Tsis siv Australia cov 3G network ntxiv

Sai sai ntxiv no ces yuav tsis siv Australia cov 3G mobile phone network ntxiv lawm. Cov kev hloov muas siv dua cov 4G thiab 5G network no yuav ua rau muaj teeb meem rau leej twg thiab yuav ua li cas kom thiaj tau siv tej network tshiab?

Telstra signage seen at a work site in Sydney Credit: JOEL CARRETT/AAPIMAGE

Ntau hli ntxiv no ces yuav tsis siv Australia cov 3G mobile phone network ntxiv lawm thiab yuav los siv cov 4G thiab 5G network lawm xwb. Tab sis yuav ua rau tej neeg twg ntsib teeb meem thiab ho muaj cov kev pab cuam li cas?

Tim 31 lub 8 hli ntuj xyoo 2024 no ces Telstra yuav tsis siv nws cov 3G network lawm.

Optus los kuj yuav tsis siv rau lub 9 hli ntuj xyoo 2024 no, hos TPG thiab Vodafone ces yuav tsis siv rau lub 1 hlis ntuj (2024) no lawm.

Txawm li cas los Telstra thiab Optus yeej tau tsim cov texting services uas kom tej neeg ntau tus zauv ''3'' xa mus rau tus zauv (number) xov tooj 3498 mus txheeb seb puas yuav muaj teeb meem li cas rau tej xov tooj yus siv tawm sim no.

Telstra yeej tau qhia tias nws kuj yuav muab ib co xov tooj tshiab rau ib txhia neeg siv uas muaj cai tau tej xov tooj tshiab raws li qhov lawv nyiam thiab, piv txwv li tej neeg poob rau tej xwm txheej nyuaj, tej neeg txom nyem nyiaj txiaj, tej neeg ua lub neej nyob nrog ib tug mob uas yuav muaj tau kev phom sij rau nws txoj sia los yog tej neeg uas tseem tab tom ntxeem dhau tej xwm txheej ntuj tsim kev puas tsuaj (dej nyab, hav zoov kub hnyiab).

Graeme Hughes ntawm lub tuam chav qhia lagluam ntawm tsev kawm qib siab Griffith University hais tias tej tuam txhab lagluam muag xov tooj thiab internet rau tej neeg siv thiab tsoom fwv teb chaws yeej tsis tau kub siab nrog xyuas kom ua tib zoo qhia rau tej neeg kom paub txog cov kev hloov tej network qub mus siv dua tej network tshiab no raws li qhov tsim nyog li thiab.

Harvey Wright uas yog Optus tus coj los yeej tau qhia rau lub 5 hlis ntuj (2024) tias cov kev hloov no yuav tsis muaj teeb meem dab tsi rau Australia tej neeg nyob ntawm tej zos cheeb tsam tuaj ntug nroog los yog tej zos yaj sab uas tsuas siv tau tib co 3G network nkaus xwb thiab. Vim rau qhov nws yeej yuav ua tib zoo xyuas kom txog rau thaum siv tau cov 4G thiab 5G network tau zoo lawm los yog muaj siv lawm mas mam li tsis sis cov 3G network rau ntawm tej chaw ntawd lawm xwb.

Txawm li cas los tej zaum ntshe kuj yuav muaj teeb meem rau qee yam twj siv li security cameras, eftpost machines thiab tej tablets thiab.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.