ഓസ്‌ട്രേലിയയുടെ മറ്റെല്ലാ ഭാഗങ്ങളിലും കൊറോണവൈറസ് ബാധ നിയന്ത്രണത്തിലായതിനു പിന്നാലെയാണ് വിക്ടോറിയയില്‍ എണ്ണം വീണ്ടും ഉയരുന്നത്.
സംസ്ഥാനത്ത് 16 പേര്‍ക്കാണ് തിങ്കളാഴ്ച പുതുതായി വൈറസ്ബാധ സ്ഥിരീകരിച്ചത്. ഇതില്‍ നാലു പേര്‍ വിദേശത്തു നിന്നെത്തി ഹോട്ടല്‍ ക്വാറന്റൈനില്‍ കഴിയുന്നവരാണ്.
ബാക്കി 12 പേരും സംസ്ഥാനത്തിനുള്ളില്‍ വൈറസ് ബാധിച്ചവരാണ്.
കാരൊലിന്‍ സ്പ്രിംഗ്‌സിലെ ആല്‍ബന്‍വെയ്ല്‍ പ്രൈമറി സ്‌കൂളിലെ രണ്ട് അധ്യാപകര്‍ക്ക് രോഗബാധ കണ്ടെത്തിയിട്ടുണ്ട്.
രണ്ടു മാസത്തിനിടയിലെ ഏറ്റവും വലിയ രോഗബാധയാണ് കഴിഞ്ഞ ഒരാഴ്ചയില്‍ വിക്ടോറിയയില്‍ കണ്ടത്. 150ലേറെ പുതിയ കേസുകള്‍ ഒരാഴ്ച കൊണ്ട് സ്ഥിരീകരിച്ചു. രാജ്യത്ത് ആകെയുള്ള പുതിയ കേസുകളുടെ 85 ശതമാനത്തോളവും വിക്ടോറിയയിലാണ്.
ഇതില്‍ സാമൂഹിക വ്യാപനത്തിലൂടെയുള്ള നിരവധി കേസുകളാണുള്ളത്.
ഈ സാഹചര്യത്തില്‍, സംസ്ഥാനത്ത് ഹോട്ട്‌സ്‌പോട്ടുകളെന്ന് കണ്ടെത്തിയിട്ടുള്ള പ്രദേശത്തേക്ക് യാത്ര ചെയ്യുന്നത് ഒഴിവാക്കണമെന്ന് ദേശീയ ആരോഗ്യ സമിതിയായ AHPPC മുന്നറിയിപ്പ് നല്‍കി.
ഹ്യൂം, കേസീ, ബ്രിംബാങ്ക്, മോര്‍ലാന്റ്, കാര്‍ഡിനിയ, ഡാറെബിന്‍ എന്നീ മേഖലകളെയാണ് ഹോട്ട്‌സ്‌പോട്ടുകളായി കണ്ടെത്തിയിരിക്കുന്നത്.
ഈ മേഖലകളിലുള്ളവര്‍ പുറത്തേക്ക് യാത്ര ചെയ്യുന്നതും പരമാവധി ഒഴിവാക്കണമെന്നാണ് നിര്ദ്ദേശം.
A map showing the coronavirus hotspots in Victoria as identified by the state's health department. Source: Victorian Department Of Health And Human Services
ഈ നിര്ദ്ദേശം സ്വാഗതം ചെയ്യുന്നതായി സംസ്ഥാന ആരോഗ്യമന്ത്രി ജെന്നി മികാകോസ് അറിയിച്ചു. എന്നാല്‍ ലോക്ക്ഡൗണ്‍ നിര്‍ദ്ദേശിച്ചിട്ടില്ലെന്നും ആരോഗ്യമന്ത്രി പറഞ്ഞു.
വീട്ടില്‍ തന്നെയിരിക്കണം എന്ന നിര്ദ്ദേശം ഇപ്പോഴില്ലെങ്കിലും, വരും ദിവസങ്ങളില്‍ സ്ഥിതി മെച്ചമായില്ലെങ്കില്‍ അത് പരിഗണിക്കുമെന്നും ജെന്നി മികാകോസ് പറഞ്ഞു.
അതിര്‍ത്തി അടയ്ക്കില്ലെന്ന് NSW
ന്യൂ സൗത്ത് വെയില്‍സില്‍ രണ്ടു പേര്‍ക്കാണ് പുതുതായി രോഗം സ്ഥിരീകരിച്ചത്. ഇതില്‍ ഒരാള്‍ ഹോട്ടല്‍ ക്വാറന്റൈനിലാണ്.
എന്നാല്‍ തെക്കുപടിഞ്ഞാറന്‍ സിഡ്‌നിയിലുള്ള ഒരാള്‍ക്ക് എങ്ങനെ രോഗം ബാധിച്ചെന്ന് കണ്ടെത്താന്‍ കഴിഞ്ഞിട്ടില്ല.
ഇതു കൂടി കണക്കിലെടുത്ത് വിക്ടോറിയയില്‍ നിന്നുള്ളവര്‍ക്ക് യാത്രാ നിയന്ത്രണങ്ങള്‍ ഏര്‍പ്പെടുത്തുന്ന കാര്യം പരിഗണിക്കുമെന്ന് ഡെപ്യൂട്ടി പ്രീമിയര്‍ ജോണ്‍ ബെറിലാറോ സൂചിപ്പിച്ചിരുന്നു.
രാജ്യം കൊറോണവൈറസില്‍ നിന്ന് പുറത്തുവരാന്‍ ശ്രമിക്കുകയാണെന്നും, വിക്ടോറിയയിലെ ഇപ്പോഴത്തെ സാഹചര്യം ഒരു ഭീഷണിയാണെന്നും അദ്ദേഹം ചാനല്‍ 7നോട് പറഞ്ഞു.
എന്നാല്‍ അതിര്‍ത്തി അടയ്ക്കില്ലെന്ന് പ്രീമിയര്‍ ഗ്ലാഡിസ് ബെറെജെക്ലിയന്‍ പറഞ്ഞു.
അതേസമയം, വിക്ടോറിയയിലേക്ക് യാത്ര ചെയ്യുന്നവര്‍ ജാഗ്രത പാലിക്കണമെന്ന് പ്രീമിയര്‍ നിര്ദ്ദേശം നല്‍കി. വിക്ടോറിയയിലെ ഹോട്ട്‌സ്‌പോട്ടുകളിലേക്ക് ആരും യാത്ര ചെയ്യരുതെന്നും ബെറെജെക്ലിയന്‍ നിര്‍ദ്ദേശിച്ചു.
മെല്‍ബണിലെ ഇപ്പോഴത്തെ സാഹചര്യം കൊവിഡിനൊപ്പമുള്ള ജീവിതത്തിന്റെ ഭാഗമാണെന്ന് പ്രധാനമന്ത്രി സ്‌കോട്ട് മോറിസനും പറഞ്ഞു. ഇത്തരം സാഹചര്യങ്ങള്‍ പ്രതീക്ഷിച്ചിരുന്നതാണ്.
സാമ്പത്തിക രംഗം വീണ്ടും തുറക്കുന്നതിനും, ജനങ്ങളെ തിരികെ തൊഴില്‍ രംഗത്തേക്ക് കൊണ്ടുവരുന്നതിനുമുള്ള നടപടികളുമായി മുന്നോട്ടുപോകുമെന്ന് അദ്ദേഹം ആവര്‍ത്തിച്ചു.
People in Australia must stay at least 1.5 metres away from others. Check your state’s restrictions on gathering limits.
Testing for coronavirus is now widely available across Australia. If you are experiencing cold or flu symptoms, arrange a test by calling your doctor or contact the Coronavirus Health Information Hotline on 1800 020 080.
The federal government's coronavirus tracing app COVIDSafe is available for download from your phone's app store.
SBS is committed to informing Australia’s diverse communities about the latest COVID-19 developments. News and information is available in 63 languages at .
