ኣብ መንጎ ሓይልታት ፈደራል መንግስቲ ኢትዮጵያን ክልል ትግራይን ሓያል ኲናት ኣብ ዝካየደሉ ዘሎ እዋን ኣብ ክልል ትግራይ ብውሑዱ 50 ኣውስትራልያውያን መውጽኢ ስኢኖም ተቐርቂሮም ኣለው ተባሂሉ ይእመን።
ብዙሓት ኣብኡ ተቐርቂሮም መውጽኢ ስኢኖም ተሪፎም ዘለው ብምኽንያት ለበዳ ኮቪድ-19ን ኣዝዩ ክቡር ኮይኑ ዘሎ ዋጋ በረራታት ነፈርትን እዩ፡ ገሊኡ ዋጋታት ቲኬት ናብ ኣውስትራልያ ዝለዓለ ክሳብ $16,000 ይበጽሕ።
እዚ ዝመጽእ ዘሎ ሓይልታት ፈደራል መንግስቲ ኢትዮጵያ ንከተማ መቐለ ኣኽቢብናያ ኣለና ኢሎም ኣብ ዝገለጽሉን መጥቃዕቲ ክፍጽሙ ኣብ ዝደናደንሉ ዘለው እዋንን እዩ። እዚ ኩነታት ከኣ ካብ ውዱብ ሕቡራት ሃገራት ብርቱዕ መጠንቀቕታ ክወሃብ ደሪኹ'ሎ።
ኣፈኛ ጉዳይ መንእሰያት ኣብ ማሕበረሰብ ትግራዎት ኣውስትራልያውያን ማህቶት ያይኑ መንግስቲ ኣውስትራልያ ዜጋታት ክግዕዙ ሓገዝ ክገብር መጸዋዕታ ተቕርብ ኣላ።
"ንሕና መንግስቲ ኣውስትራልያ ድፍኢቱ ክቕጽልን ንመንግስቲ ኢትዮጵያን መንግስቲ ኣቢይ ኣሕመድን ኣብ ልዕሊ ህዝቢ ትግራይ ዘካይዶ ዘሎ መጥቃዕታት ደው ከብል ክሓትት ንደሊን ንጽውዕን። ምኽንያቱ እዚ ሰላማውያን ሰባት እዩ ዝጎድእ ዘሎ። እዚ ኣዴታትን ህጻናትን እዩ ዝጎድእ ዘሎ። እዚ ኣሽሓት ካብ መረበቶም የፈናቕሎም ኣሎ።"
