د ښځو د فوټبال نړیوالې سیالۍ په هرو څلورو کلونو کې یوځل د فیفا د غړو هېوادونو د لوبډلو ترمنځ ترسره کېږي. تېر ځل یادې نړیوالۍ سیالۍ په فرانسې کې ترسره شوې، مګر د ښځو د فوټبال راتلونکې نړیوالې سیالۍ په آسټرالیا او نوي زیلنډ هېواودونو کې ترسره کېږي.
تېره ورځ د فوټبال نړیوال فدراسیون یا فیفا اعلان وکړ چې اسټرالیا او نوي زیلنډ له ۳۵ رایو څخه ۲۲ رایې ترلاسه کړي او د راتلونکي نړیوال جام کوربه هېواونه به واوسېږي.
ټاکل شوې ترڅو د ښځو د فوټبال نړیوالې سیالۍ د ۲۰۲۳ کال د جولای او اګسټ په میاشتو کې د ۳۲ لوبډلو ترمنځ په لاره واچول شي. د یادولو وړ ده چې د ۲۰۱۹ کال په نړیوالو سیالیو کې ۲۴ لوبډلو برخه اخیستې و.
د ۲۰۱۹ کال په ډېسمبر میاشت کې د آسټرالیا او نوي زیلنډ د فوټبال ادارو چارواکو په ګډه دغه پریکړه کړې و ترڅو د ۲۰۲۳ کال د فوټبال سیالیو د کوربه توب لپاره خپل غوښتلیک وسپاري. له رایې اچونې مخکې د فیفا تخنیکي ټیم، د اسټرالیا او نوی زیلنډ هېوادونه د کولمبیا هېواد په پرتله د ښځو نړیوال جام سیالیو لپاره غوره هېوادونه بللي و.
د فوټبال نړیوال فدراسیون په خپله ټویټر پاڼه یو پیغام خپور کړی او د اسټرالیا او نوي زیلنډ هېوادونو ته مبارکي ویلې.
د ښځو د فوټبال نړیوالې سیالۍ له ۱۹۹۱م کال راپدېخوا په هرو څلورو کلونو کې یوځل ترسره کېږي. تېر کال د ښځو د فوټبال نړیوال جام سیالۍ د فرانسې په ۸ ښارونو کې په لاره اچول شوې وې چې د امریکا د فوټبال لوبډلې بریا په خپل نوم ثبت کړه.
