Ntsiab lus tseem ceeb:
- Txij thaum muaj kab mob kis thoob ntuj los no ces yeej muaj tej neeg tsiv tawm hauv tej nroog mus nyob rau tej zos toj siab coob tuaj ntxiv.
- Tej nqe tsev kim thiab tej nuj nqes siv ua lub neej tau ua rau muaj tej xwm txheej no.
- Tej neeg muaj hnoob nyoog 30 tawm xyoo ces yeej tau tsiv tawm ntawm nroog Sydney ntau tshaj pob npaug ntawm tej tau tuaj rau lub nroog no ob peb xyoos dhau los.
Tej neeg yug rau lub caij thaum ntxov xyoo 1980s txog yav lig xyoo 1990s (Millennials) ces tam tom tawm ntawm tej nroog loj coob heev mus nyob rau tej zos toj siab, thiab yeej tau muaj cov kev tsiv tawm no txij thaum tau pib muaj tus kab mob COVID-19 kis thoob ntuj uas tau siv ntau cov kev txwv thiab tim tej nqe tsev kim thiab tej nuj nqes siv ua lub neej.
Tab sis tej neeg uas tsiv tawm ntawm tej cua tsw paug hmoov tshauv thiab tej nroog tsis huv los kuj tsiv mus deb thiab, tsuas tsiv mus rau tej zos cheeb tsam ze nroog loj xwb thiab yog 5 co chaw uas muaj tej neeg nyiam tsiv mus nyob tshaj plaws.
Tej neeg dhuav tej nqe ntiav tsev kim, cov kev yuav tau caij tsheb ntev heev mus ua hauj lwm thiaj tau tso tseg lub nroog Sydney no txuas ntxiv ntau tshaj 2 feem 3 ntawm tej uas tau tsiv mus nyob rau tej zos cheeb tsam 1 xyoos dhau los txog rau thaum xaus lub 3 hlis ntuj.
'Tej nqe tsev kim'
Raws li Liz Ritchie uas yog tus coj lub koom haum Regional Australia Institute (RAI) tau qhia ces tsis yog tias tej neeg tsiv tawm ntawm tej nroog yuav ''maj mam tsiv tawm'' rau lub caij muaj kab mob kis thoob ntuj xwb tab sis yeej muaj cov kev tsiv tawm ua ntuv zus ntau tuaj ntxiv.
Nws tau qhia tias "Tej neeg yeej tsis txhawb nqa ntau yam thiab tau txiav txim siab mus nyob rau tej zos cheeb tsam ntawm Australia.''
"Tej nqe tsev kim thiab tej nuj nqes siv ua lub neej no thiaj ua rau tej neeg coob leej ntau tus ras txog tias tej zos cheeb tsam yuav pab lawv ua tau lub neej lawv xav ua zoo dua thiab tau ua tej hauj lwm lawv xav ua - yam tsis tas ntsib tej teeb meem ntau yam li tej muaj ntawm tej nroog loj.''
Queensland lub nroog Sunshine Coast ces yog lub nroog uas tej neeg nyiam tawm hauv nroog loj mus nyob tshaj plaws, tab sis txuas rau sab qab teb uas yog lub nroog Gold Coast los kuj yog ib thaj chaw uas muaj tej hluas millennials nyiam mus nyob heev thiab.
Ces ob lub nroog no thiaj nrug ntawm nroog Brisbane li 150 km tib yam xwb, hos lwm cov nroog uas tej neeg xav nyob dua ces yog cov nyob ze dua lawv lub nroog loj ntawd ces yog Lake Macquarie, sab qaum teb ntawm Sydney thiab lwm cov chaw uas tej neeg nyiam mus nyob.
Greater Geelong thiab Moorabool ces kuj yog ob lub nroog uas nyob nrug Melbourne li 100km thiab kuj yog ob thaj chaw ntawm 5 thaj chaw uas muaj neeg nyiam mus nyob tshaj plaws.
Nws tau hais tias "Tej neeg uas nyob rau ntawm tej kev loj ntawm tej ntug zos ntawm tej nroog loj los kuj tau tsiv tawm rau lub caij li ob peb xyoos uas lawv tau mus nyob rau ntawm tej chaw ntawd lawm thiab.''
Tau muaj neeg tsiv tawm ntawm Sydney ntau dua lwm lub nroog
Lub koom haum RAI cov xov xwm teev txog tej neeg tsiv ntawm tej nroog mus nyob tej zos cheeb tsam kuj siv lub tuam txhab nyiaj Commonwealth Bank (CBA) tej xov xwm los qhia tias muaj tej neeg no coob ntxiv tuaj thiab coj los qhia txog tej kev npaj yuav nqes peev tsim tej hauv paus txhim kho rau ntawm tej zos cheeb tsam.
Ces thiaj ua rau Sydney yog lub nroog uas muaj tej neeg tawm mus nyob rau lwm qhov chaw ntau tshaj piv rau lwm lub nroog, tab sis kuj tau muaj neeg tawm tsawg txog 67 feem puas uas tau nqes ntawm 89 feem pua lub 3 hlis ntuj xyoo 2023 lawm, ua ke no los tej neeg tawm mus nyob rau tej zos cheeb tsam thiab zos toj siab ntawm New South Wales (NSW) los yeej tau muaj ntau tuaj ntxiv ntawm 23 fem puas nce tuaj ua 39 feem pua lawm.
Raws li Paul Scully uas yog NSW tus nom tswj cov dej num npaj tsim vaj tse/tsim nroog tau hais rau hnub zwj Teeb (Thursday) ces yuav tau tsim kom tau tej tsev ntau tuaj ntxiv mas thiaj li yuav cheem tau kom tej hluas thiab tej cuab yig tsis txhob tawm ntawm nroog Sydney mus uas yog ib lub nroog uas muaj neeg nquag plias thiab muaj zoo laj lim tswv yim.
Nws tau hais tias "Tej neeg muaj hnoob nyoog 30 txog 40 xyoo yog cov uas tau tsiv tawm hauv tej nroog ntau tuaj ntxiv txog li 2 npaug ntawm tej neeg uas tau mus nyob rau tej nroog ob peb xyoos dhau los.''
Tsoom fwv yeej tau qhia txog ntau cov kev hloov tej cai tsim nroog kom thiaj tsim tau vaj tse hauv plawv nroog thiab tej zos sab hnub tuaj kom ntau tuaj ntxiv, thiab yuav tsis tsim tej kev rau sab hnub poob Sydney kom tsim tau 377,000 lub tsev tshiab rau lub caij 5 xyoos.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
