Raws li tau muaj ib tsab ntawv cej luam tshiab ntawm lub koom haum Movember Institute of Men's Health qhia ces yeej tseem muaj ntau yam teeb meem ua rau tej txiv neej neeg tsiv teb tsaws chaw tsis tau txais kev noj qab nyob zoo.
Thiab lub koom haum no tseem txheeb tau ntxiv tias yog tias lawv nyob ntev npaum li cas ntawm Australia no ces yuav ua rau lawv tsis tau txais kev noj qab nyob zoo npaum li ntawd.
Buku Khamis uas yog ib tug neeg sib tw ncaw pob Australian Football League (AFL) rau pab Western Bulldogs ces yeej yog ib tug uas tau tsiv ntawm nws lub teb chaws South Sudan tuaj nyob ntawm Australia thaum nws muaj hnoob nyoog 6 xyoo, thiab tam sim no nws twb muaj hnoob nyoog 24 xyoos yeej paub zoo txog tej teeb meem uas ua rau tej txiv neej ntawm nws lub zejzog tsis qhib siab los tham txog tej teeb meem nyuaj siab ntxhov plawv.
Nws hais tias ''Vim peb raug cob qhia txawv, thiab yog cov neeg tsiv ntawm ib lub teb chaws mus nyob rau lwm lub teb chaws txawv, uas yeej tsis qhia kom peb ua cov neeg qhia qhov tseeb, thiab qhib siab tias peb xav li cas thaum tseem yau, ces thaum peb muaj hnoob nyoog lawm ces thiaj tsis tshua yooj yim rau peb tham txog tej teeb meem nyuaj siab ntxhov plawv.''
Raws li lub koom haum no cov kev teeb txheeb tau qhia ces yeej muaj tej txiv neej neeg Australia caj ceg neeg Africa txog li 77 feem pua tseem raug lwm tus nqau nqe yuam kev ces thiaj ua rau muaj teeb meem tsis tau txais kev noj qab haus huv rau lawv.
61 feem puas ntawm tej txiv neej neeg Australia caj ceg neeg Asia ces yog cov uas yeej tsis tshua mus ntsuam lawv tej mob, thiab yeej muaj tej txiv neej ntawm tej neeg coj ntseeg ntau yam kab lis kev cai thiab hais ntau hom lus txog li 70 feem pua yog cov tseem ntsib teeb meem ntau yam ua rau lawv tsis muaj peev xwm mus siv tau cov kev kho mob.
Tsab ntawv cej luam ntawm lub koom haum no tseem txheeb tau ntxiv tias tej txiv neej uas tsis hais lus Askiv ua thawj hom lus, uas tau cov humanitarian visas siv mas yog cov uas tseem yuav ntsib teeb meem nyuaj siab ntxhov plawv ntau dua thiab.
Yog li ntawd ces tej koom haum uas txhawb nqa thiab pab cuam kev kho mob rau tej neeg no thiaj nqua hu kom tsoom fwv tsim ib cov kev kho mob thiab ib cov kev taw qhia txog cov kev siv tej kev kho mob kom haum raws li tej neeg no tej kab lis kev cai coj los siv.
Tsis tas li ntawd los nws kuj tau nqua hu kom tsoom fwv tshwm nyiaj los ua cov kev teeb txheeb txog tej neeg coj ntseeg ntau yam kab lis kev cai tej kev kho mob thiab.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , ,
