Ib lub hlis dhau los Brittany Higgins tau qhia txog nws cov kev raug lwm tus yuam deev thaum nws tseem ua hauj lwm hauv tsev tsoom fwv uas khaws cia tau los ntev.
Nyob rau hnub Monday, nws thiaj li tau rov qab mus rau hauv tsev tsoom fwv lub tiaj nyom mus hais lus rau tej poj niam mus koom cov kev tawm tsam
Txawm tias nws yeej tsis xav tias nws yuav mus hais lus los nws yuav tau mus hais lus raws li qhov tsim nyog thiab cia siab tias yuav pov puag tau lwm tus poj niam kom tsis txhob ntsib cov teeb meem kub ntxhov cuam tshuam txog cov kev raug lwm tus yuam deev.
Ms Higgins hais tias "Tos peb tuaj ntawm nod hnub no los vim peb yuav tsum tau tuaj ntawm no."
"Peb yeej paub tias tej kab ke (system) no siv tsis tau hauj lwm lawm, yeej tseem muaj ntau yam teeb meem tiv thaiv peb txoj xub ke kom peb ua tsis tau raws peb lub hom phiaj, thiab peb tej kev teeb tsa los yeej yeej tsis kub siab nrog xyuas kom tej neeg muaj fwj chim raws li qhov tsi nyog ntawm peb lub tsev tsoom fwv no thiab."
"Tos peb tuaj ntawm nod los vim peb piav tsis tau yooj yoom tias peb tseem tab tom yuav tau tawm tsam tej yam tsis zoo qub qub thiab yog tej yam peb nkees tawm tsam lawm".
Cov kev tawm tsam ntawd thiaj tau ua rau muaj tej chaw nthuav xov xwm coj tej xwm txheej no mus tshaj thiab nthuav tawm rau thawj nploog tau ntau limtiam txog cov lus iab liam cuam tshuam txog cov kev yuam lwm tus deev thiab tej pwm tsav tseem ceeb uas yeej tau muaj cov kev txhawj xeeb los ntev txog tej kev saib poj niam tsis rau nqi thiab tej kab lis kev cai ua hauj lwm ntawm tsev tsoom fwv.
Brittany Higgins speaks at the March4Justice event in Canberra. Source: AAP
Ms Higgins tau hais nws cov lus tias "Kuv raug ib tug neeg ua hauj lwm ua ke yuam deev hauv tsev tsoom fwv, thiab tau ntev heev lawm uas tej neeg ib puag ncig kuv tsuas kub siab txog tias kuv raug deev qhov twg xwb thiab ho txhais tau li cas rau lawv xwb."
"Yog tej yam sib cov kawg li vim tej neeg no yog ib co neeg kuv qog raws thiab saib lawv ua qauv piv txwv. Thiab kuv yeej muab lub neej txoj sia ua txhua yam rau lawv. Lawv yog tej neeg uas kuv tau koom nrog, lawv yog tej neeg kuv ua hauj lwm ua ke nrog thiab lawv yog kuv tsev neeg. Tab sis tib pliag ntshis xwb lawv txawm cia li tsis kub siab txog kuv lawm."
Cov kev rwg npoj March4Justice tau muaj rau hnub zwj Hli (Monday) raug teeb tsa rau lub caij uas Ms Higgins tau qhia tias nws raug ib tug txiv neej ua hauj lwm ua ke yuam deev rau lub 3 hlis ntuj xyoo 2019, thiab kuj tau muaj cov lus iab liam cuam tshuam txog Australia tus kws lij choj teb chaws Christian Porter uas muaj los ntev tab sis nws tsis lees.
Tab sis Ms Higgins tau hais tias nws zaj dab neeg yeej yog ib zaj dab neeg phem heev qhia rau tej poj niam tias "yog twb muaj tej teeb meem no tshwm sim tau ntawm tsev tsoom fwv lawm ces yeej muaj peev xwm tshwm sim tau rau txhua qhov chaw thiab."
Nyob rau lub caij uas lub tebchaws no lub tsev tsoom fwv tseem tsis tau muaj peev xwm los daws tej teeb meem no, ces kuj tau muaj ib tug neeg tawm tsam
Ces tam sim no tej poj niam thiab lawv tej phooj ywg thoob teb chaws thiaj hais tias "txaus dhau heev lawm thiab lawv yuav tsis zam rau tej teeb meem no ntxiv lawm."
Protests attend the Womens March 4 Justice Rally on 15 March, 2021 in Canberra. Source: Getty Images
Ntau txheeb tus neeg mus koom cov kev rwg npoj tawm tsam tshaj 40 cov kev tawm tsam thoob teb chaws Australia
Tau muaj ntau txheeb tus poj niam, txiv neej thiab me nyuam yaus tau mus rwg npoj nrog cov kev tawm tsam tshaj 40 cov thoob plaws teb chaws no, uas muaj tej nroog loj li Sydney, Melbourne, Adelaide thiab Hobart koom nrog tib si rau hnub Monday dhau los.
"Cov kev tawm tsam no" muaj lub hom phiaj xav qhia txog cov kev kub ntxhov uas pheej tsim rau tej poj niam ntawm teb chaws Australia. Nyob ntawm tuam ceeb Canberra, ces yeej tau muaj tej neeg kos xyeem mem tes txog 94,000 tug rau ib daim ntawv raug muab xa mus rau thawj pwm tsav Scott Morrison, thiab Pab nom Labor tus nom Tanya Plibersek nrog rau pab nom Greens tus nom Larissa Waters uas tau mus koom cov kev tawm tsam no yog 2 tug txais daim ntawv no.
Tsab ntawv muaj cov xyeem mem tes no hais kom yuav tsum tau los ua 4 yam kiag tam sim no xws li: yuav tsum teeb tsa ib pawg neeg nruab nrab mus tshuaj ntsuam xyuas txhua cov teeb meem tsim kev kub ntxhov rau tej poj niam, yuav tsum siv 55 cov lus tawm tswv yim uas Australia lub koom haum Human Rights Commission tau taw qhia rau nws tsab ntawv cej luam cam hwm tej neeg ntawm chaw ua hauj lwm uas qhia txog cov kev sib thab thiab yuam deev lwm tus (), pab nyiaj kom ntau tuaj ntxiv coj mus ua cov hauj lwm tiv thaiv kom txhob tsim kev kub ntxhov rau tej poj niam thiab yuav tsum tsim kom tau tsab cai Gender Equality Act uas siv tau thoob plaws teb chaws Australia coj los siv.
Thaum ntxov hnub zwj Hli (Monday) ntawd ces tej neeg npaj cov kev rwg npoj yeej tsis kam ua raws li Mr Morrison cov kev caw kom lawv mus ntsib nws hauv tsev tsoom fwv, tom qab nws tsis kam coj nws tus kheej tawm mus ntsib cov neeg tawm tsam ntawm Canberra kiag.
Greens senator Sarah Hanson-Young (R) hugs former government staffer Brittany Higgins (L) during the rally in front of Parliament House on 15 March, 2021. Source: AFP
Janine Hendry tau sau ib cov lus hauv nws phau Twitter account tias "Peb twb tuaj txog ntawm qhov rooj lawm, ces nyob ntawm seb tsoom fwv puas tuaj ntsib peb xwb. Peb yuav tsis mus ntsib nws hauv ib qhov chaw kaw rooj nti."
"Muaj tej poj niam coob tshaj 100,000 tus thiab lawv tej phooj ywg ntawm ntau cov koom haum sib txawv thiab ua hauj lwm ntau yam hauj lwm yeej tau tuaj tawm tsam thiab tuaj nrog hais. Thiab lawv nug tias, cov kev sib tham es tsuas pub 3 tug poj niam mus tham xwb yeej daws tsis tau tej teeb meem no puas yog mas?''
Ces tom qab ntawd Mr Morrison thiaj raug lwm tus nom nug thaum tsev tsoom fwv nug lus nug tias yog vim li cas nws thiaj tsis kam tawm mus koom tej neeg tawm tsam? Ces nws tau teb nws cov lus xub tawm tswv yim dhau los tias nws yeej zoo siab ntsib tej neeg npaj cov kev tawm tsam no ntawm ib qho chaw ntiag tug.
Nws tau hais tias "Tsim nyog lawv yuav tsum xa cov neeg sawv cev uas mus koom cov kev rwg npoj thoob plaws teb chaws no nrog kuv tham. Kuv yeej zoo siab yuav ntsib lawv hauv kuv lub chaw ua hauj lwm."
"Lub tswv yim xav ntsib lawv no yeej muaj lub hom phiaj zoo thiab kuv yeej cam hwm lawv txoj cai uas tsis kam ua raws li kuv tau caw lawv, thiab kuv yeej tau ua tib zoo npaj kom zoo npaum li qhov zoo tau ntawm qhov chaw no los tham txog tej teeb meem no uas kuv tau qhia rau lwm tus los yog qhia rau tej neeg uas tuaj koom cov kev tawm tsam no. Tab sis tiag tiag ces kuv yeej zoo siab rau lub cib fim no thiab npaj ntsoov yuav mloog lawv tej teeb meem uas lawv muaj peev xwm tham ncaj qha rau kuv kiag."
Anthony Albanese uas yog tus coj pab nom Labor los kuj tau mus koom cov kev rwg npoj no nrog nws ib cov leeg ua hauj lwm ua ke, nrog rau tej nom ntawm pab nom Greens, thiab cov nom ywj pheej, thiab txog li ntawm 15 tug nom sawv cev rau pej xeem (nom kis xeev qes - Member of Parliament - MP) los yog cov nom kis xeev siab (Senators) thiab.
Sarah Henderson uas yog ib tug nom kis xeev siab ntawm pab nom Liberal los kuj yog ib tug tau mus koom nrog tej nom no thiab.
Nws tau qhia rau SBS News tias "Txoj kev nyab xeeb rau tej poj niam ntawm txhua cov chaw ua hauj lwm thoob plaws teb chaws Australia yog tej yam tseem ceeb - suav tsev tsoom fwv nrog tib si - tej no yog tej yam tseem ceeb heev."
Ms Plibersek tau qhia rau SBS News rau lub caij ntawd tias xav kom hloov tej kab lis kev cai ua hauj lwm thiab.
Member for Denison Andrew Wilkie holds up a sign reading "Enough is enough!" during Question Time in the House of Representatives on 15 March, 2021 Source: Getty Images AsiaPac
Nws hais tias "Hnub no tej poj niam yeej tab tom qhia lawm tias txaus dhau heev lawm yuav tau xaus tej teeb meem no. Txog caij lawm yuav tau kho tej cai, thiab txog caij lawm yuav tau hloov tej kab lis kev cai lawm."
Tab sis Ms Waters tau hais tias ntshe tseem yuav tsis tau muaj peev xwm xaus tau cov kev tawm tsam no yooj yim.
"Peb tseem tsis tau tag kev cia siab...thiab tseem yuav tawm tsam txuas ntxiv. Peb nyuam qhuav pib xwb. Peb yuav tsum tau xaus cov kev tsim teeb meem kub ntxhov rau tej poj niam thiab lawv tej me nyuam, peb yuav tsum tau xaus cov kev tsis tau txais vaj huam sib luag rau tej poj niam thiab yuav tsum tau xaus cov kev yuam deev los yog thab zes tej poj niam."
'Txog caij lawm uas Australia tej coj tso tseg cov kev pheej muab tej teeb meem no xyeeb rau ib sab thiab tsis kub siab nrog daws lawm'
Nyob rau Ms Higgins tej lus uas nws tau hais ntawd ces nws kuj tau nug tias puas tsim nyog peb ntseeg thiab tso siab tau rau tej nom tswv tias lawv yuav los daws tau tej teeb meem uas tej poj niam pheej raug lwm tus thab zes los yog raug lwm tus yuam deev hauv tej zejzog, "yog tias lawv twb tsis kub siab los daws tej teeb meem no hauv lawv tej chaw ua hauj lwm kiag lawm."
Nws tau hais tias tsim nyog Australia tej tsoom thawj coj yuav "ua ib tug piv txwv thiab ua ib tug qauv zoo" tab sis "tu siab kawg, uas tsis yog li hais ntawd."
Ms Higgins hais tias "Yog lawv twb tsis kub siab los daws tej teeb meem no hauv lawv tej chaw ua hauj lwm lawm, ces tej poj niam tseem yuav tso siab dab tsi tias lawv yuav kub siab los daws tej teeb meem no hauv tej neeg zejzog."
“Tej teeb meem no tsis yog ib cov teeb meem laj fai kum xeeb. Tag nrho peb sawv daws yeej paub rau lub sij hawm ntau limtiam dhau los lawm tias, muaj teeb meem kub ntxhov tas mus li rau tej poj niam ntawm peb lub teb chaws no li cas lawm."
“Txog caij lawm uas peb tej coj ntawm 2 pab nom tseem ceeb tsis txhob pheej lug tsis xav tham txog tej teeb meem no thiab pheej muab tej teeb meem no feeb rau ib sab tsis xav los lees nrog daws tej teeb meem no."
Michele O'Neil uas yog tus coj lub koom haum Australian Council of Trade Unions (ACTU) tau rov qab hais sob lus uas tej neeg tawm tsam qw ib tsaug ib tsaug tias dua ib zaug ntxiv tias "txaus dhau heev lawm, yuav tsis zam ntxiv lawm."
Brittany Higgins is pictured with Women's March 4 Justice founder Janine Hendry. Source: AFP
Nws hais tias "Peb hais rau tej txiv neej ntawm thaj chaw no uas pheej qaug rau lawv lub fwj chim thiab tej txiv neej thoob teb chaws uas tau fwj chim tias - kom txhob xav tias nej muaj fwj chim, los yog nej yuav cia li dim dawb xwb."
'Poj niam yuav tsis ua ntsiag to ntxiv lawm'
Lo lus no tau ncha thiab nrov mus thoob lub teb chaws no lawm.
Eliza Coombes uas yog ib tug tau mus koom rwg npoj ntawm Hobart los yeej tau qhia tias nws dhuav "cov kev uas ib tug tsoom fwv twg uas yeej qhia meej kiag tias tsis kub siab txog tej poj niam li lawv kub siab txog tej txiv neej li."
Ms Coombes tau qhia rau SBS News tias "Kuv dhuav kuv tus kheej thiab kuv tej phooj ywg uas pheej ntshais tsis tau luag taug kev hmo ntuj tib leeg...Kuv dhuav tej nom tswv uas raug liam tias ua txhaum thiab yeej tsis pom txog tej teeb meem yuav muaj tshwm sim tau li."
"... vim li ntawd kuv thiaj tuaj tawm tsam ntawm nod hnub no."
Gabrielle Williams uas yog tus pwm tsav lis tej lajfai pab poj niam ntawm xeev Victoria los kuj tau mus koom cov kev rwg npoj hnub zwj Hli (Monday) ntawm nroog Melbourne thiab tau hais tias, tej xwm txheej no qhia tau lawm tias tej poj niam yuav tsis ua ntsiag to ntxiv txog tej teeb meem lwm tus tsim kev kub ntxhov thab zes lawv los yog yuam deev lawv ntxiv lawm.
Hobart rally attendee Eliza Coombes. Source: SBS News
Nws hais tias "Thiaj ua rau peb pom tias tam sim no tej zejzog yeej tab tom xa ib tsab xo tias lawv npaj txhij yuav los tham txog tej teeb meem no tso tshav lug lawm. Lawv yeej npaj txhij lawm thiab lawv yeej xav tham txog tej teeb meem no tam sim no lawm."
“Tiag mas yeej muaj ntau yam xwm txheej ua rau muaj cov kev rwg npoj ntawm Canberra, tab sis txawm li cas los yeej yog ib cov xwm txheej raug cog ruaj tseg cia vim txhua tus poj niam nyias yeej muaj nyias ib zaj dab neeg yuav qhia rau lwm tus, vim tej poj niam feem coob yeej raug tej teeb meem no ua rau lawv nrog kua muag lawm."
“Kuv cia siab tias yuav muaj neeg kub siab txog tej teeb meem no thiab nkag siab txog tej teeb meem no ntau tuaj ntxiv...thiab txuas ntxiv ntawd peb yuav kub siab tiag tiag tshaj no los daws cov teeb meem no."
Grace Tame uas yog ib tug neeg tau txais cov khoom plig Australian of the Year zoo siab rau cov kev "hloov cov kev xav" no yuav ua rau muaj neeg los tham txog cov teeb meem raug lwm tus yuam deev ntau tuaj ntxiv.
Ms Tame tau hais lus ntawm Tasmania nqua hu kom tej neeg tau mus koom rwg npoj nqes tes ua ib yam dab tsi thiab tawm tsam tsis pom zoo rau cov kev yuam lwm tus uas lawv pom tsim tej teeb meem no tias, ib tug neeg twg cov kev nrog hais tej teeb meem no yuav yog ib lub fwj chim muaj zog heev yuav pab daws tau tej teeb meem no.
Nws tau hais tias cov kev tawm suab tawm tswv yim yog ib qho chaw pib los nrhiav tswv yim daws tej teeb meem no.
Grace Tame pictured in the crowd at a rally in Hobart on 15 March, 2021. Source: SBS News
Ms Tame hais tias “Thaum tau muaj ib yam teeb meem dab tsi phem raug zais npog los tau ntev heev thiab ho raug coj los nthuav qhia rau sawv daws paub lawm, ces yeej yog tej yam ua rau sawv daws ceeb loj kawg thiab tsis xav ntseeg li tias ua li cas tseem muaj tau tej teeb meem phem no tshwm sim tau thiab, tsis yog tshwm sim tau xwb tab sis tseem yog tej yam teeb meem tshwm sim tsis dog dig kiag li thiab."
"Lo lus teb ces rau nqe lus no ces yooj yooj yim xwb - vim tej neeg tseem tsis kam qhia los yog tseem ua ntsiag to xwb. Thiab cov kev phem yeej loj hlob zoo heev nrog cov kev ua ntsiag tos no."
“Yog tsis muaj neeg tib ib co cwj pwm twg, tsis kub siab txog ib cov cwj pwm twg, ces yeej yog txhawb nqa tej cwj pwm ntawd lawm."
Yog tias koj los yog ib tug twg uas koj paub raug cov teeb meem yuam deev ces koj muaj peev xwm hu xov tooj rau 1800 737 732 nrog lub koom haum 1800RESPECT tham tau los yog txheeb xyuas tau ntawm lub koom haum no lub vas sab tau.
rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm ,, , thiab los yog download kom koj mloog tau SBS Hmong.
