د افغانستان کرېکټ بورډ د غوراوي کمېټې د دې لوبلړۍ لپاره د حشمت الله شاهدي په لوبډلمشرۍ ۱۹ کسیزه لوبډله اعلان کړې، چې په کې هغه لوبغاړو ته هم د لوبېدو چانس ورکړ شوی، چې تر دې وړاندې د ځوانانو اسیا جام کې ښه وځلېدل.
د افغاستان په لوبډله کې د لوبډلمشر حشمت الله شاهدي ترڅنګ، رحمت شاه، رحمن الله ګربز، صدیق اتل، اکرام علي خېل، نور احمد، عبدالمالک، ریاض حسن، دروېش رسولي،عظمت الله عمرزي، محمد نبي، ګلبدین نایب، راشد خان، ننګیال خروټي، الله محمد غضنفر، بلال سمیع، فضل الحق فاروقي ، نوید ځدارن او فرید احمد نومونه شامل دي.
د معلوماتو له مخې د افغانستان او بنګله دېش کرېکټ ملي لوبډلو تر اوسه ۱۶ یو ورځنۍ لوبې کړي، چې ۱۰ يې بنګله دېش او شپږ افغانستان ګټلې دي.
د افغانستان کرېکټ بورډ بیا د ۲۰۲۵ کال چمپینز ټرافي ته د چمتووالي لپاره بنګله دېش سره پلان شوې لوبلړۍ مهمه بولي.
د کرېکټ ویاند سیدنسیم سادات اس بي اس پښتو سره په خبرو کې وویل، افغان لوبډله دغه سیالیو ته بشپړه چمتو ده او تمه ده چې له بنګله دېش څخه دغه لوبلړۍ وګټي.
مهرباني وکړئ لا ډېر معلومات دلته په رپوټ کې واوروئ.
