Australia cov brands lagluam uas tau txais kev ntseeg siab thiab tsis ntseeg siab tshaj plaws

Bunnings tau ras los ua lub tuam txhab lagluam uas muaj cov brands lagluam tej neeg ntseeg siab tshaj plaws. Txheeb seb ho muaj hom lagluam twg tau zum zoo thiab yam lagluam twg poob zum.

Woolworths had held the top spot on Roy Morgan's trusted brand list since May 2020. Source: AAP / Luis Ascui

Ntsiab lus tseem ceeb:

• Bunnings tau ras los ua Australia lub tuam txhab lagluam uas muaj neeg ntseeg siab tshaj plaws thiab tau txeeb zum zoo no ntawm Woolworths lawm..
• Thiab raws li tej xov xwm teeb txheeb txog tej kiab khw ntawm lub tuam txhab Roy Morgan qhia ces Optus tseem yog lub tuam txhab lagluam uas muaj neeg ntseeg siab tsawg tshaj plaws.
• Cov kev teeb txheeb no kuj txheeb tau tias tsaib no tau muaj neeg Australia feem coob yeej tsis muaj kev ntseeg siab rau tej tuam txhab lagluam ntau tuaj ntxiv lawm.

Raws li tau muaj ib cov kev teeb txheeb tshiab qhia ces Bunnings tau yeej zum zoo tshaj plaws ntawm lub tuam txhab supermarket Woolworths thiab tau ras los ua Australia lub tuam txhab lagluam uas muaj neeg ntseeg siab tshaj plaws lawm.

Txij lub 5 hlis ntuj xyoo 2020 los ces lub tuam txhab Woolworths yeej yog lub tuam txhab uas tau txais kev ntseeg siab tshaj plaws raws li Roy Morgan qhia thaum nws txeeb tau zum zoo heev ntawm Bunnings, tab sis kuj tau rov qab poob rau zum ob rau lub 12 hlis ntuj xyoo 2023 rau lub caij tseem muaj lus iab liam tias ob lub tuam txhab supermarket loj (Woolworths/Coles) txhob txwm nce nqe muag khoom kim.

Cov kev tshawb fawb no txheeb tau tias muaj ntau yam laj thawj uas ua rau tej neeg Australia feem coob yeej tau tsis tshua ntseeg siab rau tej tuam txhab lagluam ntau tuaj ntxiv rau tsaib no lawm, tsis hais yuav yog ''tej tuam txhab lagluam cov kev vum loj, cov kev tsis kub siab pab tej customers, tej nqe khoom kim, cov kev tsis ua siab ncaj, cov kev ua tej tsis tsim nyog ua thiab cov kev tsis kub siab pov puag tej customers tej xov xwm ntiag tug.''

Tas sis Bunnings kuj yog lub tuam txhab tau txais txiaj ntsim los ntawm cov kev tau xais kev ntseeg siab thiab.

"Vim Bunning yog ib co brand lagluam muaj nqes thiab muaj koob nto npe vim tau txais kev ntseeg siab ntau tshaj qhov tsis tau txais kev ntseeg siab ... thiab yeej tau txais kev ntseeg siab nce ua ntuv zus tuaj txij tsaib no lawm, thiab tsuas muaj cov kev tsis ntseeg siab tsawg heev lub qub xwb,'' raws li Michele Levine uas yog tus coj lub koom haum Roy Mogan tau hais.

Australia tej brands lagluam uas tau txais kev ntseeg siab tshaj plaws

Australia lwm lub khw supermarket loj li Coles los kuj tau txais kev ntseeg siab tsawg dua thiab tau poob ob theem ntawm lub tuam txhab tau txais kev ntseeg siab tshaj plaws los tau zum 5 lawm xwb.

Hos lub tuam txhab Aldi thiab Kmart ces kuj tau nce zum ib theem los tau zum 3 thiab zum 4 sib law liag lawm, hos Apple ces tseem nyob li qub ntawm zum 6.

Toyota, Myer, Big W, thiab Australia Post ces ces yog cov tau txais kev ntseeg siab tshaj plaws ntawm 10 lub tuam txhab.

Bendigo Bank thiaj yog tib lub tuam txhab ntawm 20 lub uas tau nce ob theem nyob ua ntej ntawm lub tuam txhab ING uas tau zum 18 thiab Commonwealth Bank uas tau zum 19.

Tab sis yog thaum tham txog tias zej tsoom tej chaw nthuav xov xwm ho tau txais kev ntseeg siab npaum li cas ces kuj pom tias ABC tau poob ob theem mus ua zum 17 hos SBS ces tau poob 23 theem mus tau zum 93 lawm xwb.

Australia 10 cov tuam txhab lagluam uas tau txais kev ntseeg siab tshaj plaws rau lub 12 hlis ntuj xyoo 2023. Source: Supplied / Roy Morgan Single Source (Australia)

Australia tej tuam txhab lagluam uas tau txais kev ntseeg siab tsawg tshaj plaws

Tom qab uas tau muaj cov kev ua tej xov xwm paim quav loj heev rau xyoo 2022 thiab tau muaj teeb meem tsis muaj peev xwm siv tau xov tooj thoob teb chaws tsaib no lub 11 hlis ntuj, ces lub tuam txhab Optus tseem yog ib lub tuam txhab lagluam uas tau txais kev ntseeg siab tsawg tshaj plaws ntawm teb chaws Australia.

Hos lub tuam txhab social media li Facebook/Meta ces kuj tseem tau zum ob ntawm tej tuam txhab uas tsis tau txais kev ntseeg siab tshaj plaws, ua ke no los Australia lub tuam txhab yav dav hlau Qantas los kuj tau ras los ua lub tuam txhab zum peb ntawm lub teb chaws no uas tsis tau txais kev ntseeg siab tshaj plaws lawm thiab.

Tej tuaj txhab li Telstra, News Corp, Medibank, thiab Amazon ces kuj tseem yog cov tuam txhab tau txais kev ntseeg siab tsawg tshaj plaws ua zum 4, zum 5, zum 6 thiab zum 7 sib law liag.

Australia 10 tuam txhab lagluam uas tsis tau txais kev ntseeg siab tshaj plaws rau lub 12 hlis ntuj xyoo 2023. Source: Supplied / Roy Morgan Single Source (Australia)

Tsis tas li ntawd los cov kev teeb txheeb no kuj tseem qhia ntxiv tias muaj cov kev ntseeg siab 'tsawg zujzus tuaj ntxiv' rau Australia 4 lub tuam txhab nyiaj loj lawm thiab vim rau qhov lawv pheej nce kab theem paj ua ntuv zus thiab tej neeg muaj kev txhawj xeeb txog tej nqe siv ua lub neej ntau yam.

Levine tau hais tias "ANZ yog lub tuam txhab uas tau txais kev ntseeg siab tsawg tshaj plaws, uas tau nces uas lub tuam txhab theem 18 uas tsis tau txais kev ntseeg siab tshaj plaws thiab tau zum 15 ntawm ntawm 20 lub tuam txhab uas tsis tau txais kev ntseeg siab tshaj plaws ntawm teb chaws Australia.''

"Hos NAB ces tau nce 19 theem, tab sis kuj tseem yog haiv neeg no lub tuam txhab zum 71 uas tsis tau txais kev ntseeg siab tshaj plaws, txawm li cas los kuj tseem tau zum zoo dua lub tuam txhab ANZ.''

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.