Yeej muaj neeg Australia coob heev tsis tshua muaj peev xwm them tau tej nqe ntiav tsev nyob los yog tej nqe them tej nyiaj qev yuav tsev nyob, los yog them tej nuj nqes ntau yam, thiab yuav tau hloov dua tej cwj pwm ua lub neej vim tsis tshua muaj nyiaj txaus siv.
Ces tam sim no lub tuam txhab Finder cov kev teeb txheeb thiaj tau txheeb txog ntau yam peb tsis tshua paub txog uas muaj cuam tshuam nrog tej nuj nqe siv ua lub neej.
Raws li cov kev teeb txheeb no ces muaj 52 feem pua ntawm tej neeg Australia — los yog yuav laug txog li ntawm 10.5 million tus — yog tej neeg ntiag tug uas tsis tshua tau dab ntub txaus, ua rau lawv tau laus sai tuaj ntxiv thiab pheej sib cav sib ceb nrog tej neeg lawv hlub tshua ntau tuaj ntxiv.
Ib tug ntawm peb tug neeg (33 feem pua) uas tau koom cov kev teeb txheeb no tau qhia tias ua rau lawv pwm tsis tsaug zog vim txhawj xeeb txog nyiaj txiaj xyoo dhau los, thiab ua ke no los kuj muaj tej neeg ib tug ntawm tsib tug (18 feem pua) kuj ua rau txheeb hau ntau tuaj ntxiv, tawv nqaij txoom ntau tuaj ntxiv, los yog plaub hau hle vim txhawj xeeb txog nyiaj txiaj.
Muaj tej neeg no yuav laug 1 tug ntawm 5 tug twg (19 feem pua) ces yeej muaj tej mob cuam tshuam txog cov kev nyuaj siab rau nyiaj txiaj.
Tsis tas li ntawd los kuj muaj teeb meem rau txoj kev sib raug zoo nrog tej neeg lawv hlub thiab tej txheeb ze.
Raws li Finder hais ces 19 feem pua ntawm tej neeg Australia yeej tau sib cav nrog lawv tus poj niam los yog tus txiv/tus neeg lawv nrog nyob ua ke vim muaj nyiaj tsis txaus siv, thiab muaj 11 feem pua yeej tau sib cav sib ceg nrog tsev neeg thiab tej phooj ywg vim nyiaj txiaj.
Erin Smith ces yog ib tug kws lij choj hnoob nyoob 30 xyoo ntawm Brisbane tau hais tias nws tej nqe siv ua lub neej yeej tau kim ntau tuaj ntxiv txog li ob npaug txij li thaum tau pib nce kab theem paj ntau zaus rau lub 5 hlis ntuj xyoo 2022 los lawm.
Nws tau hais tias "Cov kev yuav tau them tej nyiaj qev los yuav tsev kim thiab muaj ntau yam nqe kim tuaj ntxiv yog tej ua rau muaj teeb meem loj tshaj plaws rau kuv. Tam li yog tib tug leej niam uas khwv nyiaj los tab kuv yim neeg xwb, ces kuv kuj tau pom tias tam sim no kuv yuav tau npaj kom tau nyiaj ntau txog li ob npaug los them tej nqe uas kuv yeej ib txwm them dhau los lawm.''
Txawm tias nws yog ib tug yeej kwv tau nyiaj ntau dua tej neeg khwv tau nyiaj nrab, los cov tsis tau nyiaj txaus siv yeej tau ua rau nws muaj kev nyuaj siab ntxov plawv ntau tuaj ntxiv thiab ua rau nws tsis tshua tau dab ntub.
"Tej kev nce kab theem paj ntau zaus tau ua rau kuv nyuaj siab ntau tuaj ntxiv, tam sim no ces kuv yuav tau npaj kuv tej nyiaj siv raws limtiam lawm xwb tsis yog npaj siv raws hli lawm, thiab tsis tas li ntawd los cov kev nrog xyuas kom muaj nyiaj siv thiab nrhiav ntau txoj xub ke los txuag nyiaj yeej nyob nraim hauv kuv nruab siab xwb. Tsis tas li ntawd los pheej ua rau kuv npau suav cuam tshuam txog nyiaj thiab nyuaj siab txog nyiaj txiaj tas li thiab.''
Graham Cooke ces yog Finder tus coj teeb txheeb txog tej neeg yuav khoom siv tau hais tias nyiaj txiaj yuav ua rau muaj ''teeb meem rau txhua sab seem ntawm yus lub neej.''
Raws li Cooke hais ces “Tej nqe them yuav tsev thiab tej kev txhawj xeeb txog nyiaj txiaj yeej tau maj mam muaj teeb meem zujzus tuaj rau yus - qhov no qhia tias tej cuab yig ntawm Australia tseem txhawj xeeb heev txog tej nuj nqe siv ua lub neej, txawm tias tus kab theem nyiaj poob nqe ib nyuag ntaug zog lawm. Ces teeb meem tsis muaj nyiaj txaus siv thiaj yuav ua rau muaj teeb meem rau txhua yam ntawm yus lub neej thiab haj yam ras los ua ib cov teeb meem muaj ceem sai zujzus tuaj ntxiv lawm.''
Tsis tas li ntawd los Finder kuj tseem txheeb tau ntxiv tias tej kev txhawj xeeb txog tej nuj nqes siv ua lub neej no tseem ua rau muaj teeb meem sib txawv rau poj niam thiab txiv neej. Thiab yeej muaj tej poj niam txog li ntawm 62 feem pua qhia tias lawv muaj teeb meem txhawj xeeb txog nyiaj txiaj piv rau tej txiv neej ces tsuas muaj txog 42 feem pua xwb.
Tej hluas neeg Australia los kuj zoo li yog cov neeg uas yeej ntsib teeb meem nyuaj siab rau sab nyiaj txiaj tshaj plaws li thiab, 69 feem pua ntawm phaum neeg Gen Z (1997-2012) yeej lees tias lawv yeej ntsib teeb meem ntau yam cuam tshuam txog cov kev tsis muaj nyiaj txaus siv thiab.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
