ကီၢ်ပယီၤကလုာ်ဒူၣ်လဲၤထီၣ်ပာ်ဖျါထီၣ်တၢ်ထီဒါပယီၤသုးမီၤစိရိၤဖဲကီၢ်အမဲရကၤဝ့ၢ်ခိၣ်

ဖဲအပူၤကွံာ်နွံကတၢၢ်အခါန့ၣ် ကလုာ်ဒူၣ်လၢအအိၣ်ဖဲကီၢ်အမဲရကၤအပူၤ ပၣ်ဃုာ်ကညီဖိသ့ၣ်တဖၣ် ပာ်ဖှိၣ်ထီၣ်အသးဒီး လဲၤပာ်ဖျါထီၣ် အဝဲသ့ၣ်တၢ်ထီဒါပယီၤသုးမီၤစိရိၤ တၢ်ဟံးန့ၢ်ဆူၣ်ထံကီၢ်တၢ်စိတၢ်ကမီၤပှဲၤထီၣ် ၂နံၣ် ဒီး တၢ်လဲၤပာ်ဖျါထီၣ်တၢ်ထီဒါတဘျီအံၤ မ့ၢ်စ့ၢ်ကီးတၢ်လဲၤဒုးသ့ၣ်ညါဘၣ်ထံဂုၤကီၢ်ဂၤ လီၤဆီဒၣ်တၢ် ကီၢ်အမဲရကၤပဒိၣ် လၢပယီၤသုးမီၤစိရိၤအံၤ သူဝဲဒၣ် ကဘီယူၤ ဟးခးလီၤတၢ် မၤဘၣ်ဒိဘၣ်ထံးကမျၢၢ်ဒူသဝီအဃိ အဲၣ်ဒိးလၢ ထံဂုၤကီၢ်ဂၤပှၤဘၣ်မူဘၣ်ဒါသ့ၣ်တဖၣ် ကဟံးဂ့ၢ်ဝီဝဲဒၣ် ပယီၤသုးဘၣ်ဃးအဝဲသ့ၣ်တၢ်မၤတၢ်စုဆူၣ်ခီၣ်တကးသ့ၣ်တဖၣ်အံၤန့ၣ်လီၤ.

"End deadly air strike" poster seen at Myanmar ethnic group in US march against Burmese military dictatorship in DC. Source: Saw Greh Moo

လၢန့ၣ်အမဲာ်ညါ ကလုာ်ဒူၣ်သ့ၣ်တဖၣ်ဃ့ထီၣ်စ့ၢ်ကီးလၢ ကီၢ်အမဲရကၤ ကမၤဆူၣ်ထီၣ်က့ၤ အတၢ်ဟ့ၣ်လီၤတၢ်မၤစၢၤဆူကီၢ်ပယီၤပှၤဘၣ်ကီဘၣ်ခဲသ့ၣ်တဖၣ်အဂီၢ်န့ၣ်လီၤ.

ဘၣ်ဃးတၢ်ဂ့ၢ်အံၤလီၤတံၢ်လီၤဆဲးန့ၣ် အဲးစ်ဘံအဲးစ်ကညီကျိာ်တၢ်ရဲၣ်တၢ်ကျဲၤ ဆဲးကျိးသံကွၢ်ဝဲဒၣ် ကီၢ်အမဲရကၤကညီကရၢ နဲၣ်ရွဲၣ် သရၣ်စီၤကြဲၢ်မူ လၢအမ့ၢ်စ့ၢ်ကီးပှၤလဲၤပာ်ဖျါထီၣ်တၢ်ထီဒါပယီၤသုးမီၤစိရိၤသ့ၣ်တဖၣ်အကျါတဂၤန့ၣ်လီၤ.