Muaj ib lub tsev raug kub hnyiab, thiab ntau txheeb tus yuav tsum 'tsiv tawm kiag tam sid'

Tej neeg ntawm tej zejzog yuav laug txog 30 lub ze ntawm Ballarat raug ceeb toom kom tsiv tawm thaum tau muaj ib cov kev ceeb toom txog tej xwm txheej kub ntiav thiab yuav tau soj thiab npaj seb yuav ua li cas thaum muaj hav zoov kub hnyiab.

Smoke from a bushfire near the town of Beaufort, west of Ballarat, Victoria on Thursday. Source: AAP / Beaufort Park Cafe/PR Image

Ntsiab lus tseem ceeb:

• Muaj tej neeg tua hluav taws yam tsawg li 1,000 tus tau mus tua hluav taws sab hnub poob ntawm xeev Victoria rau thaum tsaus ntuj hnub zwj Teeb (Thursday).
• Thiab ntshe tseem yuav xa neeg tua hluav taws coob ntxiv mus pab tua hluav taws rau hnub zwj Kuab (Friday) thiab ob hnub so no ntxiv.
• Thiab kuj tau muaj xov xwm qhia thaum ntxov tias tau muaj ib co vaj tse raug kub hnyiab lawm.

Muaj tej vaj tse yam tsawg li ib lub twb raug kub hnyiab thiab xav tias ntshe tseem yuav muaj tej vaj tse raug kev puas tsuaj ntau tuaj ntxiv rau lub caij tej neeg tua hluav taws tseem tab tom tua ib kob hav zoov kub hnyiab loj heev ntawm sab hnub poob ntawm xeev Victoria.

Thiaj tau muaj tej neeg ntau txheeb tus ntawm tej zejzog ze Ballarat raug ceeb toom kom ''tsiv tawm kiag tam sid'' rau lub caij hav zoov tseem kub hnyiab, uas tau pib kub ntawm lub zos Bayindeen, thiab tau pib kub loj tuaj ces thaum kawg twb tau kub tej chaw dav tshaj 11,000 hectars rau hnub zwj Kuab (Friday) no lawm.

Kuj muaj tej neeg tua hluav taws li ntawm 1,000 tus, ntau pua lub tsheb tua hluav taws thiab muaj tej nyob hoom kiv tshuab yuav laug txog 60 lub - suav cov dav hlau tua hluav taws loj plaub lub nrog - tseem tab tom tua kob hav zoov no, thiab tej neeg tshuaj ntsuam tej xwm txheej no tseem tsis tau muaj peev xwm qhia tau tias yog tim dab tsi thiaj kub hnyiab.

Tej pa taws ncho los ntawm ib kob hav zoov kub hnyiab ze ntawm lub zos Bayindeen ntawm cheeb tsam Ararat, Victoria. Source: AAP / VicEmergency

Jason Heffernan uas yog tus coj lub koom haum tua hluav taws yaj sab (Country Fire Authority - CFA) tau qhia meej tias yeej tau muaj tej tsev yam tsawg li ib lub raug kub hnyiab lawm tab sis nws xav tias ntshe twb tau muaj ntau lub raug kub lawm thiab.

Nws tau qhia rau "Kuv kuj xav tias ntshe yuav muaj tej tsev nraum zoov, tej laj kab thiab tej tsiaj txhu ntau heev yuav raug kub hnyiab thiab los kuj tau.''

Ntau pab neeg uas tshuaj ntsuam tej xwm txheej no tias tsim teeb meem loj npaum li cas twb tau pib mus txheeb tias seb kob hluav taws no tsim kev puas tsuaj loj npaum li cas rau hnub zwj Kuab (Friday).

Thiab thaum tau muaj cua hloov rau yav lig hnub zwj Teeb (Thursday) ntawd ces tau ua rau kob hluav taws uas kub sab qab teb hnub tuaj tig mus kub rau sab qaum teb hnub tuaj lawm.

Ces tej neeg tua hluav taws thiaj kub siab nrog xyuas tej zejzog uas yuav raug kev phom sij li cov zos Elmhurst, Amphitheatre thiab tej zos ib puag ncig rau hnub zwj Kuab (Friday) no, thiab tau kwv yees tias tej zaum tej xwm txheej no ib nyuag ntaug me ntsis ua ntej tej zaum yuav rov qab ''muaj hav zoov kub hnyiab muaj ceem'' rau hnub zwj Feej (Wednesday).

Thiab hnub zwj Kuab (Friday) sawv ntxov kuj muaj cua hlob muaj ceem txog 69 km/h tab sis xav tias tej zaum tsuas muaj ceem txhob li ntawm 30 km/h rau yav lig hnub no lawm xwb.

Heffernan tau hais tias "Ntshe tseem yuav siv caij nyoog mas thiaj yuav tswj tau tej kob hluav taws no — thiab yog tsuas kub tej tiaj nyom los yog tej teb xwb ces kuj yuav muaj peev xwm siv tej tsheb khawb thiab nrau av los tsim cov ciam kem tau thiab, Hos yog kub rau tej hav zoov lawm, ces ntshe yuav ib nyuag sib nyuag sib chab sib chaws me ntsis. Txawm li cas los kuv xav tias peb yeej yuav muaj peev xwm tsim tau qee cov ciam los thaiv tau rau hnub zwj Feej (Wednesday) thiab.''

Heffernan tau hais tias lub koom haum CFA yuav koom tes nrog lwm cov koom haum los npaj ib lub tswv yim yuav los tswj tej xwm txheej no yam tsawg li ntawm xya hnub thiab.

Ces thiaj tau muaj cov kev ceeb toom ua suab thiab text message txog tej xwm txheej kub ntaiv no raug xa mus ceeb toom rau tej vaj tse ntau tshaj 25,000 lub rau hnub zwj Teeb (Thursday) thiab xa ceeb toom rau tej vaj tse li ntawm 5,500 lub rau thaum sawv ntxov hnub zwj Kuab (Friday tim 23.02.2024).

Jacinta Allan uas yog tus hau xeev Victoria thiaj tau hais tias yog ib hmo nyuaj heev rau tej neeg nyob sab hnub poob ntawm Ballarat.

Emergency Services Minister Jaclyn Symes uas yog tus nom tswj tej dej num xwm txheej kub ntaiv (Emergency Services) thiaj tau ceeb toom tias tej kev tawm tsam nrog hav zoov kub hnyiab no yeej tseem tsis tau tag.

Symes tau qhia rau tej neeg nrhiav xov xwm tias "Kuv tsis muaj peev xwm yuav twv tau li cas — vim yog ib kob hluav taws loj, thiab kub sai heev, thiab kub loj muaj ceem heev, vim li ntawd peb thiaj siv 175 lub sheb tua hluav taws thiab 1000 tus neeg tua hluav taws los tswj.''

Tej pa taws cho los ntawm ib kob hav zoov kub hnyiab ze lub zos Beaufort. Source: AAP / Beaufort Park Cafe

Symes tau hais tias tau muaj tej tsheb tua hluav taws txog 175 lub ntxiv rau tej tsheb tua hluav aws zejzog mus tswj tej xwm txheej no.

Ces thiaj li xa tej chaw pab cuam mus rau cov zos Ararat, Maryborough thiab Wendouree - uas lub zos kawg no yeej muaj tej neeg mus teev npe txog li 200 tus lawm.

Thiab Heffernan tau hais tias tej neeg uas tau teev npe xav siv tej chaw so no, ces twb muaj yim tus neeg tau pw ib hmos thiab tseem muaj 50 tus neeg tau pw sab nraum tej caravans los yog lwm cov chaw so, feem ntau ces yeej muaj tej tsiaj thiab tej tsheb nrog lawv.

Ces kob hav zoov kub hnyiab loj heev no thiaj yuam kom muab txoj kab tsheb ciav hlau ntu nruab nrab ntawm Ballarat mus rau Ararat kaw lawm, uas nom tswv tau cia siab tias yuav rov qab qheb rau hnub zwj Cag (Saturday) no.

Tsis tas li ntawd los kuj muaj lwm cov kev raug kaw rau hnub zwj Kuab (Friday) thiab.

Hos tej neeg raug txim kaw tsev laj cuj uas muaj mob thiab tej pa taws yuav ua rau muaj teeb meem rau lawv ces kuj raug mus tshem tawm ntawm lub tsev laj cuj Langi Kal Kal Prison, uas nyob ze kob hav zoov kub hnyiab no thiab.

Yog li ntawd ces hnub zwj Kuab (Friday 23.02.2024) no thiaj tseem muaj cov kev ceeb toom Emergency warnings, cov kev ceeb toom koj soj kob hluav taws kub hnyiab no seb zoo li cas thiab tsim nyog ua dab tsi, thiab tseem muaj cov kev taw qhia rau tej neeg rau hnub no rau ntau cov zos nyob sab qaum teb ntawm lub zos Beaufort mus rau cheeb tsam Elmhurst thiab Amphitheatre.

Tsis tas li ntawd los kuj muaj cov kev ceeb toom tias tsam muaj hav zoov kub hnyiab rau ntau thaj chaw ntawm plawv xeev thiab sab qab teb hnub poob ntawm xeev New South Wales (NSW) thiab cheeb tsam Greater Hunter.

Yog li ces Dean Narramore ntawm lub chaw tshuaj ntsuam thiab kwv yees huab cua thiaj tau hais tias hnub zwj Kuab (Friday) no ces thiaj yuav kub sov heev rau cov chaw qaum teb thiab hnub tuaj ntawm xeev NSW.

Ces thiaj yuav ua rau huab cua kub sov txog li ntawm 35 degree Celsius ntawm Sydney ua ntej yuav muaj xob nroo xob laim thiab txias zog rau thaum tsaus ntuj.

Ntawm xeev Western Australia ces kuj tab tom muaj ib co kev ceeb toom tias yuav kub sov heev tam sim no rau ntawm Pilbara, North Interior, South Interior thiab Gascoyne.

Thiab kuj tseem muaj ib co kev ceeb toom txog ib kob hav zoov kub hnyiab uas yuav tau soj thiab npaj seb yuav ua li cas rau tej neeg uas mus los rau ntawm txoj kev tsheb Eyre Highway ze ntawm Balladonia Roadhouse uas yog ib thaj chaw ntawm ntau thaj chaw ntawm lub zos Balladonia thiab Fraser Range thawm Shire of Dundas.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.