വിക്ടോറിയയിലെ ഇപ്പോഴത്തെ കൊറോണവൈറസ് സാഹചര്യം ദുരന്ത സമാനമാണ് എന്ന് ചൂണ്ടിക്കാട്ടിയാണ് പ്രധാനമന്ത്രി പുതിയ സാമ്പത്തിക സഹായം പ്രഖ്യാപിച്ചത്.
പാൻഡമിക് ലീവ് ഡിസാസ്റ്റർ പേയ്മെന്റ് എന്ന പേരിലായിരിക്കും ഇത് നൽകുക.
സംസ്ഥാനത്ത് ഭൂരിഭാഗം ചെറുകിട ബിസിനസുകളും അടച്ചിടാൻ സർക്കകാർ തീരുമാനിച്ചിട്ടുണ്ട്. രണ്ടര ലക്ഷത്തോളം പേരുടെ തൊഴിലിനെയാകും ഇത് ബാധിക്കുക എന്നാണ് റിപ്പോർട്ടുകൾ.
ഈ സാഹചര്യത്തിലാണ് ഫെഡറൽ സർക്കകാർ പാൻഡമിക് ലീവ് ഡിസാസ്റ്റർ പേയ്മെന്റ് നൽകുന്നത്.
കൊവിഡ് ബാധിതരുമായി സമ്പർക്കത്തിൽ വന്നതുകൊണ്ടോ, ആരോഗ്യവകുപ്പ് ഉദ്യോഗസ്ഥർ നിർദ്ദേശിച്ചതുകൊണ്ടോ 14 ദിവസത്തെ ഐസൊലേഷനിൽ പോകേണ്ടി വരുന്നവർക്കാണ് ഈ സഹായം നൽകുക.
അവർക്ക് സിക്ക് ലീവ് ഇല്ലെങ്കിൽ രണ്ടാഴ്ചയിൽ 1,500 ഡോളറാണ് പാൻഡമിക് ലീവ് ഡിസാസ്റ്റർ പേയ്മെന്റായി ലഭിക്കുക.
താൽക്കാലിക വിസകളിലുള്ള, മറ്റ് സർക്കാർ ആനുകൂല്യങ്ങളൊന്നും ലഭിക്കാത്തവരെ ലക്ഷ്യമിട്ടാണ് പ്രധാനമായും ആനുകൂല്യമെന്ന് പ്രധാനമന്ത്രി പറഞ്ഞു.
അതായത്, താൽക്കാലിക തൊഴിൽ വിസകളിൽ ഓസ്ട്രേലിയയിലുള്ളവർക്കും ഐസൊലേഷനിൽ പോകേണ്ടിവന്നാൽ, മെഡിക്കൽ ലീവ് ഇല്ലെങ്കിൽ ഈ ആനുകൂല്യത്തിനായി അപേക്ഷിക്കാം.
ഒന്നിലേറെ തവണ ഐസൊലേഷനിൽ പോകേണ്ടിവരുന്നവർക്ക് ഓരോ തവണയും ഇതിനായി അപേക്ഷിക്കാം.
ദുരന്ത സമയത്തെ മറ്റ് സാമ്പത്തിക സഹായങ്ങൾ പോലെ, മൊബൈൽ ഫോൺ വഴി ഇതിനായി അപേക്ഷിക്കാമെന്നും, വേഗത്തിൽ ഇത് ലഭ്യമാകുമെന്നും പ്രധാനമന്ത്രി അറിയിച്ചു.
180 22 66 എന്ന നമ്പരിൽ വിളിച്ച് ഇതിനായി അപേക്ഷിക്കാം
ഐസൊലേഷനിൽ പോകുന്ന സമയത്ത് മറ്റ് വരുമാനം ലഭ്യമില്ലാത്തവർക്കാണ് ഇത് ലഭിക്കുക.
അതായത്, ജോബ് കീപ്പറിലും, ജോബ് സീക്കറിലുമുള്ളവർക്ക് ഐസൊലേഷൻ സമയത്തും അത് ലഭിക്കുന്നുണ്ടാകും.
എന്നാൽ മറ്റുള്ളവർക്ക് മെഡിക്കൽ ലീവ് ഇല്ലെങ്കിൽ വരുമാനമുണ്ടാകില്ല.
കൊവിഡ് സ്ഥിരീകരിച്ചവർക്ക് വിക്ടോറിയ സർക്കാർ നേരത്തേ പ്രഖ്യാപിച്ച 1,500 ഡോളർ സഹായത്തിന്റെ അതേ മാനദണ്ഡങ്ങളാകും ഇതിനും ബാധകം.
സാധാരണ രീതിയിൽ ഫെഡറൽ സർക്കാരിന്റെ സാമ്പത്തികസഹായങ്ങളൊന്നും ലഭിക്കാത്തവരാണ് താൽക്കാലിക വിസയിലുള്ളവർ. കൊറോണക്കാലത്തും സർക്കാർ പ്രഖ്യാപിച്ച പദ്ധതികൾ താൽക്കാലിക വിസകളിലുള്ളവർക്ക് ലഭിച്ചിരുന്നില്ല.
താൽക്കാലിക വിസകളിലുള്ളവർക്ക് വിക്ടോറിയൻ സർക്കാരും, ഓസ്ട്രേലിയക്കാർക്ക് ഫെഡറൽ സർക്കാരുമാകും ഈ സഹായം നൽകുക.
വിക്ടോറിയയിൽ മാത്രമാണ് ഇപ്പോൾ ഈ പദ്ധതി നടപ്പാകുക എന്നും പ്രധാനമന്ത്രി പറഞ്ഞു. ദുരന്തസാഹചര്യം പ്രഖ്യാപിച്ചതുകൊണ്ടാണ് ഈ ഡിസാസ്റ്റർ ആനുകൂല്യം നൽകുന്നത്.
വിക്ടോറിയയിൽ ഭൂരിഭാഗം ചെറുകിട വ്യാപാരസ്ഥാപനങ്ങളും, മറ്റ് നിരവധി വ്യവസായങ്ങളും അടച്ചിടുമെന്ന് സംസ്ഥാന സർക്കാർ പ്രഖ്യാപിച്ചിരുന്നു. ലക്ഷക്കണക്കിന് പേർക്കാും ഇതിലൂടെ ജോലിയിൽ നിന്ന് മാറി നിൽക്കേണ്ടി വരുന്നത്.
People in Australia must stay at least 1.5 metres away from others. Check your state’s restrictions on gathering limits.
If you are experiencing cold or flu symptoms, stay home and arrange a test by calling your doctor or contact the Coronavirus Health Information Hotline on 1800 020 080.
