Ua ntej ib lub limtiam ua ntej yuav txog Christmas ces tej coj xeev tau npaj ceev nrooj rov qab los siv dua cov kev txwv kev ntoj ncig tshiab rau tej neeg ncig teb chaws ntawm Sydney lub zos Northern Beaches uas yog ib thaj chaw tseem tab tom muaj neeg kis tau tus kab mob coronavirus coob tuaj ntixv.
Tau muaj neeg kis tau tus mob no tag nrho txog li 41 leeg rau hnub zwj Cag (Saturday) dhau los, tab sis nom tswv yeej tseem tsis tau paub lub chiv keeb tias ho sib kis tau tus kab mob no li cas.
Nws hais tias "Yog tej yam tsim nyog heev uas peb yuav tau rov qab txwv tej neeg li peb tau txwv lub 3 hlis ntuj dhau los, tab sis tsuas txwv thaj chaw Northern Beaches xwb."
Tej xwm txheej muaj neeg kis kab mob coronavirus coob tuaj ntxiv uas ua rau sawv daws ceeb, thiaj tau ua rau tau muaj tej cai tshiab raug coj los tswj cov neeg Sydney thiab tej neeg ntawm xeev NSW uas xav mus ncig txawv xeev rau lub caij holidays no. Txuas ntxiv no yog tej koj tsim nyog paub txog:
Victoria
Tsis hais ib tug neeg ntawm xeev NSW uas xav mus ncig rau xeev Victoria txij ib tag hmo hnub zwj Kuab (Friday) mus ces yuav tau thov ntawv tso cai, thiab txwv tsis pub tej neeg ntawm Northern Beaches mus rau xeev Victoria.
Yog li ntawd thiaj yuav tso cai rau tej neeg raws li cov teeb siv tswj kev tsheb, uas yuav siv teeb liab rau Northern Beaches, nroog Sydney ces yog teeb daj, hos lwm cheeb tsam ntawm xeev New South Wales ces siv tsos ntsuab.
Yog li ntawd tej neeg ib tug twg nyob rau tej chaw raug teev tsos daj mus rau lwm qhov chaw ces yuav raug sim thiab yuav raug cais kom paub tias seb puas kis tus mob no tso.
Hnub Saturday ces xeev Victoria tus pwm tsav lis laj faj tswj kev noj qab haus huv tau ceeb toom tias yuav muab nroog Sydney teev ua thaj chaw muaj neeg kis kab mob coob los yog teev ua tsos liab (red zone) yog tias tseem muaj neeg kis kab mob dhau ntawm Northern Beaches mus lawm thiab.
"Tej zaum kuj yuav muaj tau kev phom sij tias muaj neeg kis tus kab mob no thoob rau nroog Sydney los tau."
"Yog tias muaj tseeb li ntawd - thiab kuv xav qhia meej tias yog tias yog li hais ntawd tiag - ces peb tsis muaj lwm txoj xub ke lawm, yuav tsum teev nroog Sydney ua tsos liab."
Yog li thiaj yuav tau tshuaj ntsuam tej xwm txheej no txhua teev thiab thiaj yuav muaj cov kev pauv hloov rau cov kev txwv no lub sij hawm twg los tau.
Hos tej neeg uas tau mus rau Northern Beaches tab sis ho tau tuaj rau xeev Victoria txij hnub tim 11 December lawm ces tsim nyog yuav tsum tau cais lawv tus kheej thiab yuav tau mus sim.
Queensland
Queensland tej nom tswv tswj kev noj qab haus huv tau siv dua ib cov ntaub ntawv tso cai hla ciam teb los tswj tej neeg tuaj ntawm xeev NSW txij li 1 teev sawv ntxov hnub tim 20 December lawm, hos lub zos Northern Beaches ces raug teev ua ib thaj chaw muaj neeg kis kab mob coronavirus coob lawm.
"Tej neeg nyob ntawm Central Coast ntawm New South Wales los yog nroog Sydney uas tseem npaj yuav mus rau xeev Queensland ces thaum mus txog yuav raug nom tswv hais kom mus sim thiab cais lawv tus kheej txog rau thaum paub tias seb puas kis los tsis kis kab mob tso," raws li Yvette D'Ath uas yog tus pwm tsav tswj kev noj qab haus huv qhia.
Tsis hais ib tug neeg twg li yog twb tau mus xyuas Northern Beaches tom qab hnub tim 11 December tab sis tam sim no nyob ntawm xeev Queensland lawm ces tsim nyog yuav tsum tau mus sim lawv tus kheej thiab yuav tau cais lawv tus kheej 14 hnub txij hnub uas lawv tau mus rau thaj chaw ntawd.
Tej neeg uas tau mus txog xeev Queensland rau hnub zwj Kuab (Friday) tom qab tau mus xyuas Northern Beaches tom qab hnub tim 11 December yuav tsum tau mus sim thiab yuav tsum tau cais lawv tus kheej ntawm lawv tej vaj tse chaw so 14 hnub.
Tom qab sij hawm 1 teev sawv ntxiv hnub tim 19 December ces tsis hais leej twg li yog tau mus rau thaj chaw Northern Beaches lawm yuav tsum tau mus cais lawv rau ntawm tej tsev tos txais qhua thiab nws yog tus yuav tshwm nyiaj ntiag tug los ntiav tej chaw cais.
The Australian Capital Territory (ACT)
Tau muaj kev taw qhia rau tej neeg ntawm xeev Canberra kom tsis txhob mus ncig rau thaj chaw Northern Beaches lawm.
Tsis hais ib tug twg li yog tau mus xyuas thaj chaw no txij hnub tim 11 December yuav tsum mus sim thiab yuav tsum cais lawv tus kheej li nom tswv tau hais.
Western Australia
Raws li Mark McGowan uas yog tus hau xeev Western Australia tau qhia ces nws lub xeev rov qab tswj nws cov ciam teb nruj rau xeev NSW lawm, vim muaj neeg kis kab mob ntawm Northern Beaches coob tuaj ntxiv.
Pib txij li ib tag hmo hnub zwj Cag (Saturday) ces tau muab cov kev teev theem phom sij ntawm qes nce ua theem nrab lawm, txhais tau tias yuav rov qab siv cov kev txwv li qub uas tau coj los tswj tus kab mob no rau thaum ntxov xyoo no lawm.
Cov neeg uas yuav pub caij dav hlau yav tawm ntawm NSW mus rau Western Australia tom qab hnub tim 20 December ces yog cov tau txais kev tso cai zam rau xwb.
Mr McGowan tau hais tias "yog ib cov kev txiav txim siab nyuaj heev" uas yuav tau ua rau lub xyoo no.
Nws hais tias "Kuv nkag siab tias cov xov xwm no yog ib cov xo tsis zoo rau tej neeg uas xav mus ntsib lawv tsev neeg rau lub caij Christmas ntawm xeev NSW."
The Northern Territory
Xeev Northern Territory tau muab lub zos Northern Beaches teev ua thaj chaw muaj neeg kis kab mob coronavirus coob lawm. Ib tug neeg twg ntawm lub zos no uas npaj yuav mus ncig rau xeev Northern Territory yuav tsum raug cais 14 hnub rau ntawm lub chaw cais Alice Springs los yog ntawm nroog Darwin.
Tasmania
Nom tswv tswj kev noj qab haus huv yeej tau muab thaj chaw Northern Beaches ua ib thaj chaw yuav muaj kev phom sij kis tus kab mob coob heev, thiab tau txwv tsis pub ib tug twg uas tau mus rau thaj chaw ntawd txij hnub tim 11 December mus rau nws lub xeev Tasmania, tsuas yog tias ntshe tej neeg mus ntawd ho yog ib cov neeg muaj hauj lwm tseem ceeb xwb.
Tasmania yeej tau muab nroog Sydney zwm ua "thaj chaw pheej hmoo kis tau kab mob nrab", txij ib tag hmo hnub tim 20 December no mus lawm. Tsis hais ib tug neeg twg li yog mus ntawm thaj chawj no mus rau lub xeev no ces yuav tsum tau cais lawv tus kheej 14 hnub.
Thiab ib tug neeg twg uas twb tau mus rau thaj chaw ntawd rau hnub zwj thaj ntawd yuav raug nom tswv hais kom yuav tsum tau cais lawv tus kheej kiag tam sim ntawd thiab yuav tau mus sim.
Tsoom fwv xeev Tasmanian tau npaj sab laj txog cov kev txwv tshiab nrog rau tej neeg tswj cov kev sib tw nkoj uas yuav sib tw ntawm Sydney mus rau Hobart thiab tau txwv tsis pub muaj cov kev sib tw caij nkoj no lawm.
South Australia
Tej neeg South Australians uas tau mus xyuas lub zos Northern Beaches, Lavender Bay los yog Penrith txij hnub tim 11 December yuav tsum tau cais lawv tus kheej kiag tam sim ntawd thiab yuav tsum mus sim.
Tsis hais ib tug twg li yog tau mus xyuas lub chaw dov pob Avalon Bowling Club rau hnub tim 13 December sij hawm 5 teev txog 7 teev tsaus ntuj thiab hnub tim 15 December sij hawm 3 teev txog 5 teev tsaus ntuj, los yog tau mus koom lub chaw Avalon Beach RSL Club rau hnub tim 11 December ces yuav tsis pub mus rau xeev South Australia lawm. Yog tias lawv twb ho tau mus rau lub xeev no lawm, ces lawv yuav tsum mus cais lawv tus kheej rau ntawm tej tsev tos txais qhua.
Tej neeg ncig teb chaws txawv xeev uas xav mus rau lub xeev South Australia yuav tsum tau thov kev tso cai, kom thiaj txheeb tau tias seb ho muaj leej twg ho tau mus xyuas lub zos Northern Beaches tsis ntev los no.
Mloog tau rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm thiab subscribe los sis yog download thiab mloog tau ntau cov podcasts (xov xwm ua suab) ntawm, , thiab los yog download kom koj mloog tau SBS Hmong.
