntawd xwb mas peb thiaj yuav pom txog feem zoo dua ntawm peb tus kheej tam li yog ib lub teb chaws, los yog pom txog qhov zoo dua ntawm peb tus kheej tam li yog neeg Australia."
Thaum xub mas Senator Hanson yeej tau hais tias yog tsis coj thiab cais tej me nyuam neeg txum tim ntawm lawv tsev neeg mas ntshe ''xyov lawv puas tseem muaj txoj sia ua neej nyob tam sim no lawm.''
Nws tau hais tias “Sawv daws yeej paub tias thaum peb tham txog phaum neeg uas raug cais thiab tshem tawm ntawm lawv tsev neeg ntawd ces yeej tshwm sim muaj tiag. Tab sis xav kom peb nug tias vim li cas thiaj muaj tej xwm txheej no."
Tsab ntawv cej luam 1997 Bringing Them Home Report kuj tau txheeb tau tias cov kev muab neeg txum tim tej me nyuam tshem thiab cais tawm ntawm lawv tsev neeg yog ib cov kev ua txhaum leej tib neeg txoj cai loj heev, vim tej xeeb leej xeeb ntxwv ntawm tej me nyuam yaus uas raug cais thiab tshem tawm ntawd yeej yog cov uas pheej raug txim kaw tsev laj cuj ntau dua, muaj teeb meem tsis tau txais kev noj qab haus huv ntau yam thiab yog tej uas pheej nrhiav tsis tshua tau hauj lwm ua.
Mr Albanese tau hais tias nws kuj tseem tsis tau pom Senator Hanson cov lus tawm tswv yim, tab sis yeej tau kwv yees tias yeej muaj tseeb raws li tej nws tau hais yav tag los thiab.
Nws tau hais tias “Kuv yeej tsis xav teb tej lus ntawd, vim kuv xav tias tsis tsim nyog ib tug thawj pwm tsav yuav teb. Kuv thiaj xav nqua hu kom muaj cov kev sib teev theev uas fwm lwm tus.''
“Tsis hais tej neeg yuav tawm suab li cas li, tej neeg uas txhawb nqa yuav tsum tau ua tib zoo xyuas kom zoo tshaj plaws thiab txheeb qhov tseeb, thiab tsis txhob lam hais tej uas lawv paub tias tsis muaj tseeb."
Linda Burney hais tias cov kev muaj suab sawv cev yuav muaj kev pauv hloov rau cov kev teeb tsa
Yeej yog muaj ob co kev pom zoo feem ceeb mas thiaj yuav kho tau txhooj cai tswj haiv - tsis hais yog cov kev pom zoo ntawm tej neeg feem coob los yog tau txais kev pom zoo ntawm tej xeev feem coob. Tab sis yeej tsis xam ob lub xeev NT thiab ACT rau tej kev pom zoo feem coob ntawm tej xeev.
Senator David Pocock uas yog ib tug nom ywj pheej hais tias tej neeg ntawm xeev ACT thiab NT tsis tau txais vaj huam sib luag rau cov kev tawm suab li lwm lub xeev.
Senator Pocock tau piav txog pab nom koom tswj lub tswv yim uas nws hais tias cov kev tawm suab kho txhooj cai tswj haiv no ''yog ib lub suab sawv cev rau tuam ceeb Canberra'' ntawd ''tsis muaj tseeb''.
Nws tau hais tias "Vim cov kev tawm suab no yog ib co txheej txheem uas tau muaj kev sab laj ntxaws tshaj plaws ntawm Australia tej keeb kwm ... Yog tias tej txheej txheem no tseem siv tau ces tsis tas kho dab tsi. Tab sis yog siv tsis tau lawm ces yuav tau kho. Thiab nod yog ib lub cib fim yuav los kho."
Tej coj neeg txum tim yeej tau nqua hu rau hauv lub rooj ncauj lub yeej tau teev rau xyoo 2017 kom tsim kom tau suab sawv cev rau neeg txum tim hauv tsev tsoom fwv.
Yog li ntawd yav lig xyoo no neeg Australia thiab yuav raug nug kom tawm suab thiab teb tias seb - puas pom zoo los sis tsis pom zoo - thiab seb ho puas txhawb nqa kom kho txhooj cai tswj haiv kom thiaj tsim tau pawg neeg ywj pheej no nyob ruaj nreeg hauv tsev tsoom fwv, thiab tsoom fwv teb chaws mam li muaj cov kev sab laj tawm tswv yim txog ntau yam uas yuav muaj teeb meem rau Australia tej neeg txum tim.
Yog tias ho muaj cov kev tawm suab pom zoo tau raws li siab xav tiag lawm, ces tej nom kis xeev qes hauv tsev tsoom fwv cov kev tsim tus qauv thiab tej xov xwm ntxaws txog cov kev tsim tus qauv no mam los ua cov txiav txim tias yuav zoo li cas.
Ms Burney ntseeg tias cov kev thov kho txhooj cai tswj haiv yog tej yam yuav los daws tej teeb meem tsis tau txais kev noj qab haus huv, cov kev txom nyem los yog tau lub zoo neej ua, thiab txoj kev muaj txoj sia ua lub neej nyob ntev rau tej neeg txum tim Aboriginal thiab Torres Strait Islander.
Raws li tsab ntawv cej luam tshiab txheeb txog cov hauj lwm Closing the Gap tej hom phiaj ntau yam li - seb ho puas muaj cov kev sib tu ncua ntawm cov kev noj qab haus huv ntawm tej neeg Australia uas yog cov neeg txum tim thiab tsis yog neeg txum tim, cov kev tau lub zoo neej ua thiab cov kev tau txais kev noj qab nyob zoo uas raug coj los cej luam rau limtiam dhau los qhia, ces tsuas ua tau tej dej num ntawm.
Nws thiaj tau hais tias "Yeej pab hloov kho tau tej kev teeb tsa, thiab yeej yuav daws tau tau yam teeb meem raws li tau teev rau hauv tej hom phiaj li Closing the Gap thiab."
"Yeej muaj fwj chim hauv tej ntsiab lus - uas yuav tau xyuas thiab pib ua qhov tsim nyog ua. Thiab yog tham txog tej ntsiab lus lawm: ces yuav yog ib cov lus uas ywj pheej, thiab yuav muaj cov kev taw qhia ywj pheej tsis yog rau tsev tsoom fwv xwb tab sis rau [tsoom fwv teb chaws tib si thiab].
"Yuav yog tej yam uas txheeb tau thiab muaj kev dawb huv. Yog tej yam uas tej zejzog ua cov ntau thawj, uas yeej muaj rau hauv tej kev teeb tsa thiab tej koom haum uas muaj tam sim no lawm."
'Tsis muaj kev cuam tshuam ntawm tsoom fwv'
David Littleproud uas yog tus coj pab nom National Party yeej tau qhia tsaib no lub 11 hlis ntuj tias nws pab nom yeej yuav qhia kom tej neeg tawm tsuab tsis pom zoo rau cov kev muaj suab sawv cev rau neeg txum tim hauv tsev tsoom fwv.
Vim lub caij ntawd nws tau xav tias xyov cov kev thov hloov kho no puas yuav ''muaj peev xwm pab daws tau tej kev sib tu ncua no tiag''.
Nws tau hais tias nws yeej tseem tuav lub tswv yim no ruaj thiab ntseeg tias tej tswv yim siv los daws tej teeb meem no tsis tas yuav teev zwj kom muaj suab sawv cev ruaj hauv tsev tsoom fwv.
Nws tau qhia rau xov tooj cua ABC tias "Tej tsoom fwv yeej tau siv nyiaj ntau billion dollars los daws tej teeb meem no [daws cov kev sib tu ncua -close the gap] no, tab sis ua yuam kev lawm.''
Nws tau hais tias "Txawm li cas los yeej tseem muaj lub hom phiaj yuav tsim kom tau kev vaj huam sib luag, tsuas yog tej tswv yim los lis tej dej num kom ua tau li hais xwb,' thiab nws yeej lees tias nws pab nom ntawm tus tsoom fwv koom tswj uas tau ua nom tau 12 lub xyoo ntawd yeej yog ib feem ntawm tej teeb meem uas tsis muaj peev xwm siv tau tej tswv yim zoo los daws tej xwm txheej no.
"Peb ua tsis tau. Kuv yeej tsis ntshai yuav hais tias txhua cov kev yaum tej tsoom fwv siv tsis tau hauj lwm ... tab sis yog peb tsis txhob muaj tej kev nom tswv cuam tshuam, ces peb yeej muaj peev xwm yuav daws tau cov kev sib tu ncua no xwb.''
Nws tau hais tias lub tswv yim yuav daws tau tej no ces yog nyob rau them zejzog xwb, tsis tas yuav muaj suab sawv cev hauv tsev tsoom fwv li.
"Ntawd yog tej yam uas tej coj ntawm ib lub zejzog twg - tsis yog tej coj ntawm ib cheeb tsam twg - yuav tau nrog xyuas thiab nrog lis ... Yog li thiaj xav kom tsis txhob muaj kev cuam tshuam ntawm Canberra thiab yuav tsum xyuas kom kub siab txog tej hauj lwm no ntawm tej town halls thiab tej cub tawg thiab mloog tej coj neeg txum tim tej lus tawm tswv yim.''
