Victoria muaj neeg kis tau tus kab mob coronavirus txog li 63 tus neeg tshiab thiab muaj 5 tus neeg tas sim neej los ntawm tus kab mob no rau ib hnub dhau los rau lub caij uas hau xeev Daniel Andrews tseem yuav los qhia tias seb nws lub xeev yuav npaj tswv yim li cas los tsem cov kev txwv rau hnub Sunday no.
Ces thiaj ua rau muaj neeg tas sim neej txog 753 leeg thoob plaws teb chaws Australia thiab ua rau muaj neeg tshaj 26,000 tus kis tau tus kab mob no lawm, xeev Victoria los kuj yog lub xeev uas muaj neeg kis tau tus kab mob no coob tshaj plaws tshaj 19,000 tus thiab tas sim neej txog 666 tus lawm.
Yog li tsoom fwv thiab tej nom tswv taw qhia txog kev noj qab haus huv thiaj tau muaj ntau lub rooj sab laj rau yav lig tham txog tias yuav los siv cov kev txwv li cas thiab thaum twg rau nroog Melbourne uas raug txwv theem plaub thiab tej zos cheeb tsam tuaj ntug nroog uas raug txwv theem 3 ntawd.
Yog li ntawd thiaj ua rau tej neeg zejzog ntawm xeev Victoria hais tsis ntsees rau tej neeg Melburnians tseem raug txwv tsis pub tawm hmo ntuj, raug muab tej chaw ua hauj lwm kaw thiab txwv tsis pub tej neeg tawm mus rau tej zejzog los yog tsis pub neeg mus xyuas lwm tus thiaj xav kom nom tswv tso cai ntaug me ntsis rau sawv daws.
Tab sis tej tswv yim uas tej neeg paub zoo txog tej kawb mob ntawm tsev kawm qhib siab Universities of Melbourne thiab New England uas lub chaw nthuav xovxwm ABC tau cej luam ntawd ces yeej yog tej yam tsis tshua zoo pes tsawg.
Tej nom tswv tswj kev noj qab haus huv thiaj ceeb toom rau tej neeg Melburnians tias tseem siv cov kev txwv theem 4 mus txog rau lub 10 hli ntuj nrab xyoo 2020 no.
Lub 8 hli ntuaj ces nroog Melbourne tau los siv cov kev txwv theem 4 rau lub sij hawm 6 limtiam mus txog rau hnub tim 13 lub 9 hli ntuj no raws li nom tswv tau qhia.
Tsoom fwv yeej tau qhia lawm tias sai sai no yuav tso cai rau tej neeg ua nyob tib leeg xwb muaj cai tos ib tug qhua tuaj xyuas nws vim tsoom fwv txhawj xeeb tias tsam tej neeg muaj kev nyuaj siab thiab mob hlwb vim lawv raug cais tsis pub kus koom xyaw nrog lwm tus neeg.
Thiaj ua rau muaj 11 tug neeg tas sim neej rau hnub Saturday dhau los ntxiv rau 661 tug lawm.
Kuj tseem muaj 76 tus neeg raug txheeb tau tias kis tau tus kab mob coronavirus no rau hnub Saturday dhau los thiaj ua rau xeev Victoria tseem muaj neeg txog 1956 tus tseem kis tau tus mob no.
Kuj tau muaj neeg kis kab mob tsawg zog txij li tau siv cov kev txwv theem 3 ntawm nroog Melbourne rau lub 7 hli ntuj thiab tom qab uas tau siv cov kev txwv theem 4 lawm.
Yog li thiaj muaj neeg kis tau kab mob tsawg dua li 100 leej rau ib hnub twg rau yav lig ntawm lub 8 hli ntuj lawm.
Yeej tau muaj ntau tus neeg Melburnians yeej mloog ntsoov hau xeev tej xov xwm qhia txog tej neeg kis tau tus kab mob no txhua hnub seb ho puas tau muaj peev xwm los ua tau lub neej li qub.
Mr Andrews yeej tau hais los ntev lawm tias ntshe tseem yuav tshuav ntawv heev peb mam li rov qab mus pib ua tau lub neej lu qub li thaum tseem tsis tau muaj tus kab mob coronavirus kis thoob ntuj no tab sis yeej cia siab tias yuav muaj peev xwm los ua tau lub neej tshiab thiab.
"Tej tswv yim no yuav pab kom peb ua tau lub neej thiab cia siab tias yuav siv mus txog rau Christmas thiab txog rau xyoo 2021," raws li nws tau qhia rau hnub Saturday dhau los.
"Peb yeej ntseeg tias peb muaj peev xwm tsim tau ib cov cai zoo los siv."
Tsom coj ntawm tej lagluam los kuj ceeb toom tias yuav ua rau neeg poob hauj lwm ntau tuaj ntxiv yog tsoom fwv tsis kub siab los daws tej teeb meem no.
Jennifer Westacot uas yog tus coj tswj lub koom haum lagluam Business Council of Australia) tau qhia rau chaw nthuav xov xwm ABC tias "Qhov peb xav tau mas yog cov tswv yim los pab kom rov qab ua tau lagluam."
"Tej lagluam yeej tau npaj cov tswv yim COVID-safe plans, thiab twb tsis muaj neeg kis tus kab mob no es ua li cas ho tsis tso cai rau lawv qhib ua luam?..piv txwv li tej chaw tuaj ntug nroog ntawm xeev Victoria uas twb tsis muaj neeg kis kab mob no uas li cas ho tsis pub lawv qhib?"
"Peb xav tau ib cov tswv yim siv tau yooj yim, uas peb paub kwv yees thiab tsis ua rau peb poob qab."
Ben Morton uas yog ib tug nom sawv cev pej xeem ntawm pab nom Liberal Party thiab yog tus pwm tsav ua hauj lwm pab thawj pwm tsav Scott Morrison tau qhia tias Mr Andrews tej tswv yim ces tsuas tsim los siv rau lub xeev Victoria nkaus xwb.
"Yeej tsis yog ib cov tswv yim uas muaj feem koom los ntawm lwm tus los yog sab laj nrog tsoom fwv teb chaws Australia li," raws li Mr Morton tau qhia rau lub chaw nthuav xo xwm Sky News cov program Sunday Agenda.
Nws tau hais tias tej tswv yim no yuav tsum los ua tib zoo xyuas kom xeev Victoria yuav tsum muaj peev xwm siv tau cov kev sim, cov kev txheeb tej neeg thiab cai zoo tib yam li cov siv ntawm xeev NSW thiab.
"Tsis hais cov tswv yim yuav coj los siv tshem cov kev txwv los yog siv kom ntxeem dhau ntawm cov kev txwv no yuav tsum muaj tej tswv yim li tau hais dhau los ntawd siv."
Hau xeev thiab Dr Brett Sutton uas yog tus coj tswj kev noj qab haus huv xeev yeej nyuaj siab kawg thiab yeej tau thov kom zej tsoom sawv daws ua raws li nom tswv cov kev txwv txawm tias txog caij ntuj tshiab nplooj hlav uas huab cua ib nyuag sov zog tuaj uas ua rau tej neeg xav tawm ntawm tsev mus rau ib qho qhov twg.
Victorian Chief Health Officer Brett Sutton. Source: AAP
"Vim yog ib lub cim qhia tias muaj tej kab mob virus no tsawg lawm ces peb thiaj yuav tau kub siab ua hauj lwm tshaj no yam peb tsis tau ua dua los yog li ntawd peb thiaj yuav tsum kub siab tiag tiag los xyuas kom txhob muaj neeg kis tus mob no ntxiv lawm," raws li zeskais Sutton tau qhia rau hnub Saturday dhau los.
Txawm li cas los yeej ua rau muaj ib txhia neeg tsis txaus siab rau tej kev txwv ntawm nroog Melbourne ntau zujzus tuaj lawm thiab yeej tau tawm tsam tsis pom zoo nrog tus hau xeev tej tswv yim uas siv los ceeb toom rau tej neeg sawv daws kom ceev faj.
Tub ceev xwm twb tau muab 17 tus neeg txhom thiab tau nplua tej neeg yam tsawg li 160 tus rau hnub Saturday uas tau mus koom rwg npoj tawm tsam tsis pom zoo nrog cov kev txwv ntawm nroog Melbourne.
Tej neeg nyob ntawm nroog Melbourne tseem raug txwv theem 4 thiab yuav tsum ua raws cov kev txwv tsis pub tawm hmo ntuj txij sij hawm 8pm-5am txhua hmo. Nyob rau lub caij uas txwv tsis pub eneg tawm no tej neeg yeej tseem muaj peev xwm tawm mus ua tau hauj lwm, mus siv kev kho mob mus tu lwm tus los yog tos lwm tus tuaj tu ib tug neeg twg los sis yog mloog tau tias tsis tau txais kev nyab xeeb ces muaj peev xwm tawm tau ntawm tsev tau. Thiab txheeb tau ntawm .
Txhua tus neeg Victorians yuav tsum siv ntaub npog qhov ncauj thaum lawv tawm ntawm tsev mus rau ib qho chaw qhov twg.
Txhua tus neeg ntawm teb chaws Australia yuav tsum nyob kom nrug ntawm lwm tus neeg li 1.5 metres. Txheeb ntawm lub xeev koj nyob seb ho pub tej neeg sib sau ua ke tau li cas. Yog tias koj muaj cov yam ntxwv mob li khaub thuas lawm, ces nyog twj ywm ntawm tsev, hu rau koj tus kws kho mob los yog lub chaw Coronavirus Health Information Hotline tus xov tooj 1800 020 080 seb yuav npaj mus sim li cas. Thiab yog koj xav mloog, nyeem los yog saib tej xov xwm txog tus kab mob COVID-19 ua 63 hom lus ces mus txheeb tau ntxiv ntawm
