គណៈរដ្ឋមន្រ្តីជាតិបានគាំទ្រវិធានការណ៍ធ្វើដំណើរអន្តរជាតិនិងក្នុងស្រុកថ្មីៗ ដើម្បីពង្រឹងការការពារកូវិដ-១៩ ជាកិច្ចឆ្លើយតបទៅនឹងការគំរាមកំហែងកាន់តែខ្លាំងឡើងៗនៃវីរុសកូរ៉ូណាអំបូរចក្រភពអង់គ្លេសដែលឆ្លងជាខ្លាំង។
ទីក្រុងប្រ៊ីសបេន (Greater Brisbane) ក៏ត្រូវបានគេប្រកាសថាជាចំណុចក្តៅ "Hotspot" នៅកម្រិតថ្នាក់ជាតិ បន្ទាប់ពីអ្នកបោសសំអាតម្នាក់បានធ្វើតេស្តវិជ្ជមានសម្រាប់វីរុសដែលបម្លែងខ្លួនថ្មីនេះ ដែលធ្វើឲ្យទីក្រុងនេះធ្លាក់ចូលទៅក្នុងការបិទទ្វារlockdownរយៈពេលបីថ្ងៃ។
នៅក្រោមការផ្លាស់ប្តូរទាំងនេះ អ្នកដំណើរដែលហោះហើរចូលក្នុងប្រទេសអូស្ត្រាលីត្រូវតែបង្ហាញនូវលទ្ធផលតេស្តអវិជ្ជមាន កូវីដ-១៩ នៅមុនពេលចេញដំណើរ ហើយចំនូនកំណត់ក្នុងការទទួលអ្នកដំណើរវិលត្រឡប់ចូលស្រុកវិញក៏ត្រូវបានកាត់បន្ថយផងដែរ។
អ្នកដំណើរនៅលើជើងហោះហើរពីចក្រភពអង់គ្លេសក៏នឹងត្រូវឆ្លងកាត់ការធ្វើតេស្តយ៉ាងឆាប់រហ័សសម្រាប់អំបូរនៃមេរោគកូរ៉ូណាថ្មីនេះ មុនពេលពួកគេឡើងយន្តហោះត្រឡប់មកប្រទេសអូស្រ្តាលីវិញ។
ម៉ាសនឹងត្រូវតែពាក់ជាកំហិត សម្រាប់អ្នកដំណើរនៅលើជើងហោះហើរទាំងក្នុងស្រុក និងក្រៅប្រទេស និងនៅក្នុងអាកាសយានដ្ឋានក្នុងស្រុកនៅក្នុងប្រទេសអូស្ត្រាលីផងដែរ ដោយមិនរាប់បញ្ចូលក្មេងៗអាយុ ១២ ឆ្នាំចុះនោះទេ ហើយក៏មានការណែនាំឲ្យពាក់ម៉ាសនៅក្នុងអាកាសយានដ្ឋាននៅក្រៅប្រទេសផងដែរ។
លោកម៉ូរីសុន បានមានប្រសាសន៍ថា “ វីរុសនេះបន្តសរសេរច្បាប់របស់ខ្លួនឯង ហើយនោះមានន័យថា យើងត្រូវតែបន្តសម្របខ្លួនតាមរបៀបដែលយើងបន្តប្រយុទ្ធប្រឆាំងនឹងវា” ។
វានឹងមានការលើកលែងមួយចំនួនចំពោះតម្រូវការធ្វើតេស្តដូចជា កម្មករតាមរដូវពីប្រទេសដែលមានហានិភ័យទាប ដែលនៅទីនោះលទ្ធភាពនៃការធ្វើតេស្តនៅមានកម្រិត ដែលផ្ទុយទៅវិញពួកគេនឹងត្រូវឆ្លងកាត់ការត្រួតពិនិត្យ "ដែលសមស្រប" ។
ការកំណត់ចំនួនអ្នកវិលត្រឡប់មកពីបរទេសវិញនឹងត្រូវកាត់បន្ថយរហូតដល់ខែកុម្ភៈ
ការកំណត់ចំនួនប្រជាជនដែលវិលត្រឡប់ចូលមកក្នុងប្រទេសអូស្ត្រាលីវិញ ត្រូវបានកាត់បន្ថយចំនួន ៥០ ភាគរយ នៅរដ្ឋញូវសៅវែល រដ្ឋអូស្រ្តាលីខាងលិច និងរដ្ឋឃ្វីនឡែន។
ចំនួនកំណត់ថ្មីនៅរដ្ឋញូវសៅវែលនឹងធ្លាក់ចុះមកនៅ ១.៥០៥ នាក់ក្នុងមួយសប្តាហ៍ នៅរដ្ឋអូស្ត្រាលីខាងលិច ៥១២ នាក់ក្នុងមួយសប្តាហ៍ និងនៅរដ្ឋឃ្វីនឡែន ៥០០ នាក់ក្នុងមួយសប្តាហ៍។
រដ្ឋវិចថូរៀក៏នឹងបន្តទទួលយកប្រជាជនត្រឡប់ចូលស្រុកវិញចំនួន ៤៩០ នាក់ក្នុងមួយសប្តាហ៍ដដែល បន្ទាប់ពីរដ្ឋនេះបានកាត់បន្ថយកាលពីលើកមុនរួចហើយ ក្រោយពីមានរលកទីពីរនៃវីរុសកូរ៉ូណានៅក្នុងរដ្ឋ។
គណៈរដ្ឋមន្រ្តីជាតិបានយល់ស្របលើការកាត់បន្ថយនេះ រហូតដល់ថ្ងៃទី ១៥ ខែកុម្ភៈ នៅក្នុងកិច្ចប្រជុំរបស់មេដឹកនាំរដ្ឋនិងដែនដីកាលពីថ្ងៃសុក្រ។
លោក Morrison បានមានប្រសាសន៍ថា ៨០ ភាគរយនៃប្រជាជនអូស្រ្តាលីដែលបានចុះឈ្មោះនៅក្រៅប្រទេស ឥឡូវនេះស្ថិតនៅក្នុងប្រទេសដែលវីរុសនេះមានការប្រែប្រួលថ្មី។
លោកបានមានប្រសាសន៍ថា“ មានភាពមិនច្បាស់លាស់ និងភាពមិនប្រាកដប្រជាជាច្រើនទាក់ទងនឹងអំបូរថ្មីនេះ ដូច្នេះហើយទើបយើងជឿថា វិធីសាស្រ្តបង្ការទុកជាមុននេះគឺសមរម្យណាស់” ។
ប្រធានមន្រ្តីវេជ្ជសាស្រ្ត លោក Paul Kelly បានមានប្រសាសន៍ថា ការឆ្លើយតបដ៏“តឹងរឹង និងរហ័ស និងខ្លាំងក្លា” គឺសំដៅឆ្ពោះទៅរកហានិភ័យដែលបង្កឡើងដោយវីរុសកូរ៉ូណាថ្មីដែលឆ្លងបានយ៉ាងលឿននេះ។
លោកបានមានប្រសាសន៍ថា“ បញ្ហាចំបងរបស់យើងគឺរក្សាប្រជាជនអូស្រ្តាលីឱ្យមានសុវត្ថិភាព ហើយត្រូវប្រាកដថា អំបូរវីរុសនេះមិនមែនជាអំបូរដែលនឹងចរាចរនៅក្នុងប្រទេសអូស្ត្រាលីទេ” ។
“មូលហេតុគឺដោយសារថា វានឹងកាន់តែពិបាកគ្រប់គ្រង”។
រាល់បុគ្គលិកកម្មករដែលធ្វើការនៅកន្លែងធ្វើចត្តាឡីស័កទាំងអស់ ពីពេលនេះទៅ នឹងត្រូវធ្វើតេស្តជារៀងរាល់ថ្ងៃផងដែរ។
ក្រុមអាកាសយានិកអន្តរជាតិ ត្រូវតែឆ្លងកាត់ការធ្វើតេស្តកូវីដនៅអូស្ត្រាលីរៀងរាល់ ៧ ថ្ងៃម្តង ឬនៅពេលមកដល់ ហើយនឹងត្រូវដាក់ឲ្យនៅដាច់ដោយឡែកពីគេនៅកន្លែងដែលបានរៀបចំទុក ក្នុងចន្លោះពេលនៃការហោះហើរនិមួយៗ។
បច្ចុប្បន្នមានប្រជាជនប្រមាណ ៣៨.០០០ នាក់ហើយដែលបានចុះឈ្មោះជាមួយក្រសួងការបរទេសនិងពាណិជ្ជកម្ម ដោយចង់វិលត្រឡប់មកពីបរទេសចូលស្រុកវិញ៕
