Meskas lub tsev kis xeev qes tau pom zoo rau ib tsab cai rau hnub zwj Feej (Wednesday) uas tej zaum yuav yuam kom lub tuam txhab TikTok cais tawm ntawm tus tswv Suav los seb yuav raug txwv ntawm teb chaws Meskas xwb.
Tsab cai no thiaj yog ib co teeb meem loj rau lub app uas tej neeg pheej nyiam faib tej video rau lwm tus saib, uas tau muaj neeg nyiam siv thoob ntuj thiab tau ua rau muaj kev txhawj xeeb rau tus tswv Suav, thiab tej zaum lub tuam txhab no yuav tau ua raws li pab nom koom tsham ntawm tuam ceeb Beijing hais.
Kuj tau muaj cov kev koom npoj los tawm suab 352-65 pom zoo rau tsab cai no yam tsis tau pom dua los rau lub caij uas tseem muaj cov kev sib tawg tswj rau tej laj fai kum xeeb ntawm tuam ceeb Washington.
Ces cov kev ceeb toom uas tawm tsam nrog lub app no thiaj ua rau coob leej ntau tus ntawm ob pab nom tsis hais Republcans los yog Democrats thiaj ceeb tias tsam yuav ua rau tej hluas nyiam siv TikTok chim heev rau lub xyoo uas muaj cov kev xaiv tsa no vim tej hluas cov kev xaiv nom kuj yog ib co tseem ceeb.
Ces Mike Johnson suas yog tus coj pab nom Republican lub tsev kis xeev qes thiaj tau hais ib co lus tom qab muaj cov kev tawm suab pom zoo rau tsab cai no tias "Hnub no ces yeej tau txais kev tawm suab pom zoo los ntawm tej nom kis xeev uas tsis pom zoo nrog Suav koom tsham cov kev xav soj lwm tus thiab tswj neeg Meskas thiab yog peb ib co cim uas siv los tiv thaiv peb tej yeeb ncuab.''
Ua ke no los los Steve Scalise uas yog tus neeg ob uas xav los sib tw seb puas tau ua tu tswj pab nom Republican lub tsev kis xeev qes los kuj tau hais ib co lus ntxiv rau ntawm nws phau X account tias ''Nod yog ib co hauj lwm kev ruaj ntseg tseem ceeb ntawm peb haiv neeg. Tsev kis xeev siab yuav tsum lees paub txog tej no thiab tawm suab pom zoo los siv tsab cai no.''
Tab sis kuj tseem tsis tau paub tseeb tias xyov tsab cai no yuav zoo li cas rau lub caij uas tsev kis xeev siab (Senate) yuav tau ceev faj tsaj no, vim lawv yeej nkag siab tias yuav yog ib cov kev tawm tsam nrog tej neeg Meskas 170 million tus uas siv lub app no.
Raws li tsev dawb tau hais ces President Joe Biden los yeej yuav kos xyeem mem tes rau tsab cai no thiab, vim raws li paub lawm ces yog tsim tau tsab cai Protecting Americans from Foreign Adversary Controlled Applications Act coj mus tso rau ntawm nws lub rooj lawm.
Tab sis kuj muaj TikTok tus kis tau hais tias ''Cov txheej txheem no yog ib co uas zais npog thiab yog tsab cai maj ntug maj teb los tsim raws ib co laj thawj nkaus xwb uas yog: ib cov kev txwv xwb. Peb thiaj cia siab tias tsev kis xeev siab yuav ua tib zoo los txheeb qhov tseeb, thiab mloog lawv tej neeg xaiv nom, thiab ras txog tias yuav ua rau muaj teeb meem rau tej lagluam me txog li ntawm 7 million cov thiab 170 million tus neeg Meskas uas siv pab cov services.''
Thiaj tau ua rau muaj neeg kub siab heev txog tsab cai no ob peb hnub dhau los, thiab xav kom ByteDance uas yog lub tuam txhab uas tswv rau lub app TikTok no yuav tau muag nws lub app no rau lub sij hawm 6 hli, los tsis li ntawd ces nws yuav raug txwv tsis pub tso nws lub app rau ntawm Apple thiab Google app stores ntawm teb chaws Meskas ntxiv lawm.
Tsis tas li ntawd los tsab cai no kuj yuav pub Meskas tus president muaj fwj chim los teeb npe rau lwm cov applicastions yog tias cov apps ntawd muaj feem cuam tshuam txog haiv neeg no cov kev ruaj ntseg thiab yog ib lub teb chaws twg uas muaj kev sib cov nyom nrog teb chaws America.
Yog li thiaj li tau rov qab muaj cov kev tawm tsam nrog lub TikTok app no yam tsis muaj kev ceeb toom dab tsi rau lub tuam txhab no, thiab raws li Wall Street Journal tau tshaj tawm ces, TikTok tej coj yeej rov qab muaj kev ntseeg siab lawm thaum uas president Biden tau siv lub app no lub hli dhau los tam li yog ib feem ntawm nws cov kev npaj nrhiav suab sib tw xaiv nom seb puas tau ua nom zum ob ntxiv.
Shou Zi Chew uas yog TikTok tus coj ntawm Washington thiaj li nrog xyuas kom tsis txhob muaj peev xwm tsim tau tsab cai no.
TikTok yeej tau tawm los qhia ruaj tsis lees paub tias nws tsis muaj feem cuam tshuam dab tsi nrog tsoom fwv Suav tuam tshoj, thiab yeej tau rov qab kho nws lub tuam txhab kom tsuas khaws tej xov xwm teev txog tej neeg siv nws lub app no ntawm teb chaws Meskas xwb uas yog tej yam uas lub tuam txhab no yeej ua raws li qhov nws tsim nyog ua lawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
