Census yog dab tsi?
Ntawm Australia ces yeej muaj ib cov kev los txheeb thiab suav pej xeem thiab tej chaw lawv nyob thiab ib yam dab tsi uas qhia txog tej pej xeem rau txhua txhua 5 lub xyoos ib zaug twg.
Yeej ib txwm muab cov kev txheeb pej xeem no hu ua "Census of Population and Housing", cov kev txheeb haiv neeg no yuav muaj peev xwm tsim tau ib cov statistic txog tej neeg ntawm teb chaws Australia no thiab ntau yam tau hloov txij li tau muaj cov kev txheeb pej xeem zaum dhau los.
Cov ntsiab lus tseem ceeb:
- Hmo Census ces yog hnub zwj Quag (Tuesday) tim 10 August 2021.
- Nom tswv yeej yuam kom sawv daws yuav tsum tau koom teev cov kev txheeb pej xeem, thiab yog koj tsis koom sau tej xov xwm no xa rov qab ces tej zaum koj yuav raug nplua hnyav.
- Tom qab tau muaj teeb meem rau lub vas sab txheeb pej xeem xyoo 2021 siv tsis tau lawm ces ABS tau rov qab tsim dua cov census computer system tshiab siv lawm.
Nug tej lus nug txog dab tsi xwb?
Daim Census form yeej muaj 60 nqe lus nug uas nug txog tej neeg ntawm ib thaj chaw twg li lawv tej hnoob nyoog, poj niam txiv neej, seb tseem hluas nkauj hluas nraug xwb los yuav txij nkawm lawm, tsev neeg zoo li cas, hauj lwm etc. Tsis tas li no tseem muaj tej lus nug txog koj cov lus, tej kab lis kev cai thiab tej poj koob yawm koob (caj ceg neeg) nrog thiab.
Mloog tau zaj xov xwm qhia txog cov kev koom txheeb pej xeem (Census 2021) uas lus Hmoob tau ntawm no:
Chris Libreri uas yog tus tswj cov hauj lwm Census Division ntawm ABS hais tias "Peb nug ntau yam xov xwm txog koj tej kab lis kev cai, peb yuav nug txog koj cov lus uas koj hais koj siv hom lus twg, peb yuav nug txog qhov chaw yug koj niam koj txiv thiab yug koj; thiab peb nug ib nqe lus nug txog koj tej poj koob yawm koob (caj ceg) thiab."
Yog li cov kev txheeb pej xeem xyoo 2021 (Census 2021) no thiaj muaj 2 nqe lus nug tshiab xws li - cov kev pab cuam rau Australia tej tug rog thiab tej zwj ceeb noj qab haus huv.
Young Aboriginal students - Getty Images - SolStock Source: Getty Images
Hmo txheeb pej xeem (Census night)
Lub koom haum Australian Bureau of Statistics (ABS) yeej khiav cov Census rau hnub zwj Quag (Tuesday) zwj thaj tim 10 August 2021 rau hmo Census night ntawd.
Yog li ces hmo Census night ntawd thiaj li yog hmo txheeb pej xeem tiav lawm. Tab sis zaum no thaum koj tau tej Census number rau koj tsev neeg thiab tau ib tug password siv ib ib ntus lawm ces koj yeej muaj peev xwm los teev tej xov xwm no lawm.
Tej neeg uas tsis muaj peev xwm sau hauv onlie muaj peev xwm hu xov tooj thov ib co form tau.
Vim li cas thiaj txheeb pej xeem?
Cov Census 2021 no yuav khaws tej xov xwm ntawm 25 million tus neeg thiab 10 million yim neeg ntawm teb chaws Australia.
Yuav siv tej xov xwm no los pab tsoom fwv cov kev txiav txim siab txog tej kev kho mob, transport, teej kawm, hauv paus txhim kho thiab lawm yam. Tej lagluam thiab tej koom haum pab cuam zejzog los yeej yuav siv tej xov xwm no los txheeb seb tej zejzog ho xav tau cov kev pab cuam dab tsi.
Mr Libreri hais tias "Yog koj xav nrhiav ib yam dab tsi los sis yog koj xav txheeb xyuas ib cov kev pab cuam dab tsi rau ib thaj chaw twg , ces koj yuav tsum paub txog tias leej twg yog cov neeg nyob rau thaj chaw ntawd, thiab lawv coj twj yam ntxwv ua lub neej li cas. Ces cov kev txheeb pej xeem no yuav qhia tau tej xov xwm no rau koj."
Cov kev txheeb pej xeem no tseem pab kom koj nkag siab txog tej zejzog cov kev xav tau kev pab cuam dab tsi thaum koj mus pab lawv, piv txij li tej chaw sib tw mus txog ib cov khoom noj khoom haus thiab khoom siv dab tsi ntawm tej khw muag khoom mus txog rau cov kev muaj ntau yam ntawv ntawm chaw khaws ntawv rau sawv daws tau nyeem tau saib.
Ib co piv txwv ces yog lub chaw kho mob Orange Aboriginal Medical Service. Jamie Newman uas yog tus coj lub koom haum no hais tias tej xov xwm tau los ntawm cov kev txheeb pej xeem no pab kom lawv muaj peev xwm ntsuam tau tias tej zejzog xav tau dab tsi.
Cov kev mus koom cov kev txheeb pej xeem (Census) thiab teev npe xaiv nom yog ib txoj kev tawm suab rau peb.
Leej twg yuav tau koom?
Cov kev txheeb pej xeem (Census) no ces yeej zoo tib yam li cov kev xaiv nom thiab, uas yeej yog tej yam uas yuav tsum tau ua ntawm teb chaws Australia no. Tib qho txawv ntawd ces yog qhov tias tsis hais koj yuav yog cov neeg tau hom visa dab tsi siv thiab yog los tsis yog pej xeem Australia los koj yuav tsum tau koom tib si.
Yog koj ho tuaj pw ncaj ntawm teb chaws Australia rau ho Census night (Hmo txheeb pej xeem) ces koj yuav tsum tau teev koj tej xov xwm ntiag tug rau daim Census form. Thiab yeej tsis cuam tshuaj tias koj yog leej twg los sis yog pej xeem li, raws li Chris Libreri uas yog tus coj Cencus Division hais.
Yeej muaj tsab cai Census and Statistics Act 1905 los yuam kom tej neeg yuav tsum teb tej xov xwm txheeb pej xeem. Yog koj tsis muaj laij thawj zoo txaus es tsis sau ces koj yuav raug nplua hnyav heev.
Mr Libreri hais tias "Tsuas muaj neeg tsawg dua 200 leej ntawm tej neeg Australia 25 million tus tiaj raug coj mus hais plaub rau cov kev txheeb pej xeem zaum tag los xwb. Thiab raws tej neeg uas tsis mus sau cov xov xwm txheeb pej xeem ces yeej raug tsev hais plaub nplua kom them nyiaj $1,000."
Tib qhov uas zam rau tej neeg ces thiaj tsis hais kom tej nom tswv txawv teb chaws thiab lawv tsev neeg koom xwb.
Group of people from diverse background - Getty Images - SolStock Source: Getty Images
Tau txais kev ruaj ntseg npaum li cas rau koj tej xov xwm?
ABS yuav tau muab lub vas sab uas tej neeg mus teev lawv tej xov xwm rau kaw rau hmo txheeb pej xeem xyoo 2016 ntawd vim muaj neeg phem tsim teeb meem cyberattacks kom txhob siv tau.
Pawg rooj sab xyuas kis xeev siab tau xaus lus tias lub koom haum ABS ua yog lawm uas nws tau muab lub vas sab census websity kaw kom thiaj li pov puag neeg Australia tej xov xwm ntiag tug. Tab sis nws yeej tau hais tias ABS tsis kub siab nrog xyuas tej neeg txoj kev txhawj xeeb txog tej neeg cov privacy tom qab nws tau txiav txim siab khaws tej neeg sau cov ntawv txheeb pej xeem kom qhia lawv tej npe thiab chaw nyob rau hauv daim Census form ntawd.
Mr Libreri hais tias cov kev khaws tej neeg tej npe thiab chaw nyob no yuav pab kom khaws tau ib co xov xwm zoo.
Nws teev txog kis tias ABS muaj peev xwm tsim tau ib cov statistics txog tej neeg ntiag tug zoo heev thiab tau tej xov xwm ntawm tej neeg tiag tug uas yeej tsis coj mus faib los yog qhia rau ib tug neeg twg los yog yeej tsis qhia rau tsoom fwv tej tuam chav paub li.
Nws hais tias "Peb tsim cov statistics los mas, tab sis peb yeej tsis muab tej neeg ntiag tug tej xov xwm qhia rau lwm tus paub. Vim cov kev ua li ntawd txhaum peb tsab cai thiab lub koom haum ABS yeej yog ib lub koom haum tsim los tau ntev tshaj 110 xyoo lawm, thiab raws li kuv paub ces peb yeej tsis tau yuam cai los yog yeej tsis tau muab tej neeg ntiag tug tej xov xwm coj mus qhia rau lwm tus paub li."
Yeej tau muab tej xov xwm ntawd encrypted kiag thaum uas nej sau tag hauv nej tej computer lawm, thiab ABS thiaj yog tib tug neeg uas muaj yawm sij mus qhib tau xwb.
Padlock, data security concept – Getty Images - gremlin Source: Getty Images
Yog cov twj vam meej thiab zoo tshaj plaws thiab ntiav tej neeg muaj licenced sim seb nyiag puas tau tej xov xwm tib sib lawm
ABS yeej muaj cov computer system tshiab uas zoo tshaj plaws coj los siv cov Census 2021 no lawm. Lub koom haum Australian National Audit Office tau hais rau thaum lub 11 hlis ntuj xyoo 202 tias tsuas npaj tau cov Census 2021 tsuas muaj qee yam thiaj siv tau zoo xwb thiab tseem muaj tej yam tsis tau zoo txaus.
Tab sis Mr Libreri hais tias cov system tshiab no yeej yog "cov tsim tau zoo tshaj plaws lawm" thiab tsim nyog tej neeg yuav tso siab tias "yuav tau txaus kev nyab xeeb txaus lawm".
Peb kuj tau koom tes nrog Australia cov koom haum tswj kev ruaj ntseg (Australian security agencies) li cov Cyber Security Centre los nrog peb tsim cov system no txhua txhuam yam lawm.
Mr Libreri hais ntxiv tias "Thiab ib yam ntxiv uas peb ua ntawd ces peb tau ntiav cov hackers kom nyiag nkag mus rau peb cov system no seb ho tshuav qhov twg tseem tsis tau zoo txaus thiab."
Yog koj xav tau xov xwm txog cov kev txheeb pej xeem (Census) ces mus txheeb tau ntawm lub vassab no: .
