د واکسین د تطبیق په وروستي پړاو کې له ۱۶ کلونو کوچني ماشومان هم کولای شي د کووېډ-۱۹ واکسین ترلاسه کړي، مګر یواځې په هغه حالت کې چې ورته اړتیا ولري.
د آسټرالیا هېواد له فایزر، آسټرا زنیکا او نوواوکس شرکتونو څخه د کرونا واکسینونه اخلي او د دغه هېواد ټولو اوسېدونکو ته یې په وړیا توګه ورکوي.
د حکومت د پلان پر اساس به د آسټرالیا دیریو اوسېدونکو ته د آسټرا زنیکا واکسین ورکړل شي، مګر د دغه واکسین د اغېزمنتیا په اړه اندېښنې شتون لري.
کارپوهان وايي، په داسې حال کې چې د کرونا وېروس نوي واکسینونه د جوړېدو په حال کې دي، د آسټرا زنیکا واکسین لا هم یو مهم او ارزښتناک واکسین دی چې د آسټرالیایانو په ساتنه کې مرسته کولای شي.
د لومړۍ کرښې روغتیایي کار کوونکي، د قرنطین او سرحدي برخې کارکوونکي، د لوی عمر لرونکو او معلولینو د مرکزونو اوسېدونکي او کارکوونکي، هغه کسان دي چې د کرونا واکسین په ملي تګلاره کې ورته لومړیتوب ورکړل شوی دی او ټاکل شوې ترڅو د فایزر شرکت واکسین ترلاسه کړي.
د فایزر شرکت واکسن ۹۵ سلنه ګټور دی او د آسټرالیا حکومت غواړي ترڅو له یاد شرکت سره د ۲۰ میلیونه ډوزه واکسین تر لاسه کړي. مګر د آسټرا زنیکا شرکت واکسین ۶۲ سلنه ګټور دی او آسټرالیا غواړي له یاد شرکت څخه شاوخوا ۵۳ میلیونه ډوزه واکسین و پیري.
نور زمونږ د همکار مجيب منيب په رپوت کې واورئ.
