Hnub haiv ntawm txhua lub teb chaws sawv cev rau dab tsi?

Txhua lub teb chaws hauv ntiaj teb - tsuas tsis suav ob lub xwb - nyias yeej muaj nyias hnub haiv (National Day), thiab nyias yeej muaj nyias ib zaj keeb kwm rau hnub no, tab sis yeej ua koom txoos nco txog cov hnub haiv no raws tej laj thawj muaj ntsis zoo sib xws thiab.

National days exist in almost every country to foster a sense of unity, belonging and cohesion.

Ntsiab lus tseem ceeb:

• Australia hnub haiv ces yog hnub tim 26 lub 1 hlis ntuj.
• Tsuas muaj ob lub teb chaws hauv ntiaj teb thiaj tsis ua kev zoo siab rau lawv cov hnub haiv xwb.
• Cov hnub haiv ntawm tej teb chaws feem coob ces yeej ua koom txoos zoo siab rau kev tau txais kev ywj pheej los ntawm cov kev nyob qab tswj hwm ntawm cov teb chaws Europe uas tuaj nam nias tswj hwm.

Australia Day ces yog hnub tim 26 lub 1 hlis ntuj, thiab yog haiv neeg no ib hnub so rau zej tsoom txij xyoo 1994 los lawm.

Yog hnub cim txog neeg Askiv tej nkoj tau tuaj txog ntawm Sydney Cove, uas tam sim no yog xeev New South Wales (NSW) xyoo 1788 thiab tuaj txhos tus chij Union Flag thawj zaug.

Muaj ib txhia neeg Australia ntseeg tias yog ib hnub ua kev zoo siab rau lwm pawg neeg, suav cov tej neeg txum tim coob heev nrog, tab sis ib txhia kuj xav tias yog hnub tu siab thiab yog hnub rov qab xav txog yav dhau los thiab npaj rau yav pem suab.

Yuav laug txhua nrho tej teb chaws nyias yeej muaj nyias ib hnub haiv, thiab nyias yeej muaj nyias ib zaj dab neeg rau hnub haiv no, thiab yeej muaj tej laj thawj muaj ntsis sib xws rau cov kev ua kev zoo siab rau cov hnub haiv no.

Vim li cas ntau lub teb chaws thiaj muaj cov hnub haiv?

Raws li Samantha Owen uas yog ib tug kws keeb kwm thiab yog tus neeg teeb txheeb ntawm tsev kawm qib siab Curtin University hais ces cov hnub haiv yog coj los qhia rau tej neeg tias ''lawv ntseeg ib lub tswv yim ntawm ib haiv neeg thiab nws sawv cev rau ib yam dab tsi''.

Thiab raws li ib txwm pom, ces hnub xaiv los ua hnub haiv yeej ib hnub tseem ceeb ntawm ib lub teb chaws uas tau pab kom haiv neeg muaj lub cim haiv.

Nws tau hais tias "Yuav kom tsim tau cov hnub so rau ib haiv neeg twg, mas tej pej xeem yuav tsum tau pom zoo raws tib seem tias xaiv hnub twg, thiab ho yuav ua dab tsi coj los ua kev zoo siab rau hnub ntawd, coj los ua cov kev sawv cev zoo tshaj plaws rau haiv neeg ntawd."

Puas muaj ib co teb chaws twg uas tsis muaj hnub haiv?

Tsuas muaj ob lub teb chaws hauv ntiaj teb no xwb thiaj tsis muaj hnub haiv uas yog teb chaws Askiv (United Kingdom-UK) thiab Denmark xwb.

Yog thawj zaug ntawm kee tiam 20 uas teb chaws UK tau ua kev zoo siab rau hnub Empire Day tim 24 lub 5 hlis ntuj, tab sis vim tej neeg ho hloov lawv cov kev xav lawm ces thiaj tau muab tso tseg rau xyoo 1958 lawm.

Denmark yeej muaj hnub haiv uas yog hnub tim 5 lub 6 hli ntuj, uas yog hnub nco txog cov kev kos xyeem mem tes rau Danish tsab txhooj cai tswj haiv (Danish Consitution).

Askiv (United Kingdom - UK) thiab Denmark thiaj tsuas yog ob lub teb chaws hauv ntiaj teb uas thiab tsis muaj cov hnub haiv xwb.

Puas yog cov hnub haiv no zoo tib yam li cov hnub tau txais kev twj lij ywj pheej?

Yeej tau muaj ntau lub teb chaws thoob ntiaj teb — suav teb chaws Meskas (United States), India thiab Chile — uas yeej ua kev zoo siab rau lawv cov hnub haiv uas nco txog lawv cov kev tau txais kev tswj hwm twj lij ywj pheej tsis nyob qab tswj hwm ntawm cov teb chaws Europe uas mus nam nias tswj hwm lawm.

Txawm li cas los yeej muaj ib txhia teb chaws cov hnub haiv yeej tsis ua rau hnub ntawd thiab.

Piv txwv li Bhutan yeej tsis ua kev zoo siab rau hnub tau txais kev ywj pheej xyoo 1949 tas li yog hnub haiv. Tab sis nws ho ua kev zoo siab nco txog xyoo 1907 uas tau teeb tsa huab tais Ugyen Wanchuck.

Tsuas yog cov teb chaws li United States, Chile thaib India xwb thiaj yog qee cov teb chaws ntau ntau lub uas lawv cov hnub haiv kuj yog lawv cov hnub tau txais kev ywj pheej thiab.

Yeej muaj cov hnub haiv ntau heev uas ua kev zoo siab rau cov kev hloov kev tswj hwm tshiab

Tom qab cov hnub tau txais kev twj lij ywj pheej lawm, ces cov koom txoos nco txog cov kev hloov kev tswj hwm tshiab los yog tej koom txoos tseem ceeb uas tau tshwm sim rau lub caij hloov kev tswj hwm tshiab yog ib co hnub tseem ceeb rau cov hnub haiv.

Fabkis hnub haiv yog hnub tim14 lub 7 hli ntuj, uas sawv daws paub tias yog hnub Bastille Day, thiab yog hnub cim txog kob tsov rog sib tawm tsam ntawm Bastille, uas yog Fabkis ib lub yeej tub rog thiab lub tsev laj cuj uas nom tswv tau teev tias yog French Revolution uas thaum kawg tau ua rau muaj kev teeb tsa lub teb chaws Fabkis (French Republic).

Muaj ib cov teb chaws kuj ua kev zoo siab rau lawv cov hnub haiv rau hnub uas sau haivlos ua lub teb chaws los yog hnub tseem ceeb rau cov kev pauv hloov tej laj fai tseem ceeb. Canada hnub haiv ces yog hnub uas tau muaj nws peb lub xeev tau sib tsau los tsim lub teb chaws Dominion of Canada rau hnub tim 1 lub 7 hli ntuj xyoo 1867.

Hnub Freedom Day ces yog teb chaws South Africa hnub haiv uas yog hnub tim 27 lub 4 hlis ntuj, thiab yog hnub nco txog lub teb chaws no thawj cov kev xaiv tsa tom qab tau tso tseg tsis siv cov kev tswj hwm uas cov neeg dawb cais cov neeg dub thiab tau los tsim tej txhooj cai tswj haiv tshiab siv.

Fabkis (France), South Africa thiab Canada thiaj yog cov teb chaws uas teev lawv cov hnub haiv rau hnub uas lawv ua kev nco txog cov kev hloov kev tswj hwm los yog cov kev sau los ua ib haiv.

Lwm cov hnub haiv ne ho sawv cev rau dab tsi?

Hnub haiv ntawm teb chaws Thaib (Thailand) thiab Netherlands ces cuam tshuam nrog rau huab tais hnub yug, txhais tias yuav hloov cov hnub no raws li tus huab tais tshiab lub hnub yug.

Teb chaws Portugal hnub haiv ces yog hnub tim 10 lub 6 hli ntuj, uas yog hnub Luis de Camoes uas yog tus neeg txhawb nqa kom teb chaws no paub ntaub ntawv thiab yog tus neeg sau paj huam tau nruam sim rau xyoo 1580.

Teb chaws Spain ua kev zoo siab rau hnub haiv Fiesta Nacional de España rau hnub tim 12 lub 10 hli ntuj, uas yog hnub Columbus pib caij nkoj mus rau cov nrim teb chaws Americas, uas raug tib ntau zuj zus tuaj rau ntau xyoo tsis ntev los no hais tsi ntsees rau cov kev tib tsis pom zoo los ntawm cov teb chaws Latin America.

Greenland hnub haiv yog hnub tim 21 lub 6 hli ntuj, "thiab yog hnub ntev tshaj plaws thiab hnub tshav ntuj tshaj plaws ntawm lub xyoo'' thiab ''kuj yog hnub ntuj xaiv'' rau lub teb chaws pov txwv uas nyob nruab nrab ntawm hiav txwv Arctic thiab Atlantic, raws li tus tsoom fwv tswj hwm ywj pheej ntawm Denmark nrim av no hais.

Spain, Portugal thiab teb chaws Thaib (Thailand) yog cov teb chaws uas muaj lawv cov hnub haiv los ua koom txoos nco txog ib yam xwm txheej dab tsi dua lawm cov teb chaws feem coob.

Puas yog cov hnub haiv no tseem tseem ceeb thiab?

Raws li Dominic O’Sullivan uas yog ib tug zeskais uas paub zoo txog cov kev sib piv ntawm neeg txum tim tej laj fai kum xeeb thiab zej tsoom tej cai ntawm tsev kawm qib siab Charles Sturt University hais ces txawm tias cov hnub haiv no tsim nyog yuav yog cov kev ua kev zoo siab, los ''kuj ua rau tej neeg xav paub tias ho muaj qhov zoo qhov phem dab tsi txog ib lub teb chaws thiab''.

O’Sullivan tau hais tias “Cov hnub no ces tej zaum kuj yuav yog cov hnub ua kev zoo siab los yog cov hnub tu siab rau lwm tus, los sis yog ib qho me ntsis ntawm ob hnub no ua ke, ces cov hnub no thiaj ua rau muaj lus nug tias ''haiv neeg muaj lub ntsiab lus txhai li cas tiag?''

- Additional reporting by Rachael Knowles, Rayane Tamer and Isabelle Lane

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.