اسټراليا کې د طبي لوی افسر يا چيف ميډيکل افيسر مرستيالې ډاکټرې سونيا بينيت څو ورځې وړاندې خبريالانو ته وويل چې د اوميکرون ويروس بڼه نرمه او ډيرو خلکو لپاره معمولي ده.
د يادو ورته څرګندونو په ځواب کې د نړۍ روغتيا ادارې بيا دا خبر رد کړی چې ګواکې د اوميکرون ويروس بڼه نرمه او يا معمولي ده.
د ډبليو ايچ ادارې مشر ډاکټر ټيډروس وايي، د اوميکرون ويروس بڼه په ډيرو واکسين شوو کسانو کې د ډيلټا بڼې پر پرتله جدي نده ولې دا پدې معنی هم نده چې د اوميکرون بڼه نرمه او يا هم معمولي ده.
ښاغلي زياته کړه، لکه د ويروس پخوانيو بڼو په څير اوميکرون هم خلک ناروغه کوي او وژني، بله خوا د ويروس چټکۍ سره خپريدو له وجې د ريکارډ په کچه کسان روغتون کې بستر کيږي او په ټوله نړۍ کې روغتيايي سيسټم له ستر فشار سره مخ دی.
اسټراليا کې د ويروسونو برخې پوهان د روغتيا نړيوالې ادارې لدې دريځ سره همغږي دي.
د ساوت اسټراليا پوهنتون څخه ايډرين ايسټرمن وايي، د روغتيا نړيواله اداره ځکه انديښمنه ده چې په دومره ډير شمير خلک په کرونا ويروس اخته کيدو وروسته که لږ شمير يې هم روغتونو کې بستر کيږي نو هغه د تيرو پر پرتله ډير ښکاري.
د ښاغلي ايسټرمن په وينا، لا تر اوسه کافي اندازه معلومات په لاس کې نشته چې د اوميکرون بڼه په هغو هيوادونو کې چې ډير خلک يې واکسين شوي نه اوسي پر خلکو څومره اغيز کوي.
Adrian Esterman, epidemiologist from the University of South Australia. Source: Supplied
اسټراليا کې هره ورځ له ۱۰۰ زرو ډير کسان په کرونا ويروس اخته کيږي او خلک بايد پدې پوه شي چې کرونا ويروس ناروغي لا تر اوسه لکه زکام ورته نده.
ملبورن پوهنتون څخه ډاکټر باکسټر وايي، يوه لويه ستونزه د اوميکرون ويروس سره داده چې ډيري خلک پدې اند دي چې دا يو معمولي ويروس بڼه ده او همدا ده چې پر ټولنې ددې فشار راتلل له پامه غورځول کيږي.
ډاکټر باکسټر لپاره د لا ډيرو واکسين شوو کسانو پدې ويروس اخته کيدل د انديښنې وړ مسله ده.
ښاغلی وايي، داچې خلک په اوميکرون بڼه اخته کيږي او دوی بشپړ واکسين شوي دي نو همدا وجه ده چې پر دوی اسانه تيريږي ځکه واکسين د يادې بڼې پر وړاندې ښه کار کوي، بله خوا بيا اوميکرون زمونږ د بدن دفاعي سيسټم شاوخوا لار پيدا کوي ترڅو مونږ پرې اخته کړي.
په ټوله کې ويلی شو چې د اوميکرون بڼه معمولي نده.
بلجيم اوهانګ کانګ کې پر اوميکرون ترسره شوې څيړنې ښودلې چې ياد ويروس ډيره کې د بدن سږې نه خرابوي لکه څنګه چې ډيلټا او نورې بڼې يې کوي.
لا تر اوسه ساينس پوهانو د اوميکرون بڼې په تړاو رسمي دريځ ندی څرګند کړی.
