Ntsiab lus tseem ceeb:
- Huab cua phem ua rau muaj teeb meem rau xeev Victoria, thiab muaj peb kob hav zoov kub hnyiab thiab xob nroo xob laim ntawm lub xeev no.
- Tau muaj ntau lub tsev raug kev puas tsuaj thiab tej neeg nyob ntawm lub zos Newtown raug yuam kom yuav tau tsiv tawm rau lwm qhov vim muaj ib kob hav zoov kub hnyiab.
- Tau pab neeg txheeb cov kev puas tsuaj mus txog rau ntawm tej chaw rau hnub zwj Feej (Wednesday) mus txheeb seb puas muaj neeg tas sim neej thiab raug kev puas tsuaj rau tej vaj tse li cas.
Tseem muaj peb kob hav zoov kub hnyiab kub txuas ntxiv ntawm xeev Victoria sab hnub poob thiab plawv xeev rau lub caij tej neeg tua hluav taws tseem tswj cov kob hluav taws no ib hmo dhau los no, thiab kuj tau muaj ib co vaj tse tau raug kev puas tsuaj lawm.
Tab sis zoo li tej xwm txheej no kuj ntaug me ntsis ntawm thaj chaw Mt Stapylton thiab Bellfield ntawm
Grampians National Park tom qab tej neeg zos raug nom tswv ceeb toom kom nrhiav vaj tse nkaum rau hnub zwj Quag (Tuesday 13.02.2024) tav su dua ntawd.
Tsis tas li ntawd los zoo li tej xwm txheej kuj zoo tuaj rau hnub zwj Feej (Wednesday) sawv ntxov ib puag ncig kob hluav taws ntawm Newtown ze Ballarat tom qab tej neeg raug ceeb toom kom tsiv tawm vim muaj tej tiaj nyom kub hnyiab kis mus rau ib thaj hav zoov thiab ras los ua hav zoov kub hnyiab lawm.
Kob hav zoov peb ces kub ze rau ntawm Pomonal, uas nyob ntawm Grampians, thiab tseem yuav tau tswj ntxiv, thiab kuj tau muaj xov xwm tsis tau paub meej tseeb qhia tias muaj ntau lub tsev raug kub hnyiab ntawm lub zos ntawd lawm thiab.
Muaj ntau pua txheeb lub tsev thiab tej lagluam los kuj tsis tau hluav taws xob siv tom qab cuab hlob los hla lub xeev Victoria, ces thiaj ua rau ncej hluav taws xob vau, tom qab ib hnub uas huab cua kub sov heev.
Qee cov chaw uas raug kev phom sij loj tshaj plaws yog cov zos nyob sab hnub tuaj thiab sab qab teb hnub tuaj ntawm cov zos Waverley, Burwood East, Vermont South thiab Bentleigh.
Lub caij cua muaj ceev heev ntawd, tau kwv yees tias muaj tej vaj tse txog li ntawm 500,000 lub tsis tau hluav taws xob siv vim tshav kub heev ces ua rau tej ncej hluav taws xob vau, thiab tau ua rau muaj ntau lub pob xa hluav taws xob tu tsis txuas rau tej chaw xav hluav taws xob.
Raws li lub koom haum Australian Energy Market Operator tau hais ib cov ncauj lub rau hnub zwj Quag (Tuesday) ces nws hais tias "Vim muaj cua hlob thiab xob laim ces thiaj ua rau muaj teeb meem rau cov electricity network thiab ua rau tsis tau hluav taws xob siv.''
Kuj tau muaj tsib tug neeg tua hluav taws yaj sab raug mob me ntsis tom qab hluav taws tau los kub lawv lub tsheb tua hluav taws ntawm thaj chaw tua hluav taws ntawm lub zos Pomonal rau hmo zwj Quag
(Tuesday).
Chris Hardman uas yog tus coj lub koom haum Forest Fire Management Victoria tau hais ces tej neeg tua hluav taws yeej tau xub jus rau ntawm lub zos ntawd thiab raug txib kom pov puag tej vaj tse thiab tej hauv paus txhim kho tseem ceeb.
Hardman tau qhia rau ABC News tias "Thaum cua hloov seem lawm, ces ua rau tej hluav taws kub ceev heev los rau lub zos Pomonal ces thiaj ua rau tej neeg tua hluav taws ntawm hauv ntej raug tej xwm txheej no vim lawv tab tom pov puag tej zejzog."
Thiab muaj cua hlob tshaj 120 km/h ces thiaj ua rau muaj teeb meem rau 6 tus ncej xav hluav taws xob loj ze ntawm Geelong raug teeb meem rau lub caij huab cua kub heev ces thiaj ua rau lub xeev no lub chaw tsim hluav taws xob loj tshaj plaws tsim tsis tau hluav taws xob siv.
Tej nom tswv los kuj tau ceeb toom tias ntshe tseem yuav siv ntau hnub ntxiv mas thiaj yuav kho tau tej ncej xa hluav taws xob loj uas tseem muaj teeb meem ua rau tej vaj tse ntau tshaj 200,000 lub tsis tau hluav taws xob siv.
Tsis tas li ntawd los kuj tseem muaj teeb meem rau tej teeb qhia siv kev tsheb thiab ntshe tseem yuav muaj qee cov teej kawm raug kaw rau hnub zwj Feej (Wednesday tim 14.02.2024).
Pib txij sij hawm 6 teev sawv ntxov hnub zwj Feej (Wednesday) ces yeej muaj neeg hu rau lub koom haum Victorian State Emergency Service ntau tshaj 2750 zaus thov kev pab cuam txij thaum tav su hnub zwj Quag (Tuesday) los lawm.
Tam sim no ces kuj pab tau 1750 tsab xov tooj thov kev pab cuam lawm thiab tej nom tswv los tseem yuav tau pab 1000 tsab uas hu mus thov kev pab cuam ntxiv thiab.
Nom tswv tseem tab tom txheeb tias seb muaj tej tsev ntau npaum li cas raug kub hnyiab ntawm kub zos Pomonal, uas tau tab tom kub dav txog li ntawm 2000 hectares.
Hardman tau hais tias "Peb tseem tsis tau paub tias ho kub ntawm hauv ntej li cas thiab ho muaj teeb meem li cas rau lub zos ntawd, tab sis peb yeej paub tias muaj qee suam ntawm lub zos Pomonal raug teeb meem lawm.''
Home Affairs Minister Clare O'Neill uas yog ib tug neeg Victorian tau hais tias, kuj yog tej yam ceeb tias ua li cas ho muaj tej vaj tse ntau heev tsis tau hluav taws xob siv thiab.
Clare O'Neill tau qhia rau Seven Sunrise hnub Wednesday tias "Thiaj muaj ntau yam lus nug yuav tau nug thiab yuav tau teb tias vim li cas lub teb chaws li Australia no es tseem muaj nag xob nag cua ua rau muaj tej neeg txog 500,000 tus tsis tau hluav taws xob siv thiab,''
''Tab sis kuv xav tias yuav nug tej lus nug ntawd rau yav lig thiab.
"Txawm li cas los peb xav xa kev hlub tshua thiab xa kev pab mus pab rau tej cuab yig uas raug tej kev txim txom no.''
Thiab kuj tau muaj ntau pab neeg txheeb seb raug teeb meem li cas tau mus txog rau ntawm thaj chaw kub hnyiab hnub zwj Feej (Wednesday) no thiab tseem yuav mus txheeb tias seb puas muaj neeg nruam sim thiab muaj tej vaj tse puas tsuaj li cas.
Hnub zwj Quag (Tuesday) dhau los ces huab cua kub sov heev ntawm ntau lub xeev, tab sis xeev Victoria yog lub xeev uas sov tshaj 40 degree Celcius rau qee thaj chaw ntawm lub xeev no.
Kevin Parkyn ntawm lub chaw ntsuam thiab kwv yees huab cua (Bureau of Meterology) tau hais tias "Yog ib hnub kub sov heev,''
"Peb yeej tau pom lawm tias kub txog li 41.7C ntawm Walpeup, thiab 41.4C ntawm lub zos Hopetoun mus rau sab hnub poob qaum teb ntawm lub xeev no.
"Kuv sov txog li 41C ntawm Avalon ua ntej cua hloov txias ces thiaj ua rau nqe los sov txog 26C rau lub sij hawm 15 ntiag tiv lawm xwb.''
Ces hnub zwj Quag (Tuesday tim 13.02.2024) dhau los thiaj raug ceeb toom rau qee thaj chaw ntawm lub xeev no tias yog ib cov xwm txheej huab cua phom sij tshaj plaws txij li tau muaj kob hav zoov kub hnyiab Black Summer xyoo 2019-2020 dhau los.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
