Ua cas tej neeg Australia qev nyiaj yuav tsev uas txhawj txog tej nqe them tsev tsis nrhiav kev pab?

Yeej muaj tej neeg Australia coob heev uas tsis tshua muaj peev xwm them tau tej nqe qev nyiaj yuav tsev yeej tsis paub tias muaj cov kev pab cuam rau lub caij txom nyem nyiaj txiaj (Financial hardship assistance) coj los pab rau lawv li. Cov kev thov kev pab ntawm lub tuam txhab yus qev nyiaj yuav tsev tsis yog tias yuav pab daws tau teeb meem nyiaj txiaj xwb tab sis kuj pab kom yus kaj siab zog thiab.

The Australian Securities & Investments Commission says borrowers in financial hardship are entitled by law to seek assistance from lenders. Source: Getty / Getty Images

Muaj neeg Australia yuav laug txog li 6 millions tus uas qev nyiaj los yuav tsev nyob yeej tsis tshua muaj peev xwm them tej nqe yuav tsev, tab sis yeej tseem muaj coob leej ntau tus tseem ua xyem xyav tsis tshua xav thov kev pab ntawm lawv tej txhab nyiaj los yog lwm lub chaw qev nyiaj los pab rau lawv thiab.

Ib xyoos dhau los ces yeej muaj neeg Australia txog li 47 feem pua (zes txog li 5.8 millions tus neeg Australia) uas muaj ib yam nuj nqes uas yeej tsis tshua muaj peev xwm them rov qab raws li lub koom haum Australian Securities and Investments Commission (ASIC) cov kev teeb txheeb tau qhia.

Ntxiv ntawd los kuj tseem muaj tej neeg Australia txog li 41 feem puas kuj tseem muaj tej nuj nqes qev nyiaj los siv rau ntiag tug/thiab lwm yam nuj nqe uas yeej yog tej yam nyuaj kawg uas tsis muaj peev xwm them rov qab rau lub sij hawm 1 xyoos ntxiv no thiab.

Tej ntuj nqes siv ua lub neej ntau yam, cov kev khwv tau nyiaj tsawg, thiab tej nqe yuav tau siv uas tsis nco faj txog yog tej uas pheej ua rau tej neeg Australia txom nyem nyiaj txiaj siv.

Tsis kam thov kev pab rau lub caij txom nyem nyiaj txiaj

Txawm tias tsis tshua muaj peev xwm them tau tej nuj nqe qev nyiaj los yuav tsev los yeej tseem pom tias txhua txhua 3 tug neeg Australia ntawm 10 tus twg (30 feem pua) yeej tsis thov cov kev pab cuam financial hardship assistance siv li thiab.

Raws li tau muaj ib cov kev tshawb fawb ces kuj pom tias muaj 42 feem pua ntawm tej neeg uas tau koom cov kev tshawb fawb no yeej tau hais tias lawv xum muag tej qub txeeg qub teg uas lawv muaj ntawd kom tau nyiaj los siv, thiab yeej muaj 40 feem pua ntawm tej neeg no kuj yuav tau ua txoj hauj lwm 2 ntxiv ua ntej yuav thov cov kev pab cuam ntawm lawv tej txhab nyiaj los yog lwm cov chaw qev nyiaj uas lawv qev nyiaj los siv ntawd.

Tej neeg li hais no ces yeej muaj txog li 50 feem pua ntawm cov neeg qev nyiaj los siv yeej txhawj tias tsam yuav ua rau lawv haj yam tau them kim tshaj qub ntxiv ntev ntxiv tuaj, 32 feem pua ntshai tias tsam yog tej yam tsis zoo rau lawv cov credit scores thiab muaj 31 feem pua hais tias ntshe tej txhab nyiaj los yog tej chaw lawv qev nyiaj siv yeej tsis tau dab tsi ntau rau lawv thiab.

Tab sis yeej muaj tej neeg koom cov kev tshawb fawb no ib nrab (55 feem pua) yeej tsis paub txog tias muaj cov kev pab cuam (financial hardship assistance) pab rau lawv li thiab.

"Yeej pom tau tias cov kev thov kev pab cuam rau tej neeg Australia feem coob yeej yog tej yam uas rau lawv txhawj thiab ntshai kawg, nyuaj kawg, yog tej yam tsis totaub yooj yim. Thiab kuj yog ib cov kev txhawj xeeb tias tej neeg xum muag lawv tej peev txheej teej tug los yog nrhiav txoj hauj lwm ob ua kom tau nyiaj los siv xwb yeej tsis thov cov kev pab cuam financial hardship assistance siv li,'' raws li Alan Kirkland uas yog tus coj lub koom haum ASIC tau hais.

Cov kev nyuaj siab ntau yam ua rau tsis muaj ntau txoj xub ke los daws tej teeb meem txom nyem nyiaj txiaj siv

Cov kev tshawb fawb no yeej qhia tias tsis yog tias tej neeg tseem tsis tau paub txog tias muaj cov kev pab cuam no (Financial hardship assistance) xwb, tab sis tej kev nyuaj siab ntau yam tseem ua rau neeg Australia ua xyem xyav tsis xav thov kev pab cuam rau lub caij tsim nyog lawv tau txais kev pab cuam thiab.

Tej txiaj ntsim yuav tau los ntawm cov kev thov kev pab

Dua ntawm cov kev yuav muaj peev xwm pab kom yus ib nyuag nyuaj siab rau phab nyiaj txiaj tsawg me ntsis, ces kuj tseem tau lwm yam txiaj ntsim los ntawm cov kev thov cov kev pab cuam financial hardship assistance ntawm tej chaw yus qev nyiaj siv thiab.

Uas yuav tau txais ntau yam txiaj ntxim li pab kom yus ib nyuag kaj siab zog, pw tsaug zog thiab tau txais kev noj qab nyob zoo.

Txawm li cas los kuj tsuas muaj tej neeg no tsawg tsawg xwb thiab.

Thiab raws li ASIC hais ces tsuas muaj tej neeg uas tau koom cov kev tshawb fawb no txog li 20 feem pua xwb thiaj tau qhia tias lawv tau thov cov kev pab cuam financial hardship assistance siv rau ib lub caij twg xwb.

Tau muaj tej neeg 2 feem 3 (65 feem pua) kuj mloog tau tias tom qab uas lawv tau thov cov kev pab cuam no siv lawm ces yeej muaj ib yam dab tsi pauv hloov zoo tuaj ntxiv lawm.

Thiab Kirkland thiaj qhia txog qhov tseem ceeb ntawm cov kev thov cov kev pab cuam financial hardship assistance siv tias, tej chaw qev nyiaj yeej muaj lub luag hauj lwm raws cai yuav tau pab tej neeg qev nyiaj siv uas ntsib kev txom nyem.

Nws tau hais tias "Raws cai lawm ces tej neeg uas txom nyem nyiaj txiaj yeej muaj cai thov kev pab. Thiab tej xov xwm tau los ntawm cov kev tshawb fawb no tsim nyog yuav yog tej yam nyob rawv hauv tej chaw nqev nyiaj nruab siab thaum pab tej neeg Australia uas txom nyem nyiaj txiaj. Yog li peb thaj xav xa tsab xo no rau tej neeg Australia uas txom nyem nyiaj txiaj tias tej txhab nyiaj thiab tej chaw qev nyiaj yeej muaj lub luag hauj lwm yuav tau pab tej customers. Yog tias koj txhawj tias tsam tsis muaj peev xwm them tau tej nyiaj koj qev los siv, ces koj yeej muaj cai thov kev pab los ntawm koj lub txhab nyiaj los yog lub chaw uas koj qev nyiaj siv pab rau koj.''

"Yog tias koj tsis txaus siab rau koj lub txhab nyiaj los yog lub chaw koj qev nyiaj los siv cov kev pab, ces koj kuj muaj peev xwm mus yws tej teeb meem no nrog lub koom haum Australian Financial Complaints Authority tau yog tias tsis muaj peev xwm yuav daws tau tej xwm txheej no.''

Koj muaj peev xwm thov tau kev pab cuam qhov twg

ASIC yeej muaj ib co program qhia kom tej neeg totaub txog kev siv nyiaj txiaj ntawm nws lub vas sab Moneysmart, thiab yeej muaj ib co kev taw qhia tshiab rau tej neeg Australia kom paub txog sab seem nyiaj txiaj. Yog li thiaj xav kom nug thiab thov cov kev pab cuam! Vim yeej muaj cov kev pab Harship Help coj los pab yus.

Kirkland thiaj tau hais tias "Tej neeg Australia uas txom nyem nyiaj txiaj siv tsim nyog yuav tau nrog lawv tej txhab nyiaj los yog tej chaw lawv qev nyiaj siv tham thiab 'thov' kev pab. Vim cov kev thov cov kev pab rau lub caij txom nyem nyiaj txiaj yeej yog yus ib txoj cai, thiab tej chaw qev nyiaj los yeej yuav tau los nrog xyuas txhua cov kev thov kev pab rau lub caij ib tug twg txom nyem nyiaj txiaj siv thiab.''

Moneysmart yeej muaj cov kev pab cuam pub dawb rau tej neeg siv thiab yog ib lub koom haum ywj pheej tuaj nruab nrab tsis nyob qab tswj hwm ntawm leej twg uas yeej muaj tej xov xwm nyiaj txiaj tuaj nruab nrab thiab tej twj rau tej neeg siv rau lub caij xav thov kev pab vim txom nyem nyiaj txiaj siv.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.