Ntsiab lus tseem ceeb:
- Yuav muaj ib daim ntawv txog cov kev tawm suab pom zoo/ tsis pom zoo txog cov Voice to Parliament xa rau yus xyoo no.
- Kuj muaj kev txhawj xeeb tias tsam ho muaj tej xov xwm cuav/yuam kev txog tej no.
- Australia lub koom haum tswj kev xaiv tsa (Australian Electoral Commission) hais tias vim nws yog tus neeg tuaj nruab nrab ces nws thiaj tsis muaj peev xwm txheeb tau tej lus li hais ntawd.
Nom tswv tej ntawv no ces yog tsim coj los qhia kom zej tsoom nkag siab zoo tshaj qub ntxiv txog cov kev muaj suab sawv cev rau neeg txum tim hauv tsev tsoom fwv, uas teev txog ''ib cov lus hais tshaj qhov muaj tseeb'' teev rau hauv thiab, vim nom tswv tsis muaj peev xwm txheeb seb tseeb los cuav, raws li ib tug kws paub zoo txog tej txhooj cai tswj haiv hais.
Ces thiaj yuav siv tej nyiaj txog li $10 million uas tau los ntawm cov kev sau se coj los npaj, luam, thiab xa tej ntawv ci ci no mus rau Australia txhua yim neeg, rau ntau limtiam ua ntej yuav txog lub caij tawm suab.
Yog li ntawd daim ntawv no thiaj raug tej nom hauv tsev kis xeev ob tog uas pom zoo tawm suab thiab tsis pom zoo tawm suab ua cov sau, uas lub koom hau tswj kev xaiv tsa Australian Electoral Commission (AEC) tau hais tias yeej yuav tsis muaj ib pawg neeg nruab nrab los txheeb qhov tseeb txog cov kev sib teev theev no.
Daim ntawv referendum yog daim ntawv dab tsi?
Daim ntawv no yog ib daig ntawv uas yuav tsum tau siv rau cov txheej txheem tawm suab kho txhooj cai tswj haiv txij xyoo 1912 thaum uas nyuam qhuav muaj tej txhooj cai tswj haiv siv tsis ntev xwb, thiab yeej muaj cov kev tawm suab los kho tej txhooj cai tswj haiv no tas li.
Tus tsoom fwv Labor tam sim no txhawj tias tsam tej neeg xaiv nom yuav tsis pom zoo nrog nws cov kev thov kho txhooj cai tswj haiv no, vim lawv tsis paub tej hauj lwm no ntxaws txaus.
Yog li ntawd thiaj tsim cov ntawv no coj los qhia zej tsoom kom nkag zoo txog tsab cai tshiab no zoo tshaj qub ntxiv.
Raws li George Williams uas yog ib tug kws paub zoo txog txhooj cai tswj haiv ntawm tsev kawm qib siab UNSW hais, ces yeej tsis tau kho tej cai no los ntev tshaj ib puas xyoo lawm.
Nws tau hais tias ''tej ntawv qhia txog cov kev tawm suab kho cai no thiaj yog tej yam txawv heev,
“Kuv xav tias tej zaum peb kuj yuav muaj peev xwm ua tau tej no zoo dua tam sim no, tab sis kuj tsuas yog tib txoj xub ke uas yuav tau pom zoo los yog tsis pom zoo mas thiaj kho tau los yog kho tsis tau ib tsab cai twg xwb thiab.
“Yeej muaj ob peb yam techonology uas vam meej lawm txij li xyoo 1912 los lawm, tab sis kuj tsis muaj hmoo uas, tej ntawv no kuj tseem yog ib lub tswv yim zoo tshaj plaws uas muaj rau peb siv thiab."
Cov txheej txheem ntawm tej ntawv no ho ua hauj lwm li cas?
Ua ntej uas yuav pib cov txheej txheem sau daim ntawv no, ces tsev tsoom fwv yuav tau tawm suab rau tsab cai tiav tso kom tso cai rau muaj cov suab sawv cev rau tsev tsoom fwv no.
Tsev kis xeev qes (House of Representatives) yeej tau pom zoo tsim tsab cai no rau lub tsib (5) hlis ntuj dhau los thiab cia siab tias tsev kis xeev siab (Senate) los kuj yuav pom zoo rau lub rau (6) hli ntuj no thiab.
Raws li zeskais (Professor) Williams hais, ces yog thaum ua tau li ntawd lawm, ces tej nom hauv tsev tsoom fwv uas tawm suab pom zoo thiab tej uas tawm suab tsis pom zoo yuav los teeb tsa ob pawg rooj saib xyuas.
Nws tau hais tias “Qhov lawv yuav ua ces yog yuav tau los sib tham kom muaj kev pom zoo rau cov kev los tsim daim ntawv no thiab muab xa mus rau AEC,"
“Ces daim ntawv no yuav ras los ua daim uas yuav raug muab xa mus rau neeg Australia."
Thiab tej lus uas sib cav ntawd yuav tsum tau txais kev pom zoo feem coob ntawm tej nom hauv tsev tsoom fwv ntawm ib tog twg uas sib teev theev ntawd.
Raws li zes kais Williams tau hais ces “Kuj yuav yog tej yam nyuaj heev uas tej neeg yuav pom zoo txog tej ntsiab lus ntawm tej ntawv no, tab sis kuj yog ib cov kev suav tej suab pom zoo feem coob xwb thiab. Yog tej neeg feem coob pom zoo lawm ces lawv yuav qhia tias tej lus no yog cov uas peb xav kom sau rau ntawm daim ntawv no, thiab tsis kub siab txog feem tsawg lawm."
Ho puas yuav txheeb qhov tseeb txog daim ntawv no?
Lub koom haum tswj kev xaiv tsa - Australia Electoral Commission (AEC) yog tus yuav coj tej ntawv no coj mus xa rau neeg Australia.
Tom Rogers uas yog tus coj lub koom haum no tau hais tias yog tej yam tseem ceeb uas neeg Australia tau totaub txog tias AEC yuav tsis kho tej lus sib teev theev uas tej nom tsev tsoom hwv tau hais no lawm.
Nws tau hais tias “Tsis hais dab tsi li uas tej pawg rooj saib xyuas muab rau peb ces yog tej uas peb yuav coj mus xa rau tej zejzog - ua yeej tsis txheeb tias lawv sau yuam kev los yog sau tsis raug kev cai sau ntawv los yog tej lus uas lawv tau hais,"
“Thiab peb yuav tsis siv tej txheej txheem dab tsi txheeb tej ntaub ntawv ntawd seb puas muaj tseeb li cas. Vim yog peb tseem txheeb, ces yuav muaj neeg hais tias peb tsis yog tus neeg nruab nrab, thiaj yog tej yam uas peb yuav tau lug.''
Tej ntawv no puas qhia qhov tseeb tiag?
Thaum uas tus tsoom fwv Fisher tau tsim cov ntawv pamphlet coj los siv thawj zaug xyoo 1912 ntawd, ces William Huges uas yog tus kws lij choj teb chaws lub caij ntawd yeej tau npaj tias xav tim kom tau ib co kev sib teev theev txog cov kev tawm suab kho txhooj cai tswj haiv uas yuav tsis cuam tshuam txog 'ntiag tug, yog ib cov muaj laij thawj zoo thiab ua raws li tej cai lij choj raws li qhov tsim nyog', yog tej yam nqua hu 'ua muaj laij thawj zoo, tsis yog yuav ua rau muaj kev tu siab thiab ua raws li ib tug twg/ib pab twg cov kev xav'.
Tab sis raws li zes kais(Professor) Williams hais, ces keeb kwm yeej tau qhia lawm tias yeej tsis muaj peev xwm ua tau li hais ntawd li.
Nws tau hais tias “Lub tswv yim ntawm daim ntawd no mas yeej tsim nyog yuav yog tej yam muaj laij thawj zoo txaus thiab ua raws tej laij thawj no, tab sis qhov tseeb tiag yeej tsis yog li hais ntawd."
“Thiaj xav kom neeg Australia yuav tsum tau ceev faj thaum nyeem tej ntawv no. Yav dhau los mas tej ntawv no yeej yog tej uas teev txog tej lus puab quav cia uas hais tshaj qhov muaj tseeg tiag,
“Thiab yeej tsis muaj cai teev tseg tias yuav tsum yog ib daim ntawv uas tsuas qhia qhov tseeb xwb, vim feem ntau mas tej ntawv no yeej muaj tej lus dag los yog xov xwm cuav nrog thiab."
Puas muaj lwm txoj xub ke zoo dua?
Lub koom haum Australia Institute uas yog ib lub tawm tswv yim txog zwj tsoom tej cai yeej tau nqua hu kom tsev tsoom fwv yuav tsum tau qhia qhov tseeb txog tej cai haub tau yaum txog tej laj fai kum xeeb.
Lub koom haum no yeej tau qhia txog lawv tej kev txhawj xeeb txog tej ntawv no rau lub caij uas muaj kev tshuaj ntsuam txog tej tshuab uas txheeb txog tej txheej txheem tawm suab kho cai tsaib no.
Bill Browne yog tus coj lub koom haum Australia Institute cov hauj lwm democracy thiab accountability program, yeej tau lees paub tias yeej muaj qhov zoo ntawm cov kev luam tej ntawv no xa mus rau tag nrho txhua tus neeg australia ua ntej yuav muaj kev tawm suab kho cai kom muaj suab rau neeg txum tim hauv tsev tsoom fwv thiab.
Nws tau hais tias “Tej ntawv uas siv haub tau yaum no yeej muaj peev xwm rov qab mus saib tau ntxiv, uas yeej txawv cov kev haub tau yaum hauv TV thiab xov tooj cua uas uas haub tau yaum tag lawm ces tsis nco lawm."
“Thiab kuj yog tej uas ua zoo xyuas kom txhua leej txhua tus pom tib co lus zoo tib yam, kom thiaj li sib tham thiab sib teev theev tau txog ntau yam yooj yij tshaj qub ntxiv."
Mr Browne thiaj nqua hu kom tej nom tsev tsoom fwv yuav tsum tau siv ib co cai coj los xyuas kom cov txheej txheem no yog ib co uas txaus ntseeg tshaj qub ntxiv."
Nws tau hais tias “Tsim nyog cia tej kws ywj pheej uas tus npaj tej ntawv no kom thiaj tsim tau tej ntsiab lus tuaj nruab nrab tsis yog pheej cia muaj tej ntsiab lus uas pheej ua rau lwm tus chim los yog ua rau lwm tus npau taws."
“NSW yeej yog lub xeev uas siv lub tswv yim no, thiab tsuas yog tib lub xeev uas yeej muaj tau ntaub ntawv teev tseg tias muaj cov kev pom zoo kho tej cai no,
“Los sis yog tej neeg uas sau tej lus nug uas teb Pom zoo (Yes) thiab tsis pom zoo (No) no kuj pom zoo los txheeb qhov tseeb thiab. Thiab yus tsis tas yuav hloov ib tsb cai dab tsi yog tias tej nom tuaj yeem tiag."
Txawm li cas los kuj tsis coj Mr Browne lub tswv yim no coj los siv thiab.
Thaum twg tej neeg xaiv nom no mam tau txais tej ntawv no?
Tej neeg Australia yeej yuav tau txais lawv tej ntawv no yam tsawg ua ntej 2 limtiam ua ntej yuav tawm suab seb puas pom zoo los tsis pom zoo los kho txhooj cai tswj haiv.
Tej ntawv ua teev cov lus nug no los yeej raug txhais ua tej lus ntau tshaj 50 hom lus, nrog neeg txum tim 20 hom lus thiab, uas yeej muaj ntawm Australian Electoral Commission (AEC) lub vas sab thiab yeej muaj cov kev txhais ntawv hauv xov tooj thiab.
AEC tus coj tau hais tias lub koom haum no yeej yuav muaj ib cov kev taw qhia nthuav dav deev coj los ua tib zoo xyuas kom neeg Australia totaub txog ntau yam lus uas pom zoo thiab tsis pom zoo kho txhooj cai tswj haiv uas tsis tau sau rau daim ntawv ntawd, txheeb qhov tseeb los yog lub koom haum no txhawb nqa ntawd.
Mr Rogers tau hais tias “Kuv yeej txhawj txog tej ntawd heev, vim tej zaum kuj yuav ua rau muaj kev cuam tshuam txog peb cov kev ua tus neeg tuaj nruab nrab."
“Vim li ntawd, peb thiaj yuav tau ua tib zoo xyuas kom tej pej xeem totaub tias tau tej xov xwm ntawd qhov twg los."
Nws kuj cia siab tias tej neeg yuav nkag siab zoo txog tej lus uas tau muaj cov kev sib cav uas pom zoo (Yes) los yog tsis pom zoo (No) ntawd zoo tuaj ntxiv rau lub caij ntawd.
Mr Rogers tau hais tias “Yog tias peb tau nrog tej nom tsev tsoom fwv paub tab tham, ces kuv ntseeg tias lawv yeej yuav kub siab tiag tiag txog lawv tej luag dej num thiab yuav ras los ua ib cov ntaub ntawv uas zoo heev."
