Koj puas khoom hnub tim 14 lub 10 hli ntuj? AEC muaj ib txoj hauj lwm rau koj ua

Australia lub koom haum tswj kev xaiv tsa (Australian Electoral Commission - AEC) tau nqua hu rau ntau txheeb tus neeg ua hauj lwm kom mus pab lis tej hauj lwm tawm suab seb puas pom zoo kho txhooj cai tswj haiv seb puas pub muaj suab rau neeg txum tim.

The AEC is looking for up to 100,000 temporary workers for the referendum. Source: AAP / Mick Tsikas

Ntsiab lus tseem ceeb:

• Yeej xav tau neeg ua hauj lwm thoob teb chaws los li tej dej num tawm suab kho txhooj cai tswj haiv , tab sis xav tau tej neeg ua hauj lwm rau ntawm tej zos toj siab ntau tshaj plaws.
• Tej hauj lwm yuav ua rau hnub tawm suab ces tsuas ua ib hnub xwb thiab yeej yuav xyaum qhia kom tej neeg paub ua tej hauj lwm no.
• Yuav siv nyiaj txog li ntawm $450 million los lis tej hauj lwm no - thiab yeej muaj ntsis zoo sib xws li tej hauj lwm xaiv tsa tsoom fwv teb chaws thiab.

Tab tom xav tau ib cov neeg ua hauj lwm ib ntus ntau caum txheeb tus neeg ua hauj lwm pab Australia lub koom haum tswj kev xaiv tsa (Australian Electoral Commission - AEC) los khiav cov hauj lwm tawm suab seb puas pom zoo kho txhooj cai tswj haiv kom muaj suab rau neeg txum tim (Indigenous Voice referendum).

Lub koom haum no tau hais tias nws tab tom nrhiav neeg ua hauj lwm ib ntus txog li 100,000 tus los ua cov hauj lwm no, thiab yuav ua thoob lub teb chaws no rau hnub tim 14 lub 10 hli ntuj xyoo no.

Thiab cov hauj lwm tawm suab no yuav siv nyiaj txog $450 million - uas muaj ntsis zoo sib xws li cov kev xaiv tsa tsoom fwv teb chaws thiab.

Tom Rogers uas yog tus coj lub koom haum no hasi tias cov kev ua cov hauj lwm cuam tshuam txog cov kev tawm suab kho txhooj cai tswj haiv no yuav yog ib co experience tsim nuj heev rau tej neeg tej resumes, thiab kuj yog tej yam pab kom khwv tau nyiaj me ntsis siv thiab.

Nws tau hais tias "Vim peb yeej paub tias yuav tawm suab hnub twg kiag lawm, ces tam sim no tej neeg thiaj paub tias seb lawv puas muaj peev xwm nrog peb ua hauj lwm rau lub 10 hli ntuj no."

"Yog ib co hauj lwm uas khwv tau nyiaj, thiab pab kom yus them tau ntau yam nqe, los yog ua tau ib yam dab tsi zoo, los yog siv coj los npaj rau lub caij Christmas."

"Thiaj li yog ib lub zoo cib fim los ua hauj lwm rau thawj cov kev tawm suab kho txhooj cai tswj haiv theem teb chaws ntawm tiam neej no thiab kuj yog ib co experience zoo rau yus tej resume thiab."

• Ho muaj tej lus sib cav dab tsi txog cov kev pom zoo txhawb nqa thiab tsis pom zoo txhawb nqa txog cov kev muaj suab sawv cev no?
• Yus ho yuav mus tawm suab kho txhooj cai tswj haiv li cas?
• Voice to Parliament referendum yog dab tsi thiab vim li cas peb thiaj xav tau ib co?

Lub koom haum no tau hais tias txawm tias yeej xav tau tej neeg no ua hauj lwm thoob teb chaws, los kuj tseem xav tau tej neeg ua tej hauj lwm no rau ntawm tej zos yaj sab tshaj plaws thiab.

Tej chaw uas AEC qhia tias xav tau tej neeg mus ua hauj lwm tshaj plaws yog cov chaw li Dubbo, Armidale, Scone thiab Tamworth ntawm NSW, ua ke no los kuj xav tau neeg ua hauj lwm ntau heev ntawm Queensland tej zos Mt Isa, Goondiwindi thiab Weipa.

Kuj yeej xav tau tej neeg ua hauj lwm ntawm Melbourne, ntawm Geelong thiab ntau cheeb tsam zos toj siab ntawm xeev Victoria, nrog rau ob lub nroog Hobart thiab Launceston ntawm xeev Tasmania, lub pov txwv Kangaroo Island thiab Coober Pedy ntawm SA, los yog ntawm lub zos Broome thiab Esperance ntawm WA, thiab ntau thaj chaw thoob plaws lub xeev Northern Territory.

Mr Rogers tau hais tias "Yog tej yam nyuaj kawg uas nrhiav tsis tau tej neeg ua hauj lwm rau ntawm tej zos toj siab los yog tej zos nyob deb ntawm ntau thaj chaw, ces peb thiaj cia siab tias yuav muaj neeg kam mus koom ua tej hauj lwm no pab lawv tej zejzog thiab ua tib zoo xyuas kom tej neeg ntawm lawv tej chaw muaj peev xwm mus tawm suab."

"Peb los kuj tseem xav tau ntau pab neeg mus ua hauj lwm rau ntawm ntau thaj chaw li coj tej ntaub ntawv tawm suab no mus rau tej neeg tawm suab uas tej zaum tsis muaj peev xwm yuav mus tawm suab ntawm tej chaw tawm suab tau - li mus rau tej zos toj siab los yog tej zejzog uas nyob deb heev ntawd, los sis yog tej chaw tu tsom kwm tej laus, tej tsev laj cuj thiab tej tsev uas tej neeg tsis muaj vaj tse nyob ntawd thiab."

Thiab tej hauj lwm ua rau hnub referendum day no ces yog cov hauj lwm uas ua tib hnub nkaus xwb thiab yeej muaj cov kev qhia kom tej neeg paub ua cov hauj lwm no, tab sis lub koom haum tswj cov kev xaiv tsa no yeej tau hais tias muaj ib co hauj lwm ces yuav tau ua li ntawm ob peb limtiam thiab.

Koj muaj peev xwm txheeb tau tej xov xwm txog Indigenous Voice to Parliament referendum xyoo 2023 no ntawm SBS tej Network, thiab ntawm NITV.

Txheeb tau ntxiv ntawm SBS Voice Referendum portal kom koj thiaj nyeem tau tej zaj xov xwm, saib tau tej videos, thiab tej xov xwm kaw ua suab (podcasts) ua tej lus thiab ntawv ntau tshaj 60 hom, los yog saib tau tej xov xwm tshiab tshiab thiab cov kev tshuaj ntsuam txog tej no, los yog tej documentaries thiab tej kev lom zem ntau yam tau dawb ntawm Voice Referendum hub on SBS On Demand.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.