Highlights
ගතවූ පැය 24 තුළ ඔස්ට්‍රේලියාවෙන් කොවිඩ් මරණ 54 ක් වාර්තා වී ඇති අතර වික්ටෝරියා ප්‍රාන්තයෙන් කොවිඩ් මරණ 18 ක්ද, ක්වීන්ස්ලන්ත ප්‍රාන්තයෙන් මරණ 13 ක්ද නිව් සවුත් වේල්ස් ප්‍රාන්තයෙන් මරණ 14 ක්ද ඊට ඇතුලත්වේ. බටහිර ඔස්ට්‍රේලියා ප්‍රාන්තයෙන් මීට පෙර සිදුවූ කොවිඩ් මරණ 03 ක් ද වාර්තා විය.
Australian Capital Territoryහි රෝහල්ගත වූ කොවිඩ් රෝගීන් සංඛ්‍යාව යළි ඉහළ යමින් පවතී. මේ වන විට එම සංඛ්‍යාව 97 ක් වන අතර එය කොවිඩ් වසංගතය ආරම්භ වූ දා සිට වැඩිම රෝහල් ගතවීම් සංඛ්‍යාව ද වේ.
ඔස්ට්‍රේලියාවේ නව කොවිඩ් ආසාදිතයින්, රෝහල්ගතවීම් සහ කොවිඩ් මරණ සඳහා නවතම COVID-19 දත්ත ලබාගත හැකිය.
කොවිඩ් වසංගතය තවමත් අවසන් වී නැති බව ලෝක සෞඛ්‍ය සංවිධානයේ COVID-19 තාක්ෂණික ප්‍රධානී වෛද්‍ය Maria Van Kerkove පැවසුවාය.
“අපි මෙම වයිරසය සමග කටයුතු කරන්නේ ගින්නක් සමග සෙල්ලම් කරනවා වගේ… ලෝකයට COVID-19 වසංගතය සමඟ කටයුතු සිදු කිරීමට අවශ්‍ය බව මට වැටහෙනවා, නමුත් එවැනි දැඩි සංසරණය තවත් ප්‍රභේදවලට තුඩු දීමට පුළුවන්. වර්තමාන ප්‍රභේද සමඟ වුවද මරණ ඉතා ඉහළ වන අතර ඒවා වළක්වා ගැනීමට අපට මෙවලම් ඇති විටත් මේ තත්ත්වය උදාවීම පිළිගත නොහැකියි" යනුවෙන් ඇය පැවසුවාය.
සිය මහජන සෞඛ්‍ය හදිසි ප්‍රකාශය ජුනි 15 බදාදා රාත්‍රී 11.59 ට අවසන් වන බව Northern Territory නිවේදනය කරයි.
කෙසේ වෙතත්, සමීප ආශ්‍රිතයින්, කොවිඩ් ආසාදිතයින් සඳහා අනිවාර්ය හුදකලා කිරීම සහ මුව ආවරණ පැළඳීම සම්බන්ධ නීති තව දුරටත් පවතිනු ඇත.
ඕස්ට්‍රේලියානු සෞඛ්‍ය ආරක්ෂණ ප්‍රධාන කමිටුවේ (AHPPC) නිර්දේශ අනුව ගුවන් තොටුපල පර්යන්තවල මුව ආවරණ අනිවාර්ය කිරීම අවසන් කළ පළමු ඔස්ට්‍රේලියානු ප්‍රාන්තය හෝ ටෙරිටරිය බවට Northern Territory පත්ව ඇත
මෙය අනෙක් ප්‍රාන්ත සහ ටෙරිටරි ද අනුගමනය කිරීමට නියමිතය. කෙසේ වෙතත්, පර්යන්තවල මුව ආවරණ පැළඳීමේ නීති ඉවත් කිරීමට පෙර ඔවුන්ට අදාළ මහජන සෞඛ්‍ය නියෝග සංශෝධනය කිරීමට අවශ්‍ය වේ. ජුනි 18 වැනි සිකුරාදා වන විට ඔවුන්ට එය කළ හැකිය.
ඔස්ට්‍රේලියානු ප්‍රාන්ත සහ ටෙරිටරි හරහා ගුවන් ගමන් සඳහා තවමත් මුව ආවරණ පැළඳීම අනිවාර්ය කර ඇත.
ඔස්ට්‍රේලියාවේ ඖෂධ හා චිකිත්සක නියාමන අධිකාරිය වයස අවුරුදු 18 සහ ඊට වැඩි පුද්ගලයින් සඳහා COVID-19 බූස්ටර් මාත්‍රාවක් ලෙස Novavax එන්නත තාවකාලිකව අනුමත කර ඇත.
