Ntsiab lus tseem ceeb:
- Tus nqe roj unleaded 91 nrab thoob teb chaws no ces muag ib litre twg $2.06.
- Tej nqe roj tsheb thiaj kim tshaj plaws lawm vim tej chaw muag tsub lwm yam nqe rau tej neeg tsav tsheb them..
- Ntiaj teb cov kev xav tau roj tsheb siv thiab ho txo tsis lim tej roj no ntau thiaj ua rau nqe roj tsheb kim.
Tej nqe roj tsheb tau ua rau tus nqe roj tsheb nruab nrab ntawm haiv neeg no kim tshaj plaws rau xyoo no rau lub caij uas ntiaj teb xav tau roj siav ntau tuaj ntxiv, thiab ntshe tej nqe roj tsheb tseem yuav kim li no ib ntus ntxiv.
Raws li lub vas sab Compare the Market cov kev tshuaj ntsuam, ces tus nqe roj tsheb nruab nrab thoob teb chaws no rau cov roj unleaded 91 ces twb raug $2.06 rau ib litre twg lawm, ces thiaj li yog tus nqe kim tshaj plaws txij lub 7 hli ntuj xyoo 2022 los no.
LISTEN TO
Nrhiav li cas thiaj yuav rau roj tsheb pheej yig
SBS Hmong
06:23
Tej neeg Melburne thiaj yuav tau them nqe roj tsheb $2.16 rau ib litre twg, raws li lub vas sab no cov kev tshuaj ntsuam tej nqe roj ntawm tsib lub nroog.
Tus nqe roj tsheb ntawm nroog Adelaide thiab Brisbane ces pheej yig dua $2 rau ib litre twg, thiab yog xam raws tus nqe roj nrab ces tsuas them li ntawm $1.94 thiab $1.97 sib law liag xwb, hos tej neeg ntawm Perth ces tau them $2.05 thiab tej neeg ntawm Sydney ces tau them $2.10 rau ib litre roj tsheb twg.
Tab sis tus nqe roj nrab ntawm tej chaw muag roj thoob teb chaws (tus nqe uas tej chaw muag roj them) tsuas yog $1.87 rau ib litre roj tsheb unleaded 91, thiab tsuas them tus nqe li ntawm $1.80 lub plaub hlis ntuj dhau los xwb.
Vim li cas nqe roj thiaj kim ua luaj?
Raws li lub koom haum International Energy Agency's (IEA) tsab ntawv cej luam Oil Market Report uas tau qhia rau lub 8 hli ntuj no ces vim yog ntiaj teb xav tau roj siv ntau heev thiab tsis muaj tej roj txaus siv. Lub koom haum IEA no sab laj tawm tswv yim nrog tej tsoom fwv txog ntiaj teb tej roj siv.
Tsab ntawv cej luam no qhia tias "Ntiaj teb xav tau roj siv ntau tshaj tej xav tau coj los siv lawm, vim yog lub caij ntuj so uas muaj neeg caij dav hlau ntoj ncig, thiab kuj muaj neeg siv roj los pab tej tshuab tsim hluav taws xob nrog rau Suav tej hauj lwm petrochemical uas muaj ntau tuaj ntxiv."
Ces tej nqe roj thiaj tau kim tuaj txog li 23 feem pua txij li thaum lub 6 hli ntuj nrab uas nqe roj tseem pheej yig - ces thiaj li ua rau tej nqe roj kim ntawm Australia lawm.
Chris Ford uas yog tus kws tshuaj ntsuam tej nqe roj ntawm lub koom haum Compare the Market tau hais tias thiaj ua rau tus nqe roj kim tshaj 13 cents rau ib litre roj twg rau tib lub caij ntawd lawm, thiab thiaj ua rau tej nqe roj ntawm tej chaw muag roj ''kim ntev ntxiv'' thiab kim tshaj tej nqe roj uas ib txwm siv lawm.
Nws tshab txhais tias tej nqe peb them ntawm tej chaw muag roj ntawd tau ua rau cuam tshuam nrog tej nqe roj dub uas tsis tau lim thiab, ces thiaj ua rau tej nqe roj no kim tuaj ntxiv tom qab lub koom haum muag roj OPEC+ (Organisation of the Petroleum Exporting Countries thiab ntau cov teb chaws phooj ywg uas Russia ua tus coj ntawd) tau tsim roj tsawg zog ntxiv, tom qab uas tau tsim tsawg rau lub 11 hlis ntuj tsaib no.
OPEC+ yog lub koom haum uas tsim ntiaj teb tej roj dub uas tseem tsis tau lim txog li 40 feem pua, txhais tau tias nws cov kev txiav txim siab tsim roj tsawg yog tej yam tseem ceeb ua rau nqe roj kim.
Ford tau qhia rau SBS News tias "Tej teb chaws vam meej yeej tau liam lub koom haum OPEC+ qee yam tias nws cov kev txiav txim siab no yog txhob txwm los tswj nqe roj xwb, thiab kuj tau liam tias lub teb chaws li Saudi Arabia, tam li yog lub teb chaws xa roj muag ntau tshaj plaws hauv ntiaj teb los yeej xav kom tus nqe roj kim."
Nws tau hais tias "Yog muaj roj tsawg ces yeej yuav ua rau nqe roj kim xwb, txawm tias tseem muaj neeg xav tau roj siv li qub. Thiab thaum muaj neeg xav tau roj siv ntau ntxiv, ces ntshe haj yam yuav ua rau nqe koj haj yam kim tshaj qub ntxiv xwb thiab."
Cov kev pauv nyiaj los kuj yog tej yam ua rau tej nqe roj kim tuaj ntxiv thiab - vim siv nyiaj Meskas (US dollars) yuav roj thiab nyiaj Australia los poob nqe lawm ces thiaj ua rau tag nrho peb sawv daws yuav tau them tej roj ib txwm siv kim tshaj qub ntxiv.
Tej nqe roj no yuav kim ntev npaum li cas ntxiv?
Ford tau hais tias tej zaum tej nqe roj kuj yuav kim rau lub sij hawm ntau limtiam thiab yog tias nyiaj Australia tseem poob nqe.
OPEC+ los yeej ib txwm muaj ntau yam kev txiav txim siab yam tsis muaj kev ceeb toom dab tsi li thiab, yog li ntawd ''yog tias lawv tau txiav txim siab khawv roj tsawg txuas ntxiv thiab tsis muaj roj txaus siv thiab, ces yeej yuav ua rau peb pom tias tej nqe roj yuav rov qab kim tuaj ntxiv thiab."
"Ces ntshe thiaj tseem yuav kim li no txuas ntxiv yam tsawg li ob peb limtiam ntxiv no, ua ntej uas peb yuav tau tus nqe pheej yig, ua ke no los tej zaum ntshe tseem yuav tau them tus nqe roj kim txuas ntxiv ntev tshaj ntawd thiab los kuj tau."
Raws li Vivek Dhar uas yog ib tug economist uas paub zoo txog tej peev txheej thiab roj ntawm mining Commonwealth Bank tau qhia rau lub chaw nthuav xov xwm ABC, ces txawm tias tej kev pauv hloov rau tej nqe roj no tseem tsis tau nce kim heev, los tej kws tshuaj ntsuam yeej tau xub kwv yees lawm tias, ntshe tseem yuav tsis tau muaj cov kev txo nqe roj ntawm tej chaw muag roj rau ob peb limtiam ntxiv no thiab.
Tsoom fwv teb chaws los kuj tau tsub se rau tej roj kim tuaj ntxiv ntawm 46 cents ua 48 cents rau ib litre twg txij hnub tim 1 lub 8 hli ntuj no raws li tej nqe khoom thiab nqe services lawm thiab.
Ces Ford thiaj tau hais tias ntshe tej xwm txheej no kuj yuav ua rau tej nqe roj ib nyuag kim zog rau tej neeg yuav roj siv thiab.
Vim li cas thiaj muaj ib txhia chaw muag roj muag kim dua?
Ib txhia neeg tsav tsheb yuav tau them nqe roj kim tshaj tej nqe roj nruab nrab ntawm teb chaws no, thiab tej nqe roj los yeej sib txawv heev ntawm tej chaw muag roj rau ntawm tib thaj chaw twg thiab.
Ces Ford thiaj hais tias thiaj muaj ntau yam laj thawj sib chab sib chaws, tab sis kuj nyob ntawm seb ib lub nroog twg ho muaj cov nqe roj hloov raws caij li cas xwb thiab.
Tej chaw muag roj los kuj muaj peev xwm muag roj raws li tej nqe lawv teeb thiab lawv yeej yuav roj rau lub caij sib txawv thiab tej nqe roj sib txawv thiab.
Ford tau hais tias "Piv txwv li, yog tias koj yuav roj ntawm lub khw muag roj loj ob limtiam dhau los, los sis yog rau lub caij thaum xaus lub 7 hli ntuj ntawd, ces koj tau them nqe roj pheej yig dua txog li 13 cents rau ib litre twg, tab sis yog koj yuav roj hnub tam sim no ces tej zaum koj yuav tau tsub tus nqe roj kim tuaj ntxiv no rau tej customers them."
"Tej zaum kuj yuav yog tias lub chaw muag roj A ntawm lwm sab kev, twb tau yuav roj thiab khaws cia ib ntus lawm ces thiaj muag tus nqe pheej yig zog, hos lub chaw muag rog B ces ho yuav tej roj rau lub caij uas tus nqe roj yuav ntawm tej chaw muag roj loj kim zog ces thiaj muag roj kim dua."
Tsis tas li ntawd los ib txhia chaw muag roj kuj txiav txim siab txo nqe roj pheej yig dua lwm lub chaw muag rog kom thiaj muaj neeg mus yuav ntau dua thiab.
Yuav nrhiav li cas thiab yuav roj thaum twg thiaj yuav tau roj pheej yig
Raws li Ford tau hais, ces tam sim no tej neeg tsav tsheb yeej muaj peev xwm siv tau cov apps thiab tej xov xwm muaj ntawm ib lub xeev twg los pab txheeb seb ho yuav tau roj pheej yig qhov twg kom thiaj tsis txhob tau them nqe roj kim.
Nws thiaj tau hais tias "Yog yus siv sij hawm ob peb ntiag tiv caij tsheb mus nrhiav yuav roj ntawm lwm qhov chaws ces tej zaum kuj yuav pab kom yus txuag tau nyiaj me ntsis thiab."
Nws kuj xav kom tej neeg kub siab txog tej khw supermarket cov nqe roj pheej yig los yog lwm cov reward programs kom thiaj li pab txuag tau ob peb dollars txhua zaus uas yus sam roj tsheb thiab.
- With additional reporting by AAP.
