Ae toe vaiaso o lumana'i ai le Aso Kerisimasi, ua faatulagaina e faigamalo Setete ma Teritori ni puipuiga mo tagata mai le Northern Beaches i Sini lea o loo faasolo ai pea ina si'itia le aofa'i o tagata ua pesia i le KOVITI-19.
Mai le Aso Toona'i 19 Tesema, e to'a 41 tagata ua faamaonia le pesia i le vairusi, ae le o mautinoa poo fea na pesia mai ai.
Ua aumaia se faaaliga mai le palemia Setete o NSW,
"Essentially, we will be going back to the restrictions that were in place back in March, just for the local government area of the Northern Beaches," she said.
"O lona uiga ua toe fo'i i aiaiga o Sa ma Vavao e pei ona iai i le masina o Mati, ae na o le Northern Beaches e a'afia ai," na ia saunoa.
Ua tula'i mai ai ma ni puipuiga mo tagatanu'u o Sini ma NSW o loo fuafua e faimalaga i isi Setete ma Teritori i le vaitaimi lenei o aso malolo. O vaega nei e tatau ona e silafia.
Vitoria
O tagata uma e fia malaga i Vitoria mai NSW e amata atu i le vaeluapo o le Aso Faraile, e tatau ona talosaga muamua mo se pemita malaga, ae o tagata uma mai le pitonu'u o le Northern Beaches Local Government Area, ua faasaina ona ulufale i le Setete o Vitoria.
O pemita e pei o moli faasino ta'avale "traffic light system": o pitonu'u o le Northern Beaches o le lanu mumu ('red zones'), o pitonu'u o Greater Sydney e lanu samasama ('amber'), ae o isi vaega uma o NSW, e lanu meamata ('green').
O tagata mai pitonu'u lanu samasama, 'amber zones' e tatau ona faia se test i le taimi e taunu'u ai, ma faamalosia ona tausi puipuia se'ia maua mai le faai'uga.
Na faaalia e le minisita o le soifua maloloina i Virtoria, o le taulaga atoa o Sini e ono aofia i le lanu mumu, 'red zone' pe a faatetele ona pepesi le faama'i i pitonu'u i fafo mai o le Northern Beaches.
"There is a significant risk that COVID-19 has seeded across the greater Sydney area," he said.
"O loo iai se tulaga lamatia mai le ono pipisi o le faama'i i le taulaga atoa o Sini," na ia saunoa.
"If that is the case - and I stress that is an if - then we will have no choice but to declare all of Sydney a red zone."
"A faapea e o'o i le tulaga lena - pe a faapea - o lona uiga ua leai seisi faai'uga e tala feagai ae tu'u le taulaga atoa o Sini i lalo o le lanu mumu."
O loo mata'itu ta'i itula le tulaga o le pepesi o le faama'i, ma e mafai ona suia vave.
O tagata na taunu'u i Vitoria mai pitonu'u o le Northern Beaches mai le Aso 11 o Tesema e tau mai i le aso analeila, ua tatau ona tausi puipuia ma faia ni a latou tests.
Queensland
Ua faatulagaina e le matagaluega o le soifua maloloina i Queensland pemita mo tagata uma e fia ulufale atu, e amata atu i le 1am le vaveao o le Aso 20 Tesema ae o le pitonu'u o le Northern Beaches Local Government Area, ua i lalo o le vaega o Sa ma Vavao.
"For those people who are from the Central Coast of New South Wales or from greater Sydney, who are coming to Queensland, upon your arrival, we are asking you get tested, and you quarantine yourself until you get the results from those tests," said Health Minister Yvette D'Ath.
"Mo tagata uma mai le Central Coast o NSW, pe mai pitonu'u o Greater Western Sydney, e fia ulufale mai i Queensland, e tatau ona faia sau test i le taimi e taunu'u mai ai, ma e tausi puipuia pe quarantine, se'ia maua mai le faai'uga o lau test," saunoa ai Yvette D'Ath le minisita o le soifua maloloina.
O tagata uma mai le Northern Beaches na taunu'u i Queensland i tua mai o le Aso 11 Tesema, ua tatau ona faia ni a latou tests ma tausi puipuia i o latou aiga mo le 14 aso.
O tagata uma na taunuu mai i Queensland i le Aso Faraile, a faapea na asiasi pe na aumau i le Northern Beaches talu mai le Aso 11 o Tesema, e tatau ona tausi puipuia, pe quarantine mo le 14 aso.
E amata mai le Aso 19 o Tesema, o tagata uma na asiasi pe aumau i le Northern Beaches o le a faamalosia ona tausi puipuia i faletalimalo, le hotel quarantine,ae totogi e i latou lava le pili.
Australian Capital Territory
Ua fautuaina tagatanu'u o Canberra e 'alo 'ese ma taofia ni malaga na fuafuaina mo le Northern Beaches.
Ua fautuaina e le matagaluega o le soifua maloloina tagata na asiasi i le Northern Beaches talu mai le Aso 11 o Tesema ina ia faia tests ma tausi puipuia.
Western Australia
Ua faaalia e le palemia Setete o Western Australia, Mark McGowan, le toe faamalosia o Sa ma Vavao i le tua'oi ma NSW ona o le tulaga i le pepesi o le faama'i i le Northern Beaches.
E amata atu i le vaeluapo o le Aso Toona'i (19 o Tesema) ona si'itia le tulaga lamatia mai le maualalo "low risk" i le feololo "medium risk", o lona uiga ua toe fo'i i le tulaga na iai i le amataga o le tausaga.
Na o tagata e iai faatagaga faapitoa mai NSW o le a mafai ona taliaina e ulufale atu i WA.
Na saunoa Mark McGowan e le o se faai'uga na faigofie ona faia ona o le vaitaimi lenei o aso malolo.
"I understand this will be devastating news for people looking to meet family for Christmas in NSW," he said.
"Ou te iloa le faigata o le faaaliga lenei mo i latou na fia asiasi e feilo'ai ma aiga i NSW i le Kerisimasi," na ia saunoa.
The Northern Territory
Ua aumaia e le faigamalo Teritori i le Northern Territory se lapata'iga i tagata uma mai le Northern Beaches Local Government Area e fia malaga atu i le Northern Territory, o le a faamalosia ona tausi puipuia pe quarantine i Alice Springs poo Darwin mo le 14 aso.
Tasmania
Ua faasaina e le faigamalo i Tasmania tagata uma na asiasi pe aumau i le Northern Beaches Local Government Area talu mai le Aso 11 o Tesema ona ulufale atu i le Setete, se'i vagana tagata i lalo o faatagaga faapitoa.
Ua faatulagaina e Tasmania pitonu'u o Greater Sydney i lalo o le tulaga lamatia feololo, "medium risk" mai le vaeluapo o le Aso 20 o Tesema. O tagata uma mai pitonu'u nei e tatau ona tausi puipuia mo le 14 aso pe a taunu'u atu i Tasmania.
O tagata uma nai ia pitonu'u i Sini ae na taunuu atu i talu mai le Aso 11 ua fautuaina e faia nei se test ma tausi puipuia se'ia maua mai le faai'uga.
O loo iai le faamoemoe o le faigamalo i Tasmania e soalaupule Sa ma Vavao nei ma le pulega o le tu'uga va'a faila, le Sydney to Hobart yacht race.
South Australia
O tagatanu'u o South Australia na asiasi i le Northern Beaches Local Government Area, Lavender Bay poo Penrith talu mai le Aso 11 o Tesema, ua faatonuina nei e tausi puipuia pe quarantine mo le 14 aso ma faia ni a latou tests.
O tagata uma na asiasi i le Avalon Bowling Club i le Aso 13 Tesema 5pm - 7pm, ma leAso 15 Tesema 3pm-5pm, poo le Avalon Beach RSL Club i le Aso 11 o Tesema, ua faasaina ona ulufale i South Australia. A faapea ua i totonu o le Setete, ua tatau ona tausi puipuia i faletalimalo, le hotel quarantine.
O tagata uma mai isi Setete ma teritori e fia ulufale i South Australia, e tatau ona talosaga mo se pemita ulufale ina ia iloa ai pe na asiasi i le Northern Beaches.
