Tej me nyuam yaus tsis muaj vaj tse nyob

Australia tej me nyuam thiab tej cuab yig uas tsis muaj vaj tse nyob.

First Nations children made up 32 per cent of homeless children nationally Source: Getty / catscandotcom

Lub koom haum Homelessness Australia hais tias muaj tej teeb meem tsis muaj vaj tse nyob phem tshaj qub ntxiv rau tej me nyuam thiab tej cuab yig rau lub limtiam neeg tsis muaj vaj tse nyob (Homelessness Week 5-11 lub 8 hli ntuj 2024) no lawm.

Ces thiaj ua rau muaj ntau caum txheeb tus me nyuam ntawm teb chaws Australia no tsis muaj peev xwm nrhiav tau ib qho chaw rau lawv nyob tom qab uas thov cov kev pab ntawm tej koom haum pab nrhiav tsev rau tej neeg tsis muaj vaj tse nyob.

Lub koom haum no thiaj hais tias tos muaj tej teeb meem neeg tsis muaj vaj tse nyob no los twb fim yog tsis tshwm nyiaj txaus los pab tsim tej vaj tse uas tej neeg muaj peev xwm ntiav tau los yog yuav tau nyob thiab tsis muaj tej neeg los ua hauj lwm pab nrhiav tsev rau tej neeg tsis muaj vaj tse nyob.

Tsis tas li ntawd los tej chaws so rau tej neeg tsis muaj vaj tse nyob yeej tsis tshua txais tej me nyuam yaus tib leeg uas tsis nrog ib tug niam tug txiv twg thiab.

Thiab muaj ntau yam laj thawj ua rau tej me nyuam yaus ras los ua tej neeg tsis muaj vaj tse nyob li vim ua tsis tsheej cuab tsheej yig, raug ib tug twg ua phem rau, raug tsis lees paub vim yog ib tug neeg LGBTQI+ los yog tsis muaj neeg kub siab txog ces thiaj ua rau tej me nyuam ras los ua cov neeg tsis muaj vaj tse nyob.

Ces thiaj pom tias Australia tej me nyuam neeg txum tim yog cov uas tsis muaj vaj tse nyob coob tshaj plaws yuav laug txog li ntawm ib feem peb ntawm tag nrho tej me nyuam uas tsis muaj vaj tse nyob.

Lub koom haum Homelessness Australia thiaj nqua hu kom npaj lub tswv yim First Nations Housing and Homelessness Plan coj los daws tej teeb meem uas pheej muaj Australia tej neeg txum tim tej me nyuam thiab tej cuab yig ua cov neeg tsis muaj vaj tse nyob.

Tsis tas li ntawd los kuj tau nqua hu kom tshwm nyiaj ntau tuaj ntxiv los pab tej neeg ua hauj lwm pab nrhiav vaj tse rau tej neeg tsis muaj vaj tse nyob.

Ces Clare O'Neil uas yog tus nom tswj cov hauj lwm vaj tse thiaj hais tias ''tsoom fwv yuav xub kub siab los daws cov teeb meem neeg tsis muaj vaj tse nyob no ua ntej, vim yeej paub tias tej vaj tse muaj tsis txaus nyob tau ua rau neeg Australia tau ras los ua tej neeg tsis muaj vaj tse nyob.''

loog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.