Tej tej num hlais nqaij los yog tej chaw hlais nqaij yog ib cov chaw uas yuav raug kev phom sij kis tus kab mob COVID-19 sib kis tau yooj yim dua lwm cov chaw ua hauj lwm. Tej kws paub zoo txog tej kab mob sib kis no qhia tias tim yog tej huab cua txias thiab tej chaw hlais nqaij ti heev tsis tas li no los tseem muaj tej cua qhuav heev thiab.
Ntxiv ntawd los yeej tseem muaj tej dab neeg muaj ntsis zoo sib xws li no thoob ntuj thiab. Vim yeej tau muaj neeg sib kis tus kab mob no ntawm ntau thaj chaw tua tsiaj thiab tej chaw hlais nqaij ntawm teb chaws America thiab. Lub koom haum tswj kab mob yeej txheeb tau li no rau nws cov kev teeb txheeb tau muaj rau lub 5 hlis ntuj dhau los thiab tau coj los qhia tshiab rau lbu 7 hli ntuj no tias yeej muaj neeg kis tau tus kab mob coronavirus txog li 17,358 tus ntawm tej chaw hais nqaij thiab chaw nqhais nqaij qaib. Thiab yeej muaj 9 1 tug neeg ua tej hauj lwm no tau tas sim neej lawm.
Nyob rau pwm cheeb Europe ntawd los kuj muaj tus kab mob no sib kis rau tej chaw tua tshiaj ntawm teb chaws Fabkis, Germany thiab teb chaws Askiv (United Kingdom) thiab.
Hos ntawm teb chaws Australia no los yeej muaj neeg kis tau tus mob coronavirus no ntawm Melbourne lub chaw hlais nqaij Cedar Meats uas yog thaj chaw muaj neeg kis tau tus mob no tshaj 100 tus neeg thiab yog thaj chaw tua tshiaj uas cuam tshuam txog cov kev kis tus kab mob no. Tsis ntev los no, los yeej tseem muaj 2 lub chaw tua tsiaj ntawm nroog Melbourne ntxiv li Somerville Meats thiab JBS Meats los kuj yog cov chaw uas yeej muaj lawv tej neeg ua hauj lwm kis tau tus mob no ces lawv thiaj li muab tej neeg ua hauj lwm xa mus tsev kiag tamsim ntawd lawm.
Ho muaj dab tsi cuam tshuam txog cov kev hlais nqaij no?
Vim tej neeg yuav tau ua hauj lwm ntev, nyob sib ze nrog lwm tus ntev heev, thiab tsis muaj peev xwm nyob kom nrug ntawm lwm tus, qhov no txhais tau tias ua rau tsis muaj peev xwm siv tau tej cai COVID-Safe los tswj tej chaw tua tsiaj no.
Associate Professor Paul Griffin ntawm lub koom haum Mater Health hais tias "Muaj tej tshuab thiab tej twj ntau heev uas tsis muaj peev xwm yuav muab tshem kom txhob nyob siv ti. Tsis tas li no los tej neeg ua hauj lwm tau siv sij hawm ua hauj lwm ntev thiab rau siab ua hauj lwm hnyav heev, ces lawv thiaj tsis muaj peev xwm siv tej tswv yim los tiv thaiv tej neeg.
Dr Fiona Stanaway thiaj qhia txog 2 co laj thawj uas ua rau muaj tus kab mob no sib kis rau ntawm tej chaw hlais nqaij los yog tej chaw tua qaib tias yog tiam muab tej twj no teeb sib ze, huab cua txias thiab tej cua qhuav heev.
Nws pom zoo tias cov kev teeb tej chaw hlais nqaij yeej ua rau tej neeg yuav tau ua hauj lwm sib ze heev thiab ua hauj lwm nyob ua ke ntau teev heev ces thiaj ua rau tej neeg ua hauj lwm tsis muaj peev xwm nyob kom nrug ntawm lwm tus neeg.
Dr Fiona Stanaway uas yog ib tug peb zoo txog cov kev sim seb puas muaj kab mob sib kis ntawm Melbourne University hais tias "Cov kev muaj ib pawg neeg ua hauj lwm nyob sib ze ua ke heev rau ib thaj chaw ntom nti yuav ua rau muaj teeb meem phom sij kis tau tus kab mob no."
Vim tus kab mob virus no sib kis raws cov kua qaub ncaug los yog kua tswg ntawm tej chaw tua tsiaj uas muaj tej huab cua txias thiab cov ua qhuav heev no. Dr Stanaway tshab txhais txog tias txawm cov huab cua txias yuav pab kom txhob muaj lwm cov kab mob sib kis los haj yam ua rau kis tau tus kab mob COVID-19 no zoo xwb.
Raws li Dr Stanaway tau qhia rau The Feed ces nws hais tias "Vim tej chaw no pab kom tej teev qaub ncaug los yog kua ntswg nyob ua ke ces yuav ua rau tus kab mob virus no nyob tau ntev dua tej chaw uas muaj cua kub sov thiab vaum."
"Tsis tas li no los tej tau hais no yog tias ho muaj ib tug neeg kis tau tus mob no lawm ces tej zaum yuav kis tau rau lwm tus zoo heev thiab."
Thiab vim cov laj thawj uas kab mob virus nyob tau ruaj dua rau tej chaw txias dua ces thiaj ua rau tus kab mob COVID-19 no nyob tau ntev dua rau ntawm tej npoo hlau thaum huab cua txia ntawd.
Tus kab mob COVID-19 no puas kis tau raws tej nqaij ntim muag thiab?
Kis tsis tau. Tej kws paub zoo txog tus kab mob no yeej qhia meej tseeb lawm tias tsis muaj dab tsi yuav qhia tau tias muaj feem cuam tshuam ua rau tej nqaij hlais raug qhwv thiab ntim muag ntawd li.
Zeskais Cowie hais tias "Kuv yeej tsis paub tias muaj ntaub ntawv tau teev zwm hauv ntiaj teb no tias muaj neeg kis tau tus mob COVID-19 uas cuam tshuaj txog tej nqaij hlais uas raug qhwv thiab ntim ua ib pob ib thooj no li."
"Tus kab mob no yog ib tug kab mob sib kis rau yus tej khoom ua pa ua kis tau raws cov tee qaub ncaug thiab kua ntswg uas hnoos thiab txham tawm ntawd."
Cov kev sib kis tus kab mob no ntawm tej neeg zejzog
Tej neeg uas kis tau tus kab mob no ntawm tej neeg zejzog qhia tau tias tus kab mob no sib kis loj npaum li cas ntawm tej chaw tua tsiaj. Dr Stanaway tau siv cov piv txwv neeg sib kis tus kab mob no ntawm ntawm teb chaw America tej neeg zejzog uas muaj neeg kis coob tshaj tej sib kis ntawm Australia tej zejzog, thiab qhia tias ho muaj teeb meem rau cov kev sib kis kab mob li cas ntawm tej chaw hlais nqaij.
Dr Stanaway hais tias tus neeg ua hauj lwm uas kis tau tus kab mob virus ntawm tej zejzog muaj peev xwm kis tau tus kab mob no yooj yim hev rau tej chaw hlais nqaij, tej tsev laus, los yog tej tsev siab ntau tshooj--vim tej chaw li hais no yog cov chaw pab kom kis tau tus kab mob no.
Nws hais tias yog li ntawd thiaj li yuav tsum tau siv cov tswv yim li tau siv tam sim no ntawm xeev Victoria los tswj xws li kaw zejzog txwv tsis pub neeg tawm, kom tej neeg mus sim kom ntau tuaj ntxiv thiab yuav tau txheeb thiab nrhiav tias seb tej neeg tau nyob ze nrog tus kis tau tus mob ntawd nyob qhov twg.
"Vim thaum muaj neeg sib kis tau tus kab mob no coob heev ntawm tej zejzog lawm, ces yuav muaj kev phom sij kis tau tus kab mob no coob heev lawm," raws li Dr Stanaway tau qhia.
Yuav tsum tau ua dab tsi?
Yeej tau muaj neeg mus sim coob tuaj ntxiv thiab yeej tau mus nrhiav tej neeg kis tau tus mob no los yog tau nyob ze nrog tus neeg kis tau tus mob no seeb mus rau qhov twg rau ntau hlis tsis ntev los no lawm. Dr Stanaway hais tias tej neeg ua hauj lwm hlais nqaij los yog ntawm tej chaw tus tshiaj uas muaj cov yam ntxwv mob ntawd tsim nyog yuav mus sim kom sai li sai tau tab sis yeej yuav tau ua tib zoo yaum thiab hais kom lawv pom zoo mus sim.
"Vim yog ua tau li ntawd thiab yog muaj peev xwm nrhiav tau tej neeg tau nrog tus neeg mob ntawd nyob ua ke ces yuav muaj peev xwm tiv thaiv tau thaum ntxov kom txhob kis tau rau lwm tus."
Tsis li ntawd ces, yeej yuav muaj tus kab mob virus no sib kis hauv tej neeg zejzog coob tuaj ntxiv thiab yuav tswj tau tus mob no nyuaj zog lawm.
Tab sis zeskais Cowie xav tias yuav tsum tau muaj qee cov kev pauv hloov rau tej chaw ua hauj lwm thiab.
Yeej paub tias tsim nyog tej neeg yuav tau nyob kom nrug ntawm lwm tus li 1.5 metres, tab sis yeej tsis yog tej yam ua tau yooj yim rau ntawm tej chaw tua tsiaj li--yog li ntaws nws thiaj xav kom tej neeg ua hauj lwm ntawm tej chaw hlais nqaij no yuav tsum tau hnav khaub ncaws tiv thaiv, siv ntaub npog qhov ncauj thiab coj tsom hiav los tiv thaiv lawv tus kheej.
"Yog tias li cas los lug tsis tau li lawm thiab tej neeg pheej ua hauj lwm nyob sib ze heev ces lawv yuav tsum tau qhia kom tej neeg no paub siv cov twj li hais saum toj no los pov puag lawv tus kheej," raws li zeskais Cowie tau qhia.
Nws hais tias cov kev hais kom tej neeg ua hauj lwm siv cov twj li hais no -yuav pab kom tej neeg txhob txhawj tias tsam yog yus sawv ze lwm tus neeg uas tej zaum yuav kis tau tus mob no rau yus, vim rau qhov siv sij hawm li 2 hnub diam mas yog kis tau tus mob no mam li muaj cov yam ntxwv mob tshwm sim.
Tom qab txheeb tau tias leej twg yog cov kis tau tus kab mob coronavirus ntawm lub chaw hlais nqaij Cedar Meats lawm ces lawv thiaj tau muab lub chaw hlais nqaij no kaw rau thaum yav lig lub 4 hls ntuj txog rau yav lig lub 5 hlis ntuj, thiab tag nrho tej neeg ua hauj lwm no yeej raug lub tuam chav tswj kev noj qab haus huv thiab pab cuam zej tsoom los ua tib zoo txheeb tias lawv tsis kis tus mob no lawm mas mam li pub rov qab mus ua tau hauj lwm xwb. Tony Kairouz uas yog tus coj lub tuam txhab no rau lub caij ntawd hais tias "Peb lub hom phiaj ces yeej xav xyuas kom tau txais kev nyab xeeb thiab npaj tau tej chaw ua hauj lwm rau tej neeg ua hauj lwm tau txais kev noj qab nyob zoo rau tej neeg ua hauj lwm rau lub caij uas tseem muaj tus kab mob COVID-19 sib kis thoob ntuj no."
Mr Kairouz tau hais tias “Txoj kev nyab xeeb thiab kev noj qab nyob zoo rau txhua tus neeg yog ib cov hauj lwm tseem ceeb tshaj plaws uas peb yuav xub xub kuab siab los nrog xyuas kom tej chaw ua hauj lwm yog ib qho chaw uas tej neeg yeej zoo siab hlo ua hauj lwm kom peb cov lagluam zoo tuaj kom tau txais kev ruaj ntseg rau tej neeg kwv tau nyiaj siv coj los pab rau peb tej neeg ua hauj lwm thiab lawv tsev neeg."
Tab sis tej neeg ua hauj lwm ntawm lub chaw hlais nqaij Cedar Meatstxog ntua rau tom qab ntau hnub uas txheeb tau tias muaj thawj tug neeg kis tau tus kab mob COVID-19 no, thiab lub koomm haum WorkSafe tseem tab tom mus tshuaj ntsuam xyuas cov xwm txheej no lawm xwb.
Yog li xeev Victoria tus coj tswj kev noj qab haus huv thiaj tau qhia rau tej chaw nthuav xov xwm rau 2 hnub zo dhau los no tias lub chaw hlais nqaij Somerville Meats (Somerville Retail Services) thiab JBS Abattoir raug muab kaw tib si lawm thiab yuav tau muab ntxuav kom huv si, tom qab uas muaj ib cov neeg ua hauj lwm raug txheeb tau tias kis tau tus kab mob no, thiab ''tau muab tag nrho tej neeg ua hauj lwm cais tsis pub nyob xyaw lwm tus neeg, thiab tau sim tej neeg sawv daws coob tuaj ntxiv.
Premier Daniel Andrews thiaj tau hais kom tej neeg ntawm xeev Victoria siv ntaub npog qhov ncauj yog tias lawv nyob ze lwm tus neeg thiab tsis muaj peev xwm nyob nrug ntawm lwm tus ntawm zej tsoom taj chaw lawm.
The Feed yeej tau hu nrog lub tuam txhab Cedar Meats, Somerville thiab JBS Meats tham seb lawv puas tawm tswv yim dab tsi tab sis lawv kuj tsis hais dab tsi thiab.
Ntxiv ntawd thiab yuav tsum tau ua zoo xyuas kom txhob muaj tej chaw uas tej neeg nyob sib ti thaum tej neeg ua hauj lwm ntawd mus so thiab, yog li ntawd zeskais Cowie thiaj hais tias yog tej yam zoo uas yuav tsum npaj kom cia ib co neeg mus so rau ib lub caij twg thiab txhob pub tej neeg tib txhij so coob coob ua ke.
“Yog li ntawd thiaj tsis xav kom sawv daws tib txhij so rau tib lub caij, rau tib thaj chaw ua ke."
Tej neeg ntawm nroog Melbourne yuav tsum nyob twj ywm hauv tsev thiab tsuas pub tawm tsev mua ua hauj lwm, kawm ntawv, ua exercise thiab mus tu saib xyuas lwm tus neeg xwb. Tsis tas li no los nom tswv yeej tau taw qhia kom tej neeg siv ntaub npog qhov ncauj thaum mus rau tej tsoom tej chaw thiab.
Tej neeg nyob ntawm teb chaws Australia yuav tsum nyob kom nrug ntawm lwm tus neeg yam tsawg li 1.5 metres. Mus txheeb xyuas lub xeev koj nyob seb ho muaj cov kev txwv dab tsi ntxiv. Thiab yog tias koj tau khaub thuas thiab muaj cov yam ntxwv mob, ces nyob twj yam hauv tsev thiab npaj hu xov tooj nrog koj tus kws kho mob tham los yog hu rau tus xov tooj 1800 020 080 nrog lub xov tooj Coronavirus Health Information Hotline tham tau seb yuav npaj mus siv seb puas kis kab mob coronavirus li cas. Tsis tas li no yeej muaj tej xov xwm qhia txog tus kab mob COVID-19 tau ntawm
Tej neeg nyob ntawm Melbourne tej tsev siab yog leej twg xav tau kev pab cuam ces tsim nyog hu rau Housing Call Centre tus xov tooj 1800 961 054. Yog koj xav tau neeg txhais ntaub ntawv thiab txhais lus ces hu tau rau tus xov tooj 131 450. 2 cov kev pab cuam li hais no muaj kev pab cuam 24 teev 7 hnub rau sawv daws. Yog koj xav tau xov xwm kom ntxaws ntxiv ces txheeb xyuas tau
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
