बिहीबार अस्ट्रेलियामा कम्तीमा पनि ४४ कोभिड-१९ सम्बन्धित मृत्युहरू दर्ता गरिएको छ। जसमध्ये न्यु साउथ वेल्समा २६, भिक्टोरियामा नौ र क्वीन्सल्याण्डमा पाँच जनाले ज्यान गुमाएका छन्।
क्वीन्सल्याण्डमा अस्पताल भर्ना हुनेहरूको सङ्ख्यामा लगातार वृद्धि देखिएको छ। राज्यमा कोभिड-१९ सङ्क्रमित ५ सय १२ जना अस्पतालमा भर्ना भएका छन् जुन २९ अप्रिल यता कै सबैभन्दा धेरै हो।
स्वास्थ्य मन्त्री मार्क बट्लरले ६० लाख भन्दा बढी योग्य अस्ट्रेलियालीहरूले तेस्रो चरणको खोप नलिएको बताएका छन्।
उनका अनुसार आगामी केही हप्ताहरूमा ओमिक्रन भेरीएन्ट अन्तर्गतका बीए.४ र बीए. ५ सब भेरीएन्टहरूले सङ्क्रमण सङ्ख्यामा भारी वृद्धि ल्याउने देखिएको छ।
विश्व स्वास्थ्य सङ्गठनको पछिल्लो रिपोर्टमा पनि बीए.४ र बीए. ५ सङ्क्रमणहरू विश्वभर फैलिरहेको उल्लेख गरिएको छ। अहिलेसम्म बीए.४ सङ्क्रमण ५८ राष्ट्रहरूमा र बीए. ५ सङ्क्रमण ६२ राष्ट्रहरूमा विद्यमान रहेका छन्।
