കൊറോണവൈറസ് പ്രതിസന്ധിയിൽ നിന്ന് കര കയറാൻ സർക്കാർ ഇതുവരെ പ്രഖ്യാപിച്ച പദ്ധതികൾക്ക് പുറമേയാണ്, കെട്ടിട നിർമ്മാണ മേഖലയെ സഹായിക്കാനായി പുതിയ പാക്കേജ് തയ്യാറാക്കുന്നത്.
വീടുകളുടെ നവീകരണത്തിനായി സാമ്പത്തിക ഗ്രാന്റുകൾ നൽകുന്ന കാര്യം സർക്കാരിന്റെ പരിഗണനയിലുണ്ടെന്ന് പ്രധാനമന്ത്രി സ്കോട്ട് മോറിസൻ 2GB റേഡിയോയോട് പറഞ്ഞു. ഇതോടൊപ്പം, പുതുതായി നിർമ്മിച്ച വീടു വാങ്ങുന്ന എല്ലാവർക്കും ധനസഹായം നൽകും എന്നാണ് റിപ്പോർട്ടുകൾ.
വീടു നിർമ്മാണമേഖലയിൽ ഇടിവു വന്നിരിക്കുന്നതിനെ സർക്കാർ ഗൗരവത്തോടെയാണ് കാണുന്നതെന്നും, ട്രേഡീ മേഖലയ്ക്കും, തൊഴിലുകൾക്കും അത് നല്ല കാര്യമല്ലെന്നും അദ്ദേഹം പറഞ്ഞു.
വലിയ പദ്ധതികൾ നടപ്പാക്കുന്നതിനും, പുതിയ കെട്ടിടങ്ങൾ നിർമ്മിക്കുന്നതിനുമൊക്കെ പ്രാധാന്യം നൽകാനാണ് സർക്കാർ ആലോചിക്കുന്നത്. എന്നാൽ വൻകിട കോൺട്രാക്ടർമാർക്കല്ല, പ്രാദേശിക ട്രേഡീകൾക്ക് സഹായം നൽകുന്നതാണ് പ്രധാനമെന്നും പ്രധാനമന്ത്രി വ്യക്തമാക്കി.
നാലു ബില്യൺ ഡോളറിന്റെ പാക്കേജായിരിക്കും പ്രഖ്യാപിക്കുകയെന്ന് ദ ഓസ്ട്രേലിയൻ പത്രം റിപ്പോർട്ട് ചെയ്തു.
ആദ്യ വീടു വാങ്ങുന്നവർക്ക് ഇതുവരെ നൽകിയിരുന്ന ധനസഹായം, നിലവിൽ വീടുള്ളവർ പുതിയ വീടു വാങ്ങുമ്പോഴും ലഭ്യമാക്കും എന്നാണ് റിപ്പോർട്ട് പറയുന്നത്. എന്നാൽ പുതുതായി പണിതീർത്ത വീടു വാങ്ങുമ്പോഴോ, അല്ലെങ്കിൽ വീടു നിർമ്മിക്കുമ്പോഴോ മാത്രമാകും ഇതു നൽകുക എന്നാണ് റിപ്പോർട്ട് സൂചിപ്പിക്കുന്നത്.
ഇതിന്റെ വിശദാംശങ്ങൾ ലഭ്യമായിട്ടില്ല.
വീടു വാങ്ങാൻ 40,000 ഡോളർ വരെയാണ് ഗ്രാന്റായി നൽകുകയെന്നും റിപ്പോർട്ടുകളുണ്ട്. ഇതും സർക്കാർ പ്രഖ്യാപനം വരുമ്പോൾ മാത്രമേ വ്യക്തമാകുകയുള്ളൂ.
ഏതൊക്കെ തരത്തിലുള്ള നവീകരണ ജോലികൾക്കാണ് ഗ്രാന്റ് ലഭിക്കുക എന്ന് പദ്ധതിയിൽ വ്യക്തമായി പ്രതിപാദിക്കുന്നുണ്ടാകും. ഈ പാക്കേജ് ആരെങ്കിലും ദുരുപയോഗം ചെയ്യുന്നതിനുള്ള സാധ്യതകൾ ഒഴിവാക്കണമെന്ന് പ്രധാനമന്ത്രി ചൂണ്ടിക്കാട്ടി.
കെട്ടിട നിർമ്മാണ രംഗത്ത് കൂടുതൽ തൊഴിൽ സൃഷ്ടിക്കുക എന്നതാണ് ഇതിന്റെ പ്രധാന ലക്ഷ്യമെന്നും പ്രധാനമന്ത്രി സിഡ്നിയിൽ പറഞ്ഞു.
ഈയാഴ്ച തന്നെ സർക്കാർ പാക്കേജ് ഔദ്യോഗികമായി പ്രഖ്യാപിക്കുമെന്നാണ് പ്രതീക്ഷിക്കുന്നത്.
People in Australia must stay at least 1.5 metres away from others. Check your state’s restrictions on gathering limits.
Testing for coronavirus is now widely available across Australia. If you are experiencing cold or flu symptoms, arrange a test by calling your doctor or contact the Coronavirus Health Information Hotline on 1800 020 080.
The federal government's coronavirus tracing app COVIDSafe is available for download from your phone's app store.
SBS is committed to informing Australia’s diverse communities about the latest COVID-19 developments. News and information is available in 63 languages at .
