ကီၢ်ယူရပၤကညီပှာ်ဘျးစဲပာ်တၢ်ကမၣ်လၢကၠီၣ်တဲၣ်ပဒိၣ်အလိၤမ့ၢ် လၢအဆှၢက့ၤဆူၣ်ကညီဘၣ်ကီဘၣ်ခဲဆူတၢ်သဘံၣ်သဘုၣ်အပူၤ

ဖဲလါအီးကထိဘၢၣ် ၄သီအနံၤန့ၣ် ကီၢ်ယူရပၤကညီပှာ်ဘျးစဲ - European Karen Network ထုးထီၣ်ဘိးဘၣ်ရၤလီၤလၢ အဝဲသ့ၣ်ပာ်ဒ့ၣ်ပာ်ကမၣ်ဒီး ထီဒါဝဲကီၢ်ကၠီၣ်တဲၣ်ပဒိၣ် ခီဖျိလၢကၠီၣ်တဲၣ်ပှၤဘၣ်မူဘၣ်ဒါသ့ၣ်တဖၣ် ဆှၢက့ၤဆူၣ်ကညီဘၣ်ကီဘၣ်ခဲ လၢအဃ့ၢ်တၢ်ဒုးတၢ် ယၤ သ့ၣ်တဖၣ် က့ၤကဒါဆူကီၢ်ပယီၤပူၤအဃိန့ၣ်လီၤ။

ကၠီၣ်တဲၣ်သုးပှၤဘၣ်မူဘၣ်ဒါသ့ၣ်တဖၣ်ဆှၢက့ၤဆူၣ်ကညီဘၣ်ကီဘၣ်ခဲ

ကရၢအံၤတၢ်ထုးထီၣ်ရၤလီၤအပူၤန့ၣ် ပာ်ဖျါဝဲလၢ ဖဲ ၂ဝ၂၂နံၣ်လါစဲးပထ့ဘၢၣ် အသီ ၂ဝန့ၣ် ကၠီၣ်တဲၣ်ပှၤဘၣ်မူဘၣ်ဒါသ့ၣ်တဖၣ် ဆှၢက့ၤဆူၣ်ကွံာ် ကညီကၠိဖိလၢအဟဲဃ့ၢ်အိၣ်ကဒုဖဲကီၢ်ကၠီၣ်တဲၣ်ဒီးကီၢ်ပယီၤကီၢ်ဆၢ လၢအမ့ၢ်ဖဲကၠီၣ်တဲၣ်ကီၢ်ပူၤတပၤန့ၣ်လီၤ။ ဖဲကၠိဖိသ့ၣ်တဖၣ်က့ၤခီဃီၤသူမွဲကျိ လၢအဒိၣ်ထီၣ်အကတီၢ်အခါ ချံကဒဲကဒဲဘၣ်ထံးလိာ်အသးဒီးဘူးထီၣ်လၢကလီၤတကျၢၢ်အဃိ ကၠိဖိသ့ၣ်တဖၣ် ဘၣ်ပှီၢ်ထံဒီးမၤပူၤဖျဲးလီၤအဝဲသ့ၣ်အနီၣ်ကစၢ်သးသမူဒၣ်ဝဲန့ၣ်လီၤ။ ဖဲတၢ်ထုးထီၣ်ရၤလီၤအပူၤန့ၣ်စံးစ့ၢ်ကီးဝဲဒၣ်လၢ ခီဖျိလၢတၢ်လဲၤခီဖျိအံၤအဃိ ကၠိဖိသ့ၣ်တဖၣ်အိၣ်တ့ၢ်က့ၤဒီးတၢ်ပျံၤတီၢ်တၢ်နးနးကလဲာ်န့ၣ်လီၤ။

စးထီၣ်ဖဲ ၂ဝ၂၁ လါဖ့ၤဖြူၤအါရံၤ ၁ သီ ပယီၤသုးဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤဝံၤအလီၢ်ခံ တၢ်ဒုးတၢ်ယၤသ့ၣ်တဖၣ်ဟဲအါထီၣ်ဆူၣ်ထီၣ် လီၤဆီဒၣ်တၢ်ဖဲ ကညီကီၢ်စဲၣ်ဒီးကရ့ၣ်နံၣ်ကီၢ်အပူၤ တၢ်ဒုးတၢ်ယၤသ့ၣ်တဖၣ်ဆူၣ်မးဒီး ကမျၢၢ်လၢအကလးအါမး ဘၣ်ပာ်တ့ၢ်ကွံာ်ဟံၣ်ဃီ တၢ်အိၣ်တၢ်ဆိးအလီၢ်ဒီး ဃ့ၢ်ပူၤဖျဲးအသးဆူခိခိၣ်ပှၢ်လၢ်ကျါ ဒီး တနီၤလၢအဘူးဒီးထံဆၢကီၢ်ဆၢသ့ၣ်တဖၣ်န့ၣ် ဃ့ၢ်ခီဃီၤဝဲဒၣ်ဆူ ကီၢ်အဂၤတဘ့ၣ်အပူၤန့ၣ်လီၤ။

ကညီဒူသ၀ီဖိလၢအဃ့ၢ်နုာ်အိၣ်ကဒုဖဲကၠီၣ်ကီၢ်တၢ်ပၢအပူၤသ့ၣ်တဖၣ် ကၠီၣ်တဲၣ်ပဒိၣ်ဆီၣ်သနံးအဝဲသ့ၣ် ဒီးအမၢအဝဲသ့ၣ်က့ၤနုာ်ကဒါက့ၤဆူ ကီၢ်ပယီၤအပူၤ ထီဘိန့ၣ်လီၤ။ ပယီၤသုးတၢ်ထီၣ်ဒုးဖဲကလုာ်ဒူၣ်တၢ်ပၢသ့ၣ်တဖၣ်အပူၤန့ၣ် မ့ၢ်တၢ်လၢအဆူၣ်မး လၢအသူစ့ၢ်ကီး ကဘီယူၤ ဟဲတ့ၢ်လီၤမ့ၢ်ပိၢ်ဖဲဒူသဝီအပူၤန့ၣ်လီၤ။

ဒူသဝီဖိလၢအဃ့ၢ်ပူၤဖျဲးအသး လၢအပၣ်ဃုာ်ဖိသၣ် သးပှၢ် မိၢ်ဒၢဒီး ပှၤဆူးပှၤဆါသ့ၣ်တဖၣ် ဘၣ်သဂၢၢ်ဒီး တၢ်ကီတၢ်ခဲအကလုာ်အါမး ဒ်အမ့ၢ် တၢ်အီၣ်တအီဒီး ကသံၣ်ကသီ တကူတယၢဘၣ် ဒီး တနီၤန့ၣ် ဘၣ်ဃ့ၢ်ပူၤဖျဲးစ့ၢ်ကီးအသးလၢထံဒိၣ်ထီၣ်ဖဲတၢ်စူၤထံအါအခါန့ၣ်လီၤ။