Tej mob nkeeg ntau yam raws li cov theem neej sib txawv

Tau muaj ib tsab ntawv cej luam tshiab tau txheeb txog neeg Australia cov kev noj qab haus huv kom totaub txog tej mob nkeeg uas pheej ua rau tej neeg mob coob tshaj phaws.

The AIHW has released a report into Australian health. Source: SBS, Getty

Tau muaj ib tsab ntawv cej luam tshiab teeb txheeb txog tej mob nkeeg uas tau muaj rau neeg Australia ntau theem neej sib txawv.

Lub koom haum Australian Institute of Health and Welfare's (AIHW) tsab ntawv cej luam txog cov kev teeb txheeb ob xyoos ib zaug twg txog neeg Australia cov kev noj qab haus huv (Australia's Health 2024) uas raug coj los nthuav tawm rau hnub zwj Quag (Tuesday) tau qhia txog tias neeg Australia cov kev noj qab nyob zoo thiab tej healthcare system zoo li cas.

Tsab ntawv cej luam no thiaj tau coj tej xov xwm tshiab tshaj plaws uas tau coj los qhia tsis ntev los no txog neeg Australia lub neej txoj sia uas tam sim no paub tias haiv neeg no muaj txoj sia ua tau lub neej nyob ntev txog li 80 tawm xyoo lawm.

Australia yog lub teb chaws muaj neeg ua tau lub neej nyob ntev tshaj plaws ua zum 4 ntawm cov teb chaws OECD

Raws li tsab ntawv cej luam tshiab no tau qhia ces neeg Australia muaj txoj sia nyob ntev ua zum 4 ntawm cov teb chaws tub koom siab 38 lub ntawm lub koom haum Organisation for Economic Co-operation and Development (OECD) lawv qab ntau lub teb chaws li Japan, Korea thiab Switzerland.

Ib tug me nyuam uas yug xyoo 2020-2022 muaj peev xwm ua lub neej nyob ntev raws tus zauv theem nrab txog li ntawm 81.2 xyoos tab sis ib tug me nyuam ntxhais twg tseem ua tau lub neej nyob ntev tshaj thiab uas nyob ntev txog li ntawm 85.3 xyoos diam.

Neeg Australia lub hnoob nyoog theem nrab uas muaj peev xwm muaj txoj sia ua tau lub neej ntev. Source: SBS

Txawm li cas los yeej muaj Australia tej neeg txum tim tseem muaj lub hnoob nyoog ua tau lub neej nyob ntev qes dua, uas tej poj niam ces tsuas nyob ntev txog li 75.6 xyoo, hos tej txiv neej ces tsuas nyob ntev txog li 71.9 xyoos xwb.

Lub caij uas tseem muaj kab mob COVID-19 sib kis thoob ntuj ces tau ua rau lub hnoob nyoog ua tau lub neej nyob ntev tau nqes ua thawj zaug txog 0.1 xyoos txij lub caij nrab xyoo 1990 — uas tau nqes txij lub caij xyoo 2019/21 thiab 2020/22 — vim tau muaj neeg tas sim neej coob ntxiv xyoo 2022.

Tab sis tej neeg Australia kuj yeej tseem muaj peev xwm ua tau lub neej nyob ntev ntxiv tuaj ntev tshaj 40 feem pua piv rau 100 xyoos dhau los thiab. Tej neeg uas tau yug rau thaum tseem ntxov lub caij xyoo 1900 ces tsuas muaj peev xwm ua tau lub neej nyob ntev txog li 55 xyoos xwb.

Raws li Matthew James uas yog tus lwm coj lub kom haum AIHW tau hais ces "Txawm tias cov kev muaj peev xwm ua tau lub neej nyob ntev tau nqes tsawg me ntsis rau xyoo 2020-2022 lawm, los yeej tseem muaj peev xwm ua tau lub neej nyob ntev tshaj lub caij xyoo 2017 txog 2019 ua ntej yuav muaj kab mob kis thoob ntuj txog li 0.3 xyoos rau tej txiv neej thiab tej poj niam thiab.''

Tsis tas li ntawd los teb chaws Meskas los kuj muaj tej neeg ua tau lub neej nyob ntev tsawg tshaj qub rau lub caij tseem muaj kab mob COVID-19 ntawm 78.9 xyoo ntawm xyoo 2019 mus ua 76.4 xyoos rau xyoo 2021 lawm xwb; thiab tej neeg Askiv kuj muaj peev xwm ua tej lub neej nyob ntev tsawg zog ntawm 81.3 xyoos xyoo 2019 ua 80.4 xyoos rau xyoo 2020 lawm xwb.

Australia kuj muaj tej neeg haus luam yeeb tsawg dua tej neeg haus luam yeeb ntawm teb chaws OECD tab sis kuj muaj tej neeg lub cev muaj ceeb thawj los yog lub cev rog heev dhau lawm thiab. Source: SBS

Peb kuj tau txais kev noj qab nyob zoo ntev zog ntxiv tuaj lawm thiab

Lub caij uas neeg Australia ua tau lub neej nyob ntev ntxiv tuaj no los kuj tau txais kev noj qab nyob zoo ntxiv tuaj lawm thiab.

Tej txiv neej los yeej muaj peev xwm ua tau lub neej nyob ntev txog li 71.6 xyoo thiab tau txais kev noj qab nyob zoo ntev dua 2.2 xyoos rau xyoo 2003. Hos tej poj niam ces yeej muaj peev xwm ua tau lub neej nyob ntev txog 73.6 xyoo thiab tau txais kev noj qab nyob zoo.

Tab siv tej txiv neej los kuj tau ua lub neej xam raws li tus zauv nrab ntev txog li ntawm 9.7 xyoo nrog ib co mob nkeeg twg (uas tau nces ntau tuaj ntxiv ntawm 8.7 feem pua) thiab tej poj niam los kuj tau muaj lub caij xam raws tus zauv nrab txog li ntawm 11.5 xyoos uas muaj mob nkeeg (tau nce ntau ntxiv tuaj ntawm 10.2 xyoos) lawm thiab.

Tej xwm txheej no thiaj ua rau muaj neeg xav siv cov kev kho mob los yog lwm yam kev pab cuam ntau tuaj ntxiv.

Neeg Australia tau txais kev noj qab nyob zoo tshaj qub ntxiv tab sis kuj muaj mob ntev ntxiv tuaj lawm thiab. Source: AAP

Tej mob nkeeg uas muaj rau tej neeg ua ntau theem neej sib txawv

Raws li tej xov xwm xyoo 2022-23 uas teev txog cov kev txais tej neeg kho mob ntawm tej tsev kho mob xyoo 2022-23 ces muaj ntau yam laj thawj sib txawv ua rau muaj tej neeg hnoob nyoog sib txawv raug coj mus phais mob.

Tej me nyuam mos ab thiab tej me nyuam hnoob nyoog qes dua 5 xyoos uas raug coj mus kho ntawm tej tsev kho mob feem coob ces yeej muaj tej mob cuam tshuam txog ntsws thiab hlab pa (Hnoos tau khaub thuas), hos tej hluas muaj hnoob nyoog txog 24 xyoos ces muaj teeb meem tas mus li rau tej mob nkeeg cuam tshuam txog cov kev mob plab thiab lub cev cov kev zom zaub mov.

Ces tej mob nkeeg cuam tshuam txog cov kev zom zaub mov thiaj muaj tej mob cuam tshuam txog tej kaus hniav, mob pos hniav, muaj kev txawv txav rau tej kauj tsaim, tej hlab noj mov rau lub plab, mob plab zom mov, mob hnyuv tws, mob hnyuv hlauv, mob hnyuv, mob siab, mob tsib thiab mob po.

Tsis tas li ntawd los cov kev xeeb me nyuam thiab yug me nyuam yog tej yam ua rau tej neeg muaj hnoob nyoog 25 txog 44 xyoos mus siv tswv kho mob ntau tshaj plaws, hos tej laus neeg Australia ces raug coj mus kho ntawm tsev kho mob vim yuav tau lim ntshav los yog lim zis thiab mob cancer.

3 yam laj thawj tseem ceeb uas ua rau ib pawg neeg muaj hnoob nyoog sib txawv twg raug coj mus kho ntawm tsev kho mob xyoo 2022-23. Source: SBS

Kab mob COVID-19 yog ib yam mob uas rau muaj neeg tas sim neej coob ua zum 3

Xyoo 2022 ces kab mob COVID-19 tau ras los ua cov mob uas ua rau neeg tas sim neej coob zum 3 ntawm Australia, thiaj yog thawj zaug ntawm lub caij ntev dua 50 xyoo uas ib tug kab mob sib kis tau ras los ua ib tug mob ntawm 5 hom mob ua rau muaj neeg tas sim neej coob heev. Kab mob khaub thuas thiab mob ntsws yog cov uas ua rau neeg tas sim neej coob ua zum 5 rau lub caij xyoo 1970.

Tej mob cuam tshuam txog txoj hlab ntsha loj yug lub plawv txhaws yog ib tug mob ua rau muaj neeg tas sim neej coob tshaj plaws ntawm teb chaws Australia. Source: SBS

Txij li xyoo 1907 txog xyoo 2020 ces tau muaj neeg tas sim neej los ntawm tej kab mob sib kis tsawg txog li 98 feem pua vim tau siv ntau yam tswv yim los tswj kab mob thiab tau hno tshuaj vaccine rau tej neeg rau lub caij tseem yog me nyuam yaus coj los tiv thaiv ntau yam mob li mob ntsws qhuav, mob tuag tes tuag taw, mob tej qhov ntswg thiab qa, mob kab xeb, mob hnoos hawb pob hnoos tsis txawj tu, mob ua qoob, ua npaws mumps thiab rubella.

Thiab kuj tau muaj cov kev pauv hloov ntawm tej mob ntau yam li kab mob sib kis los ua tej mob uas mob ntev ras los ua tej mob uas ua rau tej neeg tas sim neej coob tuaj ntxiv lawm. Feem ntau mas tej mob nkeeg uas ua rau tej neeg mob ntev yog cov ua rau tej neeg tas sim neej feem coob txog li 90 feem puas ntawm tag nrho txhua cov kev tas sim neej xyoo 2022.

Ib daim phiaj qhia tias tus mob dementia yog ib tug mob ua rau muaj tej poj niam tas sim neej coob tshaj plaws xyoo 2022. Source: SBS

Tej mob cuam tshuam txog txoj hlab ntsha loj yug lub plawv txhaws yog tus mob uas ua rau neeg Australia tas sim neej coob tshaj plaws txuas ntxiv ntawd ces yog tus mob dementia.

Hos tus mob cancer yog ib tug mob uas ua rau Australia tej neeg txum tim tas sim neej coob tshaj plaws, thiab tseem muaj neeg tas sim neej coob tshaj tej mob cuam tshuam txog plawv thiab hlab plawv rau ntau lub xyoo tsis ntev los no thiab.

Daim phiaj qhia txog ntau yam mob nkeeg uas ua rau tej txiv neej tas sim neej xyoo 2022. Source: SBS

Cov kev muaj mob nkeeg ua rau neeg Australia poob nyiaj ntau heev

Ntau yam mob nkeeg li mob plawv txhaws, mob duav thiab muaj kev txhawj xeeb tau ua rau neeg Australia muaj mob ntau xyoo ntawm lawv lub neej.

Ces tej chaw leg ntawm tej mob no thiaj tau txheeb txog tej teeb meem uas tej mob nkeeg no tau tsim thiab tej mob nkeeg uas ua rau tej neeg raug mob.

Xyoo 2023 ces yeej tau muaj kev kwv yees tias neeg Australia tau plam 5.6 million xyoo ntawm lub neej tau txais kev noj qab nyob zoo vim lawv muaj mob los yog tas sim neej ntxov tshaj qhov tsim nyog tas sim neej.

Thiab tus mob txoj hlab ntsha loj uas yug lub plawv txhaws yog ib co mob tseem ceeb uas ua rau tej txiv neej tas sim neej coob tshaj plaws, txuas ntxiv ntawd ces yog mob duav thiab tej xwm txheej txov txo tus kheej txoj sia (tua tus kheej) thiab txov tus kheej kom raug mob.

Hos tus mob dementia ces yog tus mob ua rau tej poj niam tas sim neej coob tshaj plaws, ntxiv ntawd ces yog tej kev txhawj xeeb ntau yam thiab mob duav thiab ntau yam teeb meem.

Tab sis yog tham txog Australia tej neeg txum tim lawm ces kuj txawv thiab, tej teeb meem nyuaj siab ntxhov plawv thiab cov kev siv tej yaj yeeb ua rau lawv raug teeb meem ntau tshaj plaws, txuas ntxiv ntawd ces yog cov kev raug mob, cov kev mob plawv thiab hlab plawv, mob cancer thiab mob tej mob cuam tshuam txog nqaij thiab pob txha.

Kuj tau tos ntev tuaj ntxiv mam tau kho mob

Xyoo 2022-2023 ces 50 feem pua ntawm tej neeg mob uas raug coj mus phais ntau yam mob uas tsis tshua maj phais ntawd yeej tau tos txog li ntawm 49 hnub mam li tau phais, uas yeej tau tos ntev tshaj 9 hnub piv rau xyoo 2021-22 uas tsuas tos 40 hnub xwb tau phais lawm.

Tsis tas li ntawd los yeej tau muaj tej neeg mob yuav laug txog li 10 feem pua tau tos ntev tshaj 1 lub xyoos thiab muaj tej neg no ntau tuaj ntxiv ntawm 2.1 feem pua xyoo 2018-19 ua 6.3 feem pua xyoo 2021-22 lawm.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.