Ntsiab lus tseem ceeb:
- Limtiam dhau los ces nyiaj Australia muaj nqe los tau 4 lub hli no lawm.
- Thiaj yeej muaj nqes tshaj ntau yam nyiaj ntawm cov teb chaws Asia.
- Tab sis kuj tsis tshua muaj nqe tsawg dua nyiaj Euro thiab nyiaj Pound.
Puas yog koj tseem xav tias xav mus ncig txawv teb chaws? Tej zaum tsim nyog kok xaiv mus ncig cheeb tsam teb chaws Asia yuav zoo dua cheeb tsam Europe rau ntau limtiam yuav los txog no yog tias koj xav tau txais txiaj ntsim los ntawm nyiaj Australia muaj nqe tuaj ntxiv no.
Los txog lub limtiam dhau los ces nyiaj Australia muaj nqe los tau 4 hlis, vim muaj neeg xav tias ntshe tseem yuav nce kab theem paj ntxiv, thiab kuj muaj xov xwm qhia tias Suav tuam tshoj yuav npaj tswv yim los pab kom nws tej lagluam zoo tuaj ntxiv.
Diana Mousina uas yog ib tug senior economist ntawm lub tuam txhab AMP tau hais tias “Tab sis tej zaum tej xwm txheej lagluam ntawm Suav tuam tshoj kuj yuav yog tej yam zoo rau nyiaj Australia thiab, vim tej neeg yeej ntseeg tias Suav cov lagluam ruaj khov yog tej yam zoo rau Australia, vim txhais tau tias ua rau muaj neeg xav yuav peb tej khoom xa muag txawv teb chaws."
Tab sis nyiaj Australia kuj tau nce thiab nqes ua ntuv zus thiab yeej tsis muaj nqes npaum li nyiaj Meskas, uas yog ib cov nyiaj uas tej neeg tshuaj ntsuam txog tej kiab khw lagluam yeej ib txwm piv nrog ntawd.
Ms Mousina tau hais tias nyiaj Australia yeej pauv tau nyiaj Meskas li ntawm 65 txog 70 cents rau lub sij hawm 8 hli dhau los no, thiab yeej tsis muaj nqes li keeb kwm tau muaj dhau los.
Tsis tas li ntawd los nws kuj tau hais tias ntshe ntiaj teb tej lagluam tsis tshua zoo rau lub sij hawm 1 xyoos ntxiv no kuj yuav ua rau muaj teeb meem rau nyiaj Australia tej nyiaj, tab sis tej zaum kuj yuav pab kom tej nqe khoom tau nqe zoo thiab ntshe kuj yuav nce kab theem paj ntxiv thiab.
Ntxiv no yog nyiaj Australia (Australian dollar - AUD_piv nrog rau tej nyiaj thoob ntiaj teb no:
Qhov zoo
Japan
Raws li Tony Sycamore uas yog IG Markets analyst tau qhia rau SBS News ces yog lub caij zoo
Nyiaj Australia muaj nqe tuaj ntxiv txog li 7.1 feem pua piv rau nyiaj Japanese yen txij lub 10 hli ntuj xyoo 2022. Uas nyiaj Australia ib dollar pauv tau 97 yen.
The Australian dollar has been strong against the Japanese yen. Source: AAP / Kimimasa Mayama/EPA
Nws tau hais tias “Yuav ua rau yus tau txais txiaj ntsim ntau npaum li qhov yus tsim nyog tau - vim tej nyiaj no yeej tsis muaj nqes xwm yeem yuav laug txog 20 xyoo lawm."
Ms Mousina tau hais tias nyiaj yen yeej muaj nqes tsawg zog vim lub teb chaws no lub txhab nyiaj faj seeb haiv tseem cia tej kab theem paj qes heev.
Lub 10 hli ntuj tsaib no ces Japan yeej tau qhib nws lub teb chaws rau tej neeg ntoj ncig mus ncig lawm thiab kuj yog ib lub teb chaws muaj neeg nyiam mus ncig thiab neeg Australia nyiam mus caij skii, tom qab uas tau muab kaw nruj heev rau lub caij muaj kab mob coronavirus kis thoob ntuj.
Suav tuam tshoj (China)
Nyiaj Australia kuj muaj nqes ntxiv ntawm teb chaws Suav lawm, thiab yeej muaj nqes ntau tuaj ntxiv yuav laug txog li 10 feem pua piv rau nyiaj Suav (Renminbi - CNY) txij lub 10 hli ntuj tsaib no.
Mr Sycamore tau hais tias “Yog piv nyiaj Australia nrog nyiaj Suav (CNY) ces yeej tau nqe zoo heev rau lub sij hawm 6 limtiam dhau los."
"Thiab yog yus xyuas rau thaum lub 10 hli ntuj, ces pom tau tias nyiaj Australia ib dollar yeej pauv tau nyiaj Suav txog li ntawm 445 CNY, tab sis tam sim no twb pauv tau txog li 489 CNY lawm, txhais tau tias nyiaj Australia yuav tau Suav cov nyiaj yuam ntau dua txog li 10 feem pua lawm."
Nws tau hais ntxiv tias Suav lub txhab nyiaj faj seeb haiv los kuj txo nws tej kab theem qev nyiaj limtiam dhau los lawm thiab uas yog ib co tswv yim siv coj los txhawb nqa lagluam, uas tej zaum yuav pab kom Australia cov nyiaj muaj nqes ntxiv.
Indonesia
Kuj muaj xo zoo rau tej neeg Australia uas tau npaj yuav mus ncig Bali (los yog Indonesia lwm cov pov txwv thiab) - vim nyiaj Australia yeej pauv tau nyiaj Indonesia rupiahs ntau tshaj 7.82 feem pua txij tsaib no lub 10 hli ntuj lawm. Thiab nyiaj Australia ib dollar yeej pauv tau 10,290 rupiahs.
6 hli dhau los kuj pauv tau tsawg thiab tom qab tsaib no los uas thaum tau sab laj txog tias seb puas muaj cib fim rau tej lagluam tsis zoo thawj zaug ntawd ces kuj pauv tau ntau tuaj ntxiv sai heev lawm.
Tej neeg Australia uas tab tom npaj yuav mus ncig Bali los yeej thaum mus txog, tom qab tau muaj neeg txawv teb chaws coj cwj pwm tsis hwm tej neeg zos ntau zaus.
Canggu beach, just north of Kuta and Seminyak in Bali, Indonesia Source: AAP, Press Association / Sergi Reboredo/Alamy
India
Nyiaj Australia los kuj muaj nqes tuaj ntxiv txog li 10.1 feem pua piv rau India cov nyiaj rupee thaum lub 10 hli ntuj tsaib no thiab. Vim ib dollar twb pauv tau 56 rupees lawm.
Txawm li cas los kuj tau ib nyuag pauv tau tsawg zog txij li lub 2 hlis ntuj xyoo no lawm thiab, tab sis kuj yeej tseem yog ib co xwm txheej uas nyiaj Australia muaj nqe dua nyiaj India lub sij hawm 3 xyoo dhau los thiab.
Norway thiab Sweden
Txawm tias nyiaj Australia yeej pauv tau nyiaj Euro tsawg (saib hauv qab no), los kuj txawv rau qee lub teb chaws Europe thiab.
Nyiaj Australia yeej pauv tau nyiaj Norway thiab Sweden ntau dua thiab pauv tau ntau txog 10 lub xyoo txog rau thaum ntxov xyoo no nrog Norway cov nyiaj krone thiab Swdeden cov nyiaj krona.
Koj ib dollar nyiaj Australia yuav pauv tau nyiaj Norway 7.2 krone thiab pauv tau nyiaj Sweden 7.3 krona
Stockholm, Sweden. The Australian dollar is buying about 7.3 Swedish krona. Source: AAP / James Lane
Qhov chaw uas yuav muaj teeb meem sib chab sib chaws me ntsis
United States (Meskas)
Yog xam raws li cov kev sib pauv nyiaj rau lub caij luv luv lawm, ces nyiaj Australia yeej muaj nqes dua nyiaj Meskas (US dollar - USD), thiab yeej pauv tau ntau ntxiv txog li 11.1 feem pua txij lub 10 hli ntuj tsaib no.
Mr Sycamore tau hais tias yog xav raws li qhov no, ces tej zaum yuav muaj neeg Australia yuav mus ncig teb chaws Meskas los yog lwm cov teb chaws uas siv nyiaj Meskas (USD) li Costa Rica, Pueto Rico, Ecuador los yog lwm cov teb chaws Latin America uas yeej kam siv.
Tab sis txij li xyoo 2021 los ces kuj pauv tau tsawg lawm, thiab yeej pauv tau tsawg dua tej kab theem pauv nyiaj ua ntej yuav muaj kab mob coronavirus kis thoob ntuj lawm thiab. Tam sim no ces nyiaj Australia tsuas pauv tau nyiaj Meskas (USD) txog li 68 cents xwb.
Thiab yog tham txog yav tom ntej lawm, ces lub txhab nyiaj Commonwealth Bank (CBA) yeej tau kwv yees tias nyiaj Australia ib dollar twg yuav pauv tau nyiaj Meskas (USD) 62 cents rau lub caij 3 hlis ntuj txog lub 9 hlis ntuj tom ntej no, thiab yuav pauv tau txij li 65 cents mus txog ntua lub 3 hlis ntuj xyoo 2024.
Nyiaj Australia ib dollar twg yeej pauv tau nyiaj Meskas (USD) txij li ntawm 62 cents mus txog 71 cents xwb. Source: SBS
Cov teb chaws Turkey, Lebanon thiab Argentina
Tej teb chaws no tej nyiaj yeej tsis muaj nqes, txhais tau tias nyiaj Australia yeej pauv tau tej nyiaj no ntau heev.
Tab sis tag nrho tej teb chaws no tej nyiaj yeej poob nqe ntau heev, Turkey tej nyiaj poob nqe txog li ntawm 40 feem pua, Lebanon tej nyiaj poob nqe txog li 269 feem pua, thiab Argentina tej nyiaj yeej poob nqe txog li ntawm 114 feem pua diam.
Txhais tias yeej tsis muaj peev xwm yuav twg tau tias tej nqe khoom yuav zoo li cas li thiab tej zaum tej nqe khoom yuav kim heev li.
New Zealand
New Zealand yog ib lub teb chaws nyob ze uas tej neeg ntoj ncig Australia nyiam mus ncig tshaj plaws.
Nyiaj Australia ib dollar twg ces yeej pauv tau nyiaj New Zealand ib nyuab tsawg me ntsis txij lub 10 hli ntuj tsaib no los lawm, tab sis kuj rov qab pauv tau ntau heev tuaj rau lub sij hawm 3 limtiam dhau los no lawm, rau lub caij uas tau muaj kev kwv yees tias lagluam yuav tsis zoo ntawm New Zealand. Ces thiaj ua rau nyiaj Australia ib dollar twg pauv tau nyiaj New Zealand (NZD) txog li $1.10 tam sim no.
Lub teb chaws no tej lagluam los yeej tsis tshua zoo rau lub sij hawm 6 hli lawm thiab, ces ntshe haj yam yuav ua rau nws tej nyiaj poob nqe ntxiv.
Tauranga viewed from Mount Maunganui, New Zealand. One dollar is worth about NZD$1.10 at the moment. Source: AAP, SIPA USA / Gado Images
Qhov chaw uas tsis zoo
Europe
Nyiaj Australia yeej pauv tau nyiaj Euro tsawg dua txog li 1.75 feem pua, uas yog cov nyiaj uas 20 lub teb chaws ntawm cheeb tsam Europe siv lawm.
Mr Sycamore tau hais tias "Yog yus rov qab xam txog tsaib no, ces yeej muaj ntau yam li tej tsov rog ntawm Ukraine, tej teeb meem nqe roj/gas/hluav taws xob thiab tej nqe khoom, thiab Russia tej teeb meem lagluam, uas tau ua rau muaj teeb meem loj heev rau tej nyiaj ntawm cheeb tsam Europe.''
"Txawm li cas los Europe tej lagluam yeej muaj peev xwm ntxeem dhau tej teeb meem no zoo tshaj qhov sawv daws xav tseg lawm thiab."
Nyiaj Australia ib dollar tsuas pauv tau 0.62 Euros xwb.
The Australian dollar is down against the euro. Source: SBS
Teb chaws Aaskiv (United Kingdom - UK)
Lwm lub teb chaws uas tej neeg Australia muaj passport nyiam mus ncig ces yog teb chaws Aaskiv, tab sis nyiaj Australia yeej pauv tau nyiaj pound tsawg dua txog li ntawm 2.64 feem pua lawm.
Nyiaj Australia ib dollar tsuas pauv tau nyiaj Aaskiv 54 pence xwb, thiab yog ib cov kab theem pauv nyiaj uas yeej nqes xyoo no.
Mexico
Tej neeg Australia uas nyiam mus ntoj ncig rau ntawm cov teb chaws lub caij ntuj so, ces tej zaum tsis txhob mus ntoj ncig ntawm Mexico, vim nyiaj Australia ib dollar twg twg pauv tau Mexico cov nyiaj peso tsawg dua li 5 feem pua txij lub 10 hli ntuj tsaib no los lawm. Vim koj ib dollar twg tsuas pauv tau 11.7 pesos tam sim no xwb.
