Pom zoo los tsis pom zoo? Nod yog cov nqe lus sib cav tseem ceeb ntawm cov kev muaj suab sawv cev

Lub caij uas muaj cov kev sib teev theev muaj ceem heev txog cov kev tseem yuav tawm suab kho txhooj cai tswj haiv uas yuav muaj ntxiv no, nod yog cov nqe lus sib cav tseem ceeb uas txhawb nqa thiab tsis pom zoo kom teev los yog tsis txhob teev zwm suab sawv cev rau neeg txum tim rau hauv Australia tej txhooj cai tswj haiv.

Here are the main arguments for and against enshrining the Voice. Source: SBS / Lilian Cao

NTSIAB LUS TSEEM CEEB:

• Xyoo no ces neeg Australia yuav tawm suab seb puas pom zoo los tsis pom zoo muaj suab sawv cev rau neeg txum tim hauv tsev tsoom fwv.
• Tej neeg txhawb nqa hais tias cov kev muaj suab yuav pab kom Australia tej neeg txum tim muaj feem koom tawm tswv yim txog tej cai uas tej zaum yuav muaj tau teeb meem rau lawv. .
• Tab sis tej neeg tsis pom zoo hais tias cov kev muaj suab sawv cev no dhau nrom nrim zog lawm los yog tseem tsis tau muaj fwj chim txaus raws li qhov tsim nyog.

Neeg Australia yuav txiav txim siab tias seb puas yuav pom zoo teev zwm kom muaj suab sawv cev rau neeg txum tim hauv tsev tsoom fwv rau hauv Australia tej txhooj cai tswj haiv thaum mus tawm suab rau thaum xaus xyoo no.

Ces lub caij uas tau muaj lub teb chaws no cov kev tawm suab kho txhooj cai tswj haiv thawj zaug txij li xyoo 1999 los no, tej neeg Australia thiaj yuav raug nug kom xaiv tias seb puas Pom zoo los Tsis pom zoo rau nqe lus nug ntxiv no:

Tsab cai uas xav thov tsim tshiab: yog xav kho txhooj cai tswj haiv kom lees paub Australia tej neeg txum tim li teeb tsa kom muaj suab sawv cev rau cov neeg Aboriginal thiab Torres Strait Islander. Koj puas pom zoo rau cov kev thov hloov li no?

Thaum uas thawj pwm tsav Anthony Albanese tau qhia txog nqe lus nug no rau lub 3 hlis ntuj dhau los, ces nws tau piv tias cov ncauj lus Uluru Statement from the Heart - yeej xub tau nqua hu kom muaj suab sawv cev - tam li yog ib cov ''ua tib zoo thov'' kom seb tej neeg txum tim ho puas muaj peev xwm muaj feem tawm tswv yim rau ib co cai twg uas tej zaum yuav ua rau muaj tau teeb meem rau lawv.

Nws tau hais tias Txhua tus neeg Australia yeej xav kom peb nrog xyuas kom tsis txhob muaj txoj kev sib tu ncua ntawm tej neeg Australia txum tim thiab tej neeg Australia uas tsis yog neeg txum tim. Yog li ntawd tam sim no thiaj txog caij yuav los xyuas tias seb peb ho yuav ua li cas. Uas yog peb yuav sab laj nrog tej neeg zejzog, thiab koom ua hauj lwm nrog tej neeg uas ntsib tej teeb meem no. Thiab xyuas kom teev zwm cov kev muaj suab no rau hauv peb tej txhooj cai tswj haiv, thiab mloog pawg neeg uas ua suab sawv cev no hais."

Tej lus sib cav uas yuav pom zoo txhawb nqa kom teev zwm cov kev muaj suab sawv cev thiab tsis pom zoo teev zwm kom tsis txhob muaj suab sawv cev

Tej neeg uas tsis pom zoo txhawb nqa kom muaj suab sawv cev cav tias vim yuav ua rau muaj 'chav hauj lwm peb' hauv tsev tsoom fwv, tab sis txij thaum tau hais lo lus no los, ces los lus no kuj tau ploj lawm.

Tab sis kuj ho muaj lwm yam lus nug tias seb pawg neeg ua suab sawv cev no ho yuav ua hauj lwm li cas, thiab tej uas tsis pom zoo cav tias cov kev muaj suab sawv cev no ua dhau nrom nrim dhau heev lawm, los yog ib txhia kuj hais tias tseem muaj suab sawv cev tsis tau txaus raws li qhov tsim nyog thiab.

Nod nod tej nqe lus sib cav tseem ceeb uas txhawb nqa thiab tsis pom zoo kom muab cov kev muaj suab sawv cev hauv tsev tsoom fwv teev zwm rau hauv tej txhooj cai tswj haiv:

POM ZOO:

• Tom qab tau muaj cov kev sab laj tau ib xyoos ntev loo nrog neeg txum tim tej neeg zejzog thoob teb chaws Australia ces lawv xav kom muaj suab sawv cev rau lawv.
• Tim nyog neeg txum tim muaj feem tawm tswv yim rau tej cai uas yuav ua rau muaj teeb meem rau lawv.
• Yog tias tsoom fwv mloog tej neeg txum tim hais rau lub caij nws tsim tej cai cuam tshuam txog lawv, ces yuav tsim tau tej cai zoo dua.
• Cov kev muaj suab no yog ib cov kev muaj suab ruaj, thiab tej tsoom fwv yav pem suab yuav tsis muaj peev xwm rhuav tau.
• Yuav ua tib zoo xyuas kom pawg neeg ua suab sawv cev no muaj peev xwm nrog ''tus tsoom fwv tham'' txhais tias pawg neeg no lub luag hauj lwm yuav nyob ruaj nreeg thiab yuav tsis hloov txawm tias yav tom ntej yuav muaj tej tsoom fwv tshiab twg li.
• Pawg neeg ua suab sawv cev no yuav muaj poj niam txiv neej sib npaug li muaj tej tub koom siab uas yog tej hluas nrog, txhais tias yuav muaj cov suab ntawm tej neeg zejzog txum tim sawv cev.
• Yeej tau ua tib zoo npaj thiab rhawv tsim thiab tej kws lij choj los yeej pom zoo tso cai siv tau lawm.
• Tej neeg ua suab sawv cev no tsuas ua hauj lwm rau ib lub caij twg xwb kom thiaj li kub siab hlo lis lub luag dej num.
• Cov kev muaj suab yog ib lub zoo tswv yim uas yuav sib khom kom qhia tau QHOV TSEEB thiab COV TXHEEJ TXHEEM KEV POM ZOO nrog tsoom fwv teb chaws.
• Txawm li cas los tsev tsoom fwv, thiab neeg Australia yeej tseem yog cov muaj lub fwj chim tawm tswv yim tias yuav cai dab tsi siv.

TSIS POM ZOO:

• Cov kev muaj suab sawv cev no tsuas yog ib lub cim xwb, cov kev daws ntau yam teeb meem uas tej neeg txum tim tej zej zog ntsib ntawd tsim nyog yuav tau muaj ib pawg neeg uas muaj fwj chim tiag.
• Tej tsoom fwv kuj yuav muaj peev xwm tsis kub siab txog pawg neeg sawv cev no tej lus taw taw qhia yog tias lawv tsis nyiam.
• Cov kev muaj suab sawv cev no yuav ua rau teev zwm ib tsav neeg twg rau hauv txhooj cai tswj haiv.
• Vim tsev tsoom fwv yog tus tsim pawg neeg muaj suab sawv cev no, ces tej zaum tej tsoom fwv pem suab kuj yuav hloov, los yog kuj yuav tsis siv.
• Tej neeg txum tim twb yeej muaj suab sawv cev rau lawv yam tsis tau pom muaj dua los li los ntawm tej nom neeg txum tim sawv cev rau lawv hauv tsev tsoom fwv lawm.
• Tsim nyog yuav tsum tau qhia txog QHOV TSEEB thiab KEV POM ZOO ua ntej tso mam muaj suab sawv cev.

Mloog tau SBSHmong, rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Googlepodcasts, Spotify, thiab Apple podcasts los yog download SBS Radio App thiab SBS Hmongpodfollow 

kom koj mloog tau SBS Hmong.