Xeev Victoria tau muaj neeg kis tau tus kab mob coronavirus tshiab txog li 270 tus ntxiv rau lub caij uas teb chaws Australia muaj neeg kis tau tus kab mob no tshaj 10,000 tus lawm.
Hnub zwj Hli (Monday) tim 13 July 2020 dhau los no twb muaj neeg kis tau tus mob no txog li 177 leej thiab yog hnub 4 ntawm 5 hnub dhau los uas muaj neeg kis tus mob no tshaj 100 leej.
Michael Kidd uas yog tus lwm coj tswj kev noj qab haus huv ntawm xeev Victoria tau qhia rau hnub zwj Quag (Tuesday) tias teb chaws Australia tau muaj neeg kis tau tus kab mob coronavirus yam tsawg li 10,251 leeg txij li tau pib muaj tus kab mob no sib kis txij thaum tau muaj tus kab mob no pib kis thoob ntuj los txog tam sim no.
"Yog tham txog ntaj teb cov kev kis tus kab mob no lawm ces yeej muaj neeg tshaj 13 roob (million) tus raug cej luam tias kis tau tus mob COVID-19 no lawm, thiab yeej muaj neeg tshaj li 571,000 tus tau tas sim neej thoob ntiaj teb no lawm."
Thaum ntxov hnub Tuesday ni, Daniel Andrews uas yog hau xeev Victoria tau hais tias tej neeg uas lawv tseem sam sim mus txheeb tej neeg uas tej zaum tau nyob ze nrog cov neeg kis tus kab mob no ntawm tej chaw uas muaj neeg sib kis tus kab mob no coob tshaj plaws ntawm teb chaws Australia no ces tseem tab tom mus txheeb 242 tus neeg tshiab tias yog li cas lawm.
Mr Andrews tau qhia rau tej neeg tshaj xov xwm tias "Yeej paub lawm tias yog ib cov teeb meem nyuaj kawg vim yuav tau mus txheeb tej neeg coob heev uas peb tsis paub tias tej neeg no tau mus rau qhov twg, lawv tau mus nrog tus neeg twg nyob, thiab tej neeg ntawd yog leej twg, yog li ntawd yuav tsum tau ua tib zoo xyuas kom npaj tau cov tswv yim zoo los lis tau tej hauj lwm no."
Hau xeev Victoria yeej qhia tias yeej tau paj 200 paramedics thiab tej tub rog ze txog li 1000 mus pab tej neeg tswj kev noj qab haus huv lis tej dej num no lawm. Tsis tas li no kuj muaj ib cov neeg uas tsis tau hauj lwm ua ntawm ntau cov tuam txhab li Jetstar, Medibank, Telstra thiab Qantas los kuj tau mus pab txheeb tej neeg no thiab.
Mr Andrews hais tias "Thiaj yog tej yam tsim nyog yuav tau hais kom tej neeg no pab vim rau qhov tias peb muaj hauj lwm ntau zuj zus tuaj ntxiv lawm."
"Vim muaj hauj lwm ntau tuaj ntxiv lawm, ces yuav tsum tau nrhiav neeg kom coob ntxiv los ua hauj lwm thiab. Tsis tas li no los tej neeg ua hauj lwm ntawm tej txhab nyiaj los kuj yuav rau mus xyaum kom paub ua tej hauj lwm no raws li qhov tsim nyog thiab."
Mr Andrews thiaj tau rov qab nqua hu kom tej neeg rov qab mus sim yog tias lawv muaj tej ya ntxwv mob.
“Yog ib tug yeeb ncuab phem heev li. Vim nws sib kis tau yooj yim heev. Thiab kis tau sai heev li."
“Yeej muaj qee yam los yog ntau yam xov xwm qhia tias tej neeg yeej muaj peev xwm kis tau tus kab mob no los tau ib ntus lawm thiab txawm tias lawv tsis muaj cov yam ntxwv mob dab tsi, thiab txawm mob los zoo li yeej muaj tej yam ntxwv mob me ntsis xwb thiab."
Dr Brett Sutton uas yog xeev Victoria tus coj tswj kev noj qab haus huv tau qhia rau hnub zwj Quag (Tuesday) tim 14 July 2020 no tias tej neeg kis tau tus kab mob rau hnub no qhia tau rau peb lawm tias kom tej neeg txhob plhom moj.
"Yeej tseem tsis tau yog peb tej neeg kis coob los yog kis loj tshaj plaws rau ib hnub twg, tab sis peb tseem tsis tau muaj peev xwm nyiaj ntxeem dhau ntawm tus kab mob no thiab. Kuv cia siab tias yuav ua tau li hais ntawd rau lub limtiam no, tab sis yeej tsis muaj peev xwm yuav qhia tau tias yuav tua tau li hais ntawd thiab."
"Peb thiaj yuav tsum kom sawv daws yuav tsum tau ua tej yam yog xwb mas thiaj yuav pab kom tej neeg kis tau tus mob no tsawg."
Yog li ntawd tam sim no xeev Victoria thiaj muaj neeg kis tau tus kab mob coronavirus no txog 4,224 tug lawm.
Tej neeg ntawm nroog Melbourne yuav tsum nyob twj ywm hauv tsev thiab tsuas pub tawm tsev mua ua hauj lwm, kawm ntawv, ua exercise thiab mus tu saib xyuas lwm tus neeg xwb. Tsis tas li no los nom tswv yeej tau taw qhia kom tej neeg siv ntaub npog qhov ncauj thaum mus rau tej tsoom tej chaw thiab.
Tej neeg nyob ntawm teb chaws Australia yuav tsum nyob kom nrug ntawm lwm tus neeg yam tsawg li 1.5 metres. Mus txheeb xyuas lub xeev koj nyob seb ho muaj cov kev txwv dab tsi ntxiv. Thiab yog tias koj tau khaub thuas thiab muaj cov yam ntxwv mob, ces nyob twj yam hauv tsev thiab npaj hu xov tooj nrog koj tus kws kho mob tham los yog hu rau tus xov tooj 1800 020 080 nrog lub xov tooj Coronavirus Health Information Hotline tham tau seb yuav npaj mus siv seb puas kis kab mob coronavirus li cas. Tsis tas li no yeej muaj tej xov xwm qhia txog tus kab mob COVID-19 tau ntawm
Tej neeg nyob ntawm Melbourne tej tsev siab yog leej twg xav tau kev pab cuam ces tsim nyog hu rau Housing Call Centre tus xov tooj 1800 961 054. Yog koj xav tau neeg txhais ntaub ntawv thiab txhais lus ces hu tau rau tus xov tooj 131 450. 2 cov kev pab cuam li hais no muaj kev pab cuam 24 teev 7 hnub rau sawv daws. Yog koj xav tau xov xwm kom ntxaws ntxiv ces txheeb xyuas tau
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
Additional reporting by AAP.
