ဖဲလါအီးကထိဘၢၣ် ၂၇သီအနံၤန့ၣ် Karen Peace Support Network (KPSN) ကညီဆီၣ်ထွဲတၢ်မုာ်တၢ်ခုၣ်ပှာ်ဘျးစဲ မၤဝဲ တၢ်ဘိးဘၣ်သ့ၣ်ညါလီၤတၢ်ကစီၣ်တခါ လၢအမ့ၢ်ကညီတၢ်ကရၢကရိဖဲကီၢ်ပယီၤဒီးကီၢ်ကၠီၣ်တဲၣ်ကီၢ်ဆၢသ့ၣ်တဖၣ် အတၢ်လဲၤခီဖျိဘၣ်ဃး တၢ်ဟ့ၣ်နီၤလီၤဂ့ၢ်ဂီၢ်အူတၢ်မၤစၢၤဆူ ကီၢ်ပူၤပှၤဘၣ်ကီဘၣ်ခဲလၢအဘၣ်ဃ့ၢ်ပူၤဖျဲးအသးလၢ တၢ်ဒုးတၢ်ယၤသ့ၣ်တဖၣ်အဂ့ၢ်န့ၣ်လီၤ.
စးထီၣ်ဖဲ ၁၉၉၂နံၣ် တုၤလီၤဖဲ ၂ဝ၂ဝနံၣ်အတီၢ်ပူၤန့ၣ် ဂံၢ်ခီၣ်ကထံးကညီတၢ်ကရၢကရိလၢအအိၣ်ဖဲ ကီၢ်ဆၢသ့ၣ်တဖၣ် ဟ့ၣ်လီၤမၤစၢၤဘၣ်ဝဲဒၣ် ပှၤဘၣ်ကီဘၣ်ခဲလၢအအိၣ်ဖဲကီၢ်ပယီၤကလံၤထံးမုၢ်ထီၣ်တကပၤန့ၣ် အနီၣ်ဂံၢ်အိၣ်ဝဲဒၣ် ၁.၇ကကွဲၢ်ဃၣ်ဃၣ်န့ၣ်လီၤ. တၢ်မၤစၢၤသ့ၣ်တဖၣ် အါတက့ၢ်န့ၣ် မ့ၢ်ဝဲတၢ်အီၣ်မိၢ်ပှၢ် ဟုသး လၢအလီၤလၢဝဲ အမဲရကၤစ့ဒီၣ်လၣ် ၃၂ကကွဲၢ်န့ၣ်လီၤ.
