Tseem yuav siv cov kev txwv theem 4 no los tswj tej neeg ntawm nroog Melbourne no txuas ntxiv li 3 limtiam kom muaj peev xwm rov qab qhib tau lub xeev no.
Txawm li cas los txij tim 14 lub 9 hlis ntuaj no mus thaum cov kev txwv no tau los xaus ntawd kuj muaj qee cov kev txwv raug hloov li hauv qab no thiab xws li:
- tau muab lub sij hawm txwv tsis pub tej neeg tawm hmo ntuj rub lig zog ua 9 pm tsaus ntuj lawm
- pub tej neeg tawm nraum zoov ua exercise ntev txog 2 teev rau ib hnub twg,
- tej neeg nyob tib leeg muaj cai tos ib tug qhua tuaj xyuas lawv los yog mus xyuas tau ib tug neeg twg,
- thiab pub 2 tug neeg sib sau tau ua ke nraum zoov los yog pub ib tsev neeg twm nraum zoov ntev txog 2 teev.
Tsis tas li ntawd los txog rau hnub tim 28 lub 9 hli ntuj xyoo 2020 no ces mam li tshem lwm cov kev txwv li hauv qab no thiab yog tias tej neeg kis tau tus mob no tsawg txog li 30-50 tus rau ib hnub twg rau 14 hnub ntxiv no raws li hauv xeev Victoria tau qhia xws li:
- Pub tej zejzog sib sau coob tuaj ntxiv txog 5 tus neeg ntawm 2 tsev neeg twg,
- maj mam pub ib txhiab tub kawm rov qab msu kawm ntawv zuj zus,
- rov qab qhib tej chaw zov me nyuam siv,
- thiab tso cai rau ib txhia neeg ua hauj lwm ntawm ib cov lagluam rov qab mus ua tau hauj lwm.
Txawm li cas los yeej tseem tsis tau tshem cov kev txwv tsis pub neeg tawm hmo ntuj mus txog rau hnub tim 26 lub 10 hli ntuj xyoo 2020 no, thaum tsoom fwv tau hloov los siv cov kev txwv theem 3 rau lub sij hawm 14 hnub uas yog tias ib hnub twg tsuas muaj neeg kis tau tus mob no txog 5 tug lawm xwb los yog tsis tshaj 5 tug neeg uas tsis paub tias lawv kis tau tus mob no qhov twg los ntawm lub xeev no.
Nyob rau theem 3 uas tseem txwv no ces tej neeg ntawm nroog Melbourne yuav tau txais kev tso cai:
- tawm tau ntawm tsev mus ua dab tsi los tau thiab yuav tsis muaj cov kev txwv tej neeg tsis pub nyob sib ze (nyob kom nrug ntawm lwm tus) lawm,
- pub tej neeg sib sau tau txog 10 leej nraum zoov thiab pub tos qhua tuaj hauv tsev txog 5 tug neeg,
- qib tej chaw txiav plaub hau thiab tej chaw tos txais qhua tau.
Hos nyob rau theem kawg ntawd ces yuav pib rau hnub tim 23 lub 11 hlis ntuj xyoo 2020 no yog tias tsis muaj neeg kis tus kab mob no li lawm rau lub sij hawm 14 hnub ces yuav:
- pub tej neeg sib sau tau ua ke nraum zoov txog 50 leej thiab yuav tshem cov kev txwv feem ntau tsis siv ntxiv lawm.
Mr Andrews thiaj hais tias "tsis yog ib cov kev xaiv uas peb muaj cib fim xaiv 50-50 uas peb muaj kev xaiv li tsuas yog tib txoj hauv kev peb yuav tsum tau ua lawm xwb."
"Tej tswv yim uas siv los tswj tej kab mob no yeej qhia rau peb paub lawm tias yog peb qhib ntxov heev ces yeej yuav ua rau peb tsis muaj peev xwm qhib tau li vim peb tseem nyuam qhuav yuav pib rov qab muaj cov neeg kis tus kab mob no ua zaum 3 ntxiv dua xwb."
"Tsis muaj lwm txoj hauv kev lawm yog li peb yuav tsum tau ua li hais no txuas ntxiv lawm xwb."
Melbourne yeej tau siv cov kev txwv thiaj ua rau tej neeg ntawm lub nroog no thiaj tsis uaj peev xwm tawm ntawm lawv tej vaj tse rau lub sij hawm 8pm-5am, thiab tsuas pub tej neeg tawm tau ntawm tsev mus ua exercise 1 teev rau ib hnbu twg, txwv tsis pub tej neeg tawm nrug deb ntawm lawv tsev li 5 kilometres, hos cov zos tuaj ntug nroog ntawm xeev Victoria los kuj raug txwv theem 3 thiab.
Tham txog tej zos tuaj ntug nroog Melbourne ntawm xeev Victoria ntawd ces yuav hloov ntawm cov kev txwv theem 3 los siv cov kev txwv theem 2 rau hnub tim 14 lub 9 hlis ntuj xyoo 2020 no. Uas yog yuav:
- pub tej neeg ntawm 2 tsev neeg twg sib sau tau ua ke txog li 5 leeg,
- qhib tej chaw zov me nyuam siv,
- thiab tej tub kawm yuav rov qab mus kawm hauv tej chav kawm ntawm tej teej kawm ntawv.
Yog li ntawd tsoom fwv xeev thiaj tau tshwm nyiaj los hais kom 2 lub tsev kawm qib siab li University of Melbourne thiab New England thiaj tau tsim tau cov qauv coj los siv rau 14 hnub ntxiv no seb tej zaum tseem yuav muaj neeg kis tus kab mob no txog li ntawm 60 tus neeg rau ib hnub twg mus txog rau lub 9 hli ntuj nrab no, uas tej zaum tsam ho yuav rov qab ua rau tej neeg rov qab sib kis tus kab mob no ua zaum 3 ntxiv dua yog tias peb tseem tshem cov kev txwv no rau ib lub limtiam ntxiv no xwb.
Tab sis yog tias ho piv rau cov kev sib kis tus kab mob no ntawm xeev New South Wales rau 14 hnub dhau los ntad ces tsuas muaj 13 tus neeg kis tau tus kab mob no hauv nws lub xeev xwb. Txog rau hnub tim 4 lub 9 hli ntuj zwj Kuab (Friday) ntawd ces xeev Victoria tseem muaj tej neeg kis tau tus mob no ua tus zauv nruab nrab txog li 115 tus neeg diam.
Yog li hnub Sunday tim 6 lub 9 hlis ntuj 2020 no xeev Victoria thiaj tseem muaj tej neeg tseem mob tus mob coronavirus no txog li 1,872 tus neeg diam.
Tej neeg nyob ntawm nroog Melbourne tseem raug txwv theem 4 thiab yuav tsum ua raws cov kev txwv tsis pub tawm hmo ntuj txij sij hawm 8pm-5am txhua hmo. Nyob rau lub caij uas txwv tsis pub eneg tawm no tej neeg yeej tseem muaj peev xwm tawm mus ua tau hauj lwm, mus siv kev kho mob mus tu lwm tus los yog tos lwm tus tuaj tu ib tug neeg twg los sis yog mloog tau tias tsis tau txais kev nyab xeeb ces muaj peev xwm tawm tau ntawm tsev tau. Thiab txheeb tau ntawm .
Txhua tus neeg Victorians yuav tsum siv ntaub npog qhov ncauj thaum lawv tawm ntawm tsev mus rau ib qho chaw qhov twg.
Txhua tus neeg ntawm teb chaws Australia yuav tsum nyob kom nrug ntawm lwm tus neeg li 1.5 metres. Txheeb ntawm lub xeev koj nyob seb ho pub tej neeg sib sau ua ke tau li cas. Yog tias koj muaj cov yam ntxwv mob li khaub thuas lawm, ces nyog twj ywm ntawm tsev, hu rau koj tus kws kho mob los yog lub chaw Coronavirus Health Information Hotline tus xov tooj 1800 020 080 seb yuav npaj mus sim li cas. Thiab yog koj xav mloog, nyeem los yog saib tej xov xwm txog tus kab mob COVID-19 ua 63 hom lus ces mus txheeb tau ntxiv ntawm
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
