တၢ်ဆးစဲးစုသ့တၢ်မၤလိလၢကညီပိာ်မုၣ်သ့ၣ်တဖၣ်အဂီၢ်

ကညီတဝၢလၢအအိၣ်ဖဲမဲလ်ဘၢဝ့ၢ်မုၢ်နုၤတကပၤ အိးထီၣ်ဝဲတၢ်ဆးစဲးတၢ်မၤလၢတၢ်ဆးလိတၢ်ကူတၢ်သိးသ့ၣ်တဖၣ်အဂီၢ် ဒ်သိးဒီးအမ့ၢ်စ့ၢ်ကီးတၢ်ဒုးအိၣ်ထီၣ်တၢ်ဟူးတၢ်ဂဲၤလၢ တၢ်ဘျးစဲဒီးပှၤတဝၢအဂီၢ်န့ၣ်လီၤ။

ကညီတ၀ၢတၢ်ဆးစဲးအတၢ်မၤလိ

သရၣ်မုၣ်နါမံၣ်နွဲၣ်စါ လၢအနီၣ်ကစၢ်ဒၣ်ဝဲ မၤလိသ့စ့ၢ်ကီးအသးလၢတၢ်ဆးလိစဲးအံၤ စံးဝဲပှၤဟဲမၤလိတၢ်ဖိသ့ၣ်တဖၣ် တၢ်ပာ်ပနီၣ်အသးနံၣ်တအိၣ်ဘၣ်အသိး တမ့ၢ်ထဲလၢကညီကလုာ်သ့ၣ်တဖၣ်အဂီၢ်ဘၣ်။ နီၣ်နီၣ်တခီ ပၣ်ဃုာ်စ့ၢ်ကီးပှၤဟဲန့ၢ်လၢ ကီၢ်ပယီၤကလုာ်ဒူၣ်အဂုၤအဂၤ လၢအပၣ်ဃုာ် ရၢၢ်ခၢၣ်၊ ပယီၤဒီး ခၠီကလုာ်ဒူၣ်သ့ၣ်တဖၣ်စ့ၢ်ကီးန့ၣ်လီၤ။

အဝဲစံးဝဲဒၣ် တၢ်မၤလိတၢ်ဆးလိစဲးအံၤ ဘၣ်တၢ်ရဲၣ်ကျဲၤဟ့ၣ်လီၤဝဲဒၣ်အီၤ ၂သီ လၢအမ့ၢ်ဖဲမုၢ်လ့ၢ်ဧိၤအနံၤ (မုၢ်လွံၢ်နံၤ) ဒီး မုၢ်ဘူၣ်အနံၤ (မုၢ်ဃုနံၤ) န့ၣ်လီၤ။ မ့မ့ၢ်တၢ်သိၣ်လိလၢတၢ်ဟ့ၣ်လီၤအီၤဖဲ မုၢ်လွံၢ်နံၤန့ၣ် ညီနုၢ်န့ၢ်မ့ၢ်ဝဲဒၣ်လၢ ပှၤပိာ်မုၣ်ပှၢ်သ့ၣ်တဖၣ်အဂီၢ် ဒီး မ့မ့ၢ်လၢ မုၢ်ဃုနံၤန့ၣ် မ့ၢ်ဝဲဒၣ်လၢ ပိာ်မုၣ်သးစၢ်သ့ၣ်တဖၣ်အဂီၢ်န့ၣ်လီၤ။ တၢ်နီၤဖးလီၤ ပှၤမုၢ်ပှၢ်ဒီး ပိာ်မုၣ်သးစၢ်သ့ၣ်တဖၣ် အတၢ်မၤလိတၢ်ရဲၣ်တၢ်ကျဲၤအံၤ ခီဖျိလၢ မုၢ်ဆၣ် တုၤလၢ မုၢ်ဖီဖးအနံၤန့ၣ် ပှၤသးစၢ်သ့ၣ်တဖၣ် အါတက့ၢ် ဘၣ်ထီၣ်ကၠိအဃိန့ၣ်လီၤ။