Brisbane Karen Language School Students. Sources: AKO Queensland
ဘီမုၢ်စၢဖှိၣ်ကရၢ တၢ်ကူၣ်ဘၣ်ကူၣ်သ့, စဲအ့ၣ်ဒီး တၢ်ဆဲးတၢ်လၤကရၢ (UNESCO) လီပှာ်ယဲၤသန့အပူၤန့ၣ်ပာ်ဖျါဝဲဒၣ်လၢ တနံၣ်အံၤ ၂ဝ၂၄နံၣ် တၢ်မၤလၤကပီၤ ဟီၣ်ခိၣ်ဘီမုၢ်ကျိာ်မိၢ်ပှၢ်အမုၢ်နံၤ အခိၣ်တီန့ၣ်မ့ၢ်ဝဲဒၣ် “Multilingual education is a pillar of intergenerational learning” န့ၣ်လီၤ.
ဘီမုၢ်စၢဖှိၣ်ကရၢ တၢ်ကူၣ်ဘၣ်ကူၣ်သ့, စဲအ့ၣ်ဒီး တၢ်ဆဲးတၢ်လၤကရၢ (UNESCO) စံးဝဲဒၣ် တုၤလီၤဖဲမုၢ်မဆါတနံၤအံၤန့ၣ် ဖိသၣ်ဒီး သူၣ်စၢ်သးဘိၣ် အကကွဲၢ် ၂၅ဝ သ့ၣ်တဖၣ် တန့ၢ်ထီၣ်ဘၣ်ကၠိဘၣ်ဒီး ပှၤဒိၣ်တုၤခိၣ်ပှဲၤ အကကွဲၢ် ၇၆၃ဂၤ တသ့လံာ်သ့လဲၢ်ဘၣ်န့ၣ်လီၤ. ကျိာ်မိၢ်ပှၢ်တၢ်ကူၣ်ဘၣ်ကူၣ်သ့န့ၣ် ဆီၣ်ထွဲဝဲဒၣ် တၢ်မၤလိ, တၢ်သ့လံာ်သ့လဲၢ်ဒီး ကဲထီၣ်တၢ်န့ၢ်ဘျုးန့ၢ်ဖှိၣ်လၢသ့အါထီၣ်ကျိာ်သ့ၣ်တဖၣ်န့ၣ်လီၤ.
ဒ်သိးကညီဖိလၢအဟဲတုၤအိၣ်ဆိးဖဲအီစထြ့လယါကီၢ်ပူၤသ့ၣ်တဖၣ်အသု တသးပ့ၤနီၣ်ကွံာ် ကညီကျိာ်တဂ့ၤ, ကညီဖိလၢအအိၣ်ဖျဲၣ်ထီၣ်ဒီး အဟဲဒိၣ်ထီၣ်ဖဲအီစထြ့လယါကီၢ်ပူၤသ့ၣ်တဖၣ် ကသ့ကတိၤက့ၤကညီကျိာ်, ပာ်ဒိၣ်က့ၤကညီကျိာ်တၢ်ဆဲးတၢ်လၤအဂီၢ် ကညီတဝၢလၢအအိၣ်သကုၤ အီစထြ့လယါကီၢ်စဲၣ်သ့ၣ်တဖၣ် အိၣ်ဒီးတၢ်ရဲၣ်တၢ်ကျဲၤအအိၣ်ဒီး ကညီတဝၢကၠိသ့ၣ်တဖၣ်န့ၣ်လီၤ.
အီစထြ့လယါကီၢ်ပူၤ တၢ်မၤလိကညီကျိာ်ကၠိအကျါန့ၣ် ပၣ်ဃုာ်စ့ၢ်ကီးဒီး ကညီဖိလၢအဟဲတုၤအိၣ်ဆိးဖဲ ဘြံၣ်စဘဲဝ့ၢ်, ခွံစလဲကီၢ်စဲၣ်အပူၤ သ့ၣ်တဖၣ်စ့ၢ်ကီးန့ၣ်လီၤ.
Karen Language School in Brisbane opening ceremony. Sources: AKO Queensland
သရၣ်မုၣ် မုၣ်က့ၤတူၣ်စ့ၣ် လၢအမ့ၢ်ခွံစလဲကလံၤထံးကညီကၠိခိၣ်စံးဝဲဒၣ် အဝဲသ့ၣ်ကၠိန့ၣ်အိၣ်ဝဲဒၣ် ကလံၤထံးတကပၤဒီးကလံၤစိၤတကပၤ နာ်သက့ ဘၣ်တၢ်တီခိၣ်ရိၤမဲအီၤလၢကမံတံာ်တဖုဃီ လၢအအိၣ်ဝဲဒၣ်ဖဲအီစထြ့လယါကညီကလုာ်ကရၢ — အ့ၣ်ခ့ၣ်အိၣ် တၢ်တီခိၣ်ရိၤမဲအဖီလာ်န့ၣ်လီၤ.
